Geek友講場

2013 Tech界運程占占占

2013年01月02日 ~~ 第293期 Face

預言話 嘅 2012年 1221世界末日最終冇發生，大家繼續開開心心迎接 2013年！與其預言虛無飄渺 嘅世界末日，倒不如預言 2013有乜 tech界新 trend仲實際。用齊晒各種方法求神問卜，得出同一結論都係 tech界繼續熱鬧： Apple同 Google繼續鬥餐死、 AV界掀起 4K潮、 DC就搞機仔革命，仲有 game界 嘅流動遊戲新勢力全面抬頭。新一年要追神劇《天與地》之外，仲要留意 tech界大預言，貼實個 trend。

新 iPhone　隔空充電

Tim Cook上場咁耐，果粉都明白佢係一位商家，而唔似 Steve Jobs係發明家。未來 iPhone 5S或 iPhone 6嘅轉變，唔少網站都估會好似 iPod咁玩多色，連阿奴都話好期待！功能方面，法國網站 Nowhereelse.fr就話自己得到一張下代 iPhone解構圖，估計新機有機會可以入兩張 SIM咭。而多次估中新 iPhone規格 嘅 AppleInsider就發現 Apple申請緊利用近場磁阻技術做隔空充電 嘅專利，新 iPhone好大機會只要放 喺 iMac 1米附近就可以充電！


唔少網站都預想 iPhone一系列新色，但睇相都估到，佢 哋唔想同 iPod同一色系咁冇新意囉！


法國網站 Nowhereelse.fr據稱得到一張新 iPhone拆解圖，同右面 嘅 iPhone 5擺位明顯唔同。


傳聞 嘅新 iPhone會變得更薄更輕絕對唔奇，如果好似設計師 Antoine Brieux諗 嘅呢部就型喇！

3月再出新 iPad

之前第 4代 iPad突然提早出籠，而且 iPad mini嘅設計又贏到唔少掌聲。外國網站預計 iPad都會玩新色外，經常貼中 Apple產品 嘅日本網站「 MACぉ宝鑑定團」更大膽預言新機會 喺 3月推出！佢仲話 iPad mini將會有 Retina芒之外， size仲會繼續縮小：長度減少 4mm、寬度縮小 17mm兼再偷薄 2mm。而第 5代 iPad應該會參考 iPad mini嘅設計，飛走㓤手邊框。


有果粉已經自製 3D圖，預計 iPad mini新色系列。


盛傳 iPad會採用 iPad mini設計，更唔少得圓滑邊框。

沒有教主的 2012

轉個眼，教主 Steve Jobs已經離去 1年有多，而 iPhone 5就係 Tim Cook擔大旗新作。可惜新機新意欠奉，新 iOS 6仲整 咗個爛 map，搞到用家叫苦連天，連 Tim Cook都要出 嚟道歉。雖然話冇新意，不過銷量依然唔錯，全球開賣首日就賣 咗超過 500萬部，比 4S成績更好。而最近 喺內地開賣 3日就達 200萬部，總計 iOS 6升級數字更達 1億，非常厲害！


雖然電視日日介紹 iPhone 5個芒變大，同時又變細，不過呢部拉長版 嘅 4S，就俾網民惡搞，話 iPhone出到第 10代都只係識變長。




售價：$5,588（ 16GB）/$6,388（ 32GB）/$7,188（ 64GB）
查詢： Apple（ 800 908 988）

違背祖訓的 iPad mini

新教主上場，果然連祖宗訓令都唔記得，好似 Steve Jobs明明講過 7吋平板只有死路一條，但係 Tim Cook就 喺年尾新推 7.9吋 iPad mini，行平價路線，力撼 7吋 Nexus 7！ 

售價：
WiFi版：$2,588（ 16GB）/$3,388（ 32GB）/$4,188（ 64GB）
Cellular版：$3,588（ 16GB）/$4,388（ 32GB）/$5,188（ 64GB）

Android有彎轉

睇完 Apple喺 2013年已做足準備， Android陣營又有咩新招迎敵呢？其中應該會同 Apple打官司打到末日 嘅 Samsung，將會力推可以屈曲 嘅高清芒「 YOUM」。 嚟緊 CES 2013，盛傳 Samsung將展出 5.5吋解像度達 1,280× 720嘅 YOUM。更傳聞 5月會推出首部用上 YOUM嘅 GALAXY Q手機，配雙核心同 2GB RAM等高階規格之餘，更可以屈曲，絕對期待！而開發屈曲芒 嘅仲有 LG同 Nokia，可見非 Apple陣營勁多新 嘢玩。


GALAXY Q預想圖


三星於 CES 2011年已展出過 4.5吋軟芒，夠晒創新，當時解像度只有 200ppi， 嚟緊 CES 2013更有望可以見到升級版 嘅 YOUM。


有片有真相，有用家搵鎚仔狠力測試呢個屈曲芒，真係完全唔碎！（片段名稱： SAMSUNG Flexible AMOLED Display-Hammer Test）


YOUM其實係用可屈曲 嘅物料 film取代原有 嘅玻璃質料，令屏幕可屈曲同打唔爛！


Nokia於 2011年的 CES上展出佢部屈曲手機，不過等到 2013都冇下文。


LG 12年年頭就講明發展可屈曲的 E-paper，令屈曲芒唔再限於手機。

Samsung新機不停出

關於 GALAXY S IV嘅預想圖，唔少網站都引用呢個方框設計，相信係覺得 Samsung會為 咗避開又同 Apple打官司，再大改上代 S III嘅設計。

作為全球第一大 smartphone品牌，三叔班 GALAXY艦隊 喺 2013年繼續狂出新機。除 咗傳聞 GALAXY Q有屈曲芒之外，傳聞旗艦級 嘅 GALAXY S IV亦會配備 YOUM芒。另一驚喜，係各大外國網站都口徑一致話新機鏡頭將會升級到 1,300萬像素，仲會再加快粒 U，令整體流暢度繼續領先。而另一皇牌 GALAXY Note，韓國媒體就傳第 3代 Note會將屏幕加大到 6.3吋，而網站 GLBenchmark，更出現 Note新機規格資料，單係粒 1.6GHz四核芯處理器，都令人期待。 

Google最親親生仔

其實今年 Motorola嘅電量王 Maxx都算叫好叫座，相信真正加上 Google效應的話， X phone極有機會製造驚喜。

早於 2011年， Google已經收購 Motorola，但等咁耐冇新機之餘，更不斷結束世界各地 嘅分公司，原來養兵千日，用在 13！據美國《華爾街日報》早前報道， Google為怕 Samsung不斷坐大，有機會「食碗面！反碗底」（例如早年推出自家 OS嘅 WAVE系列）。所以 Google就命 Motorola開發最親 嘅親生仔「 X phone」。相信 2013年有望推出， Android支持者必撐！ 

2012銀河艦隊

2012年可說是 Android機百花齊放 嘅一年， Samsung、 LG、 HTC不停發功， fans要追新機，幾乎隔個星期都有機換！不過最成功，都係走大芒路線 嘅銀河艦隊 GALAXY S III同 Note II。 喺香港一開賣就斷貨，仲出現炒價，抗衡 iPhone賣斷市現象，值得紀念。


GALAXY Note II
售價：$5,698/$6,198（ LTE版）
查詢： Samsung（ 3698 4698）


GALAXY SIII
售價：$5,598/$5,698（ LTE版）


GALAXY S III於香港推出，有網路商 喺旺角搞大型首賣活動，重視程度拍住當年 iPhone。

Google自家 Nexus搶低價

Nexus系列好評如潮，不過 Nexus 10仲未有香港行貨，而 Nexus 4行貨竟然定價$4,398，比美國定價 US$299（約$2,318）貴一大截，吸引力大減。

作為背後大佬， Google都不敢怠慢， 2012年中推出 7吋平板親生仔 Nexus 7，叫好叫座！去到年尾，更一次過推出升級版 Nexus 7、 10吋芒 嘅 Nexus 10同新一代親生仔手機 Nexus 4， 喺外國全部大賣！擺明想學 Samsung，玩軍團式銷售！ 

超高清入屋　電視大躍進

3D電視搞 咗咁多年都唔算太入屋，可能大家覺得電視仲未到改朝換代 嘅時候，殊不知新技術已蓄勢待發。先有新規格 4K超高清電視面世，來年 Apple亦勢必推出 Smart TV來個大亂鬥，用電視上網玩 app帶 嚟翻天覆地新變化！新一年電視界競爭可能比兩強玩晒 嘅 smartphone更有看頭。 


自知冇 4K片源， Sony部 4K電視跟機送一部 video player，內置《蜘蛛俠：驚世現新》、《宇宙威龍》等 4部 4K片。雖冇講明係 upscale定原生 4K，但都叫做有片睇！

Sony Bravia 4K LCD KD-84X9000
尺寸： 84"
解像度： 3,840× 2160
背光模式： Dynamic Edge LED
HDMI輸入： 4組
體積： 2,137× 1,136× 90mm
重量： 80kg
售價：$218,880
查詢： Sony（ 2345 2966） 

4K之謎

2012年尾 嘅 4K電視以展示實力為主， LG 84吋 LM9600開價$188,000，已經係較平 嘅一部。
售價：$188,000
查詢： LG（ 3543 7777）

這年頭人人掛嘴邊 嘅高清，行內標準為 1,920× 1,080解析度，如果當畫面由一點點畫成， 4K畫面就係比高清擁有多 3倍 嘅點數，畫面更密更細緻，解像度急升至 3,840× 2,160，理論上清好多！ 2012年尾， Sony同 LG都率先推出旗艦級 4K電視，以 80吋、過十萬定價 嘅高規格造勢，預計來年比較細尺寸 嘅 4K電視將會湧現鬥餐飽！ 

片源靠 upscale

3D搞 咗咁耐片源仍未算多， 4K亦不樂觀，雖然市面上已見 4K播放器機同攝錄機，不過就未見有電影公司放風出 4K影碟。技術上亦有難題，一套約兩小時 嘅 4K電影大約達 400GB容量，目前 Blu-ray都係 50GB一隻，碟廠話造多幾層 layer有機會搞掂，但靠網絡傳輸就好難！預計 13年 4K片源仍難以普及，幸好目前 嘅 4K播放器都有 upscale功能，識放大片源解像度同做修飾，睇落都比一般高清靚 咗。




4K攝錄機都開始 嚟料，除 咗專業級攝錄機， Canon剛 喺美國都出 咗部可拍攝 4K嘅數碼單反 EOS-1D C。不過定價約$12萬港元，唔係人人玩得起，希望其他相機 brand再推多 啲平機登場。 




一般 Blu-ray只得 1080p高清解像度，好在新出 嘅 AV擴音機，好似安橋 NR5010都內置「 4K Upscaling」功能，能將影像升頻上 4K，令片源大大增加！
售價：$23,800
查詢： Onkyo（ 2429 8148） 

2012唔 smart唔得

Samsung ES8000算係比較突出 嘅 smart TV，大玩體感同聲控，熄電視、轉台都可以唔用 remote。

撇除年尾發功 嘅 4K， 2012年電視界硬件上唔算有大進步，但玩 app嘅 Smart TV就愈趨普及。 Smart TV約始於 2010年，各大廠商都嘗試為電視添加網絡功能，用電視睇 YouTube玩 facebook。𠵱家更係唔 smart唔得， Samsung體感聲控電視乃其代表作，加上各種 Android TV Box湧現，電視上網可謂一大趨勢。不過對香港人 嚟講，免費電視牌照之爭更係貼身問題，王征大戰維基， 2013年仲有排睇。 

Full frame DC　必爆 trend

電視力推新技術， DC界雖冇革新技術，但就玩五花八門鬥熱鬧，大機 DSLR回勇，旗艦、中階、低價拍住上，無反方面又有 Canon加入戰團。之不過，論震撼性，必定比唔上 full frame全片幅格式加到 DC仔，甚至無反機中咁有睇頭！加埋配備 WiFi嘅 DC愈 嚟愈多，今年細機有計， 啱晒一般 light user。 

Sony RX1
感光元件： 35mm全片幅 Exmor CMOS
像素： 2,430萬
焦距： 35mm定焦
最大光圈： f/2
感光度： ISO 80-12,800
影片： 1080p
屏幕： 3" TFT
記憶： Memory Stick、 SDXC
體積： 113.3× 65.4× 69.6mm
重量： 453g
售價：$23,990
查詢： Sony（ 2345 2966）

全片幅 NEX Sony變主角

成日話 DC內 嘅感光元件愈大畫質愈好，過往 36× 24mm大，稱為 full frame全片幅格式 嘅 sensor係旗艦級單反專利，無反機用 嘅 APS-C、 M43等都細一級。但估唔到 Sony突破潮流 喺新 DC仔 RX1用上 full frame， 2013年更傳言 NEX系無反亦會出全片幅機。到時唔只相片質素大有進步，最正係唔少 wide angle鏡頭唔使再受增距之苦，要 snap、要自拍、淺景深一 㩒就有！ M43、 Nikon J、 Canon M唔出招 嘅話， DC界主角隨時變 Sony。


傳聞 NEX full frame機會同 NEX7差唔多樣，能夠通吃 NEX系 E接環鏡頭同單反 Alpha系 嘅 A接環鏡頭， 2013年內推出。


CES 2013將會 喺 1月 8至 11日舉行，有傳聞 Nikon會公布 Nikon 1 J3同入門級 S1，並放棄高階 V系，主打賣樣 嘅 J系，細機 2013繼續有計。

上網分享更普及

Polaroid Android相機暫名為 IM 1836，有傳像素為 1,810萬像，配備 3.5吋觸控屏幕同 Android系統，同 GALAXY Camera一樣可以插咭上網，更厲害係可以換埋鏡頭。

問心 嗰句，最常用 嘅相機可能係大家 嘅手機，因為即影即 share上 fb同 instagram都好重要。傳統 DC過相太麻煩，所以要對抗手機呢個強大對手， DC加入 WiFi上網功能，亦係必然趨勢！ Canon已推出首部 WiFi單反 EOS-6D， Samsung出埋可插 SIM咭 嘅 GALAXY Camera後，將來甚至會有高階 DC加入插 SIM咭上網 嘅功能。而 Polaroid亦公布， 喺即將舉行 嘅 CES會發表自家可換鏡頭嘅 Android camera，令人期待！ 




Canon 6D為首部內置 WiFi嘅數碼單反，用埋手機上 嘅 EOS Remote App就能無線過相落手機，想第一時間放相上 fb就更方便。
售價：$15,980（淨機身）
查詢： Canon（ 3191 2333） 




Samsung GALAXY Camera內置 Android，並支援 3G上網，但就唔可以打電話，支鏡頭更有 21倍變焦唔失禮。
售價：$4,498
查詢： Samsung（ 3698 4968） 




內置 WiFi天線 嘅 Eye-Fi咭亦係新 trend， Toshiba、 PQI、 Speed都陸續推出同類產品！只要 喺手機或電腦裝 app或軟件，就能令普通 DC升呢有埋 WiFi功能。
約售：$700（ 8GB） 

2012千奇百趣

回顧 2012年， DC真係好似手機咁，愈出愈多唔同價位機種，上至單反下至機仔都有平有貴。仲有令人印象深刻 嘅新科技光場相機，一齊睇吓以下幾部 2012年最有話題 DC。

天價單反 Nikon D4

天價單反唔係年年有， Canon 2011年底推出 1DX， Nikon今年頭就出 D4，引到班拍友個個嗌換機。兩者比較講足成年，一般論調指 1DX對焦較快， D4就色水較好。不過始終 D4先算係 2012年代表，回顧當然揀佢。 

Spec.：
1,620像素全片幅． 51點對焦． ISO 100-204,800． 160× 156.5× 90.5mm． 1,340g
售價：$52,800（淨機身）
查詢： Nikon（ 2907 1122）

創新科技 Lytro Light Field Camera

光場相機可說是全新拍攝技術，先影相後對焦，不過始終係新科技，實用程度不高。相片唔計像素計光束， 1,100萬道光束睇落似其他 DC幾十萬像素質素，仲一定要用電腦軟件改對焦位，距離普及仲有好遠路。 

Spec.：
1,100萬道光束． 8倍光學變焦．最大光圈 F2． 112× 41× 41mm． 214g
售價：$3,888（ 8GB）、$4,688（ 16GB）
查詢： Synergy（ 3163 0168）

最佳細機 Sony RX100

無反機今年似乎到 咗瓶頸位，新機唔見驚喜。反而大 sensor細機就引 嚟唔少話題，當中以 Sony RX100最多人讚，《 TIME》仲選 咗佢為 26件 2012年最佳發明之一，亦係唯一一部 DC入選，個個大讚佢袋得落袋又有 DSLR嘅質素。 

Spec.
2,020萬像素． 1吋 CMOS． 3.6倍光學變焦．最大光圈 F1.8． 102× 59× 36mm． 240g
售價：$5,390
查詢： Sony（ 2345 2966）

遊戲界福禍難料

XBox 720預想圖

2012年遊戲界並不寂寞，《 Diablo III》驚世降臨，再有任天堂新機 Wii U開賣，但盛世之後卻暗湧重重。遊戲大作只見續集，遊戲展更唔見有新主機公布，多個報告指出家用遊戲市場有下滑之勢！ 2013年遊戲界是福是禍，相信塔羅牌都未必估得到呀！ 

家用機　未必有新機

目前 XBox新機 嘅傳聞較新 PS實在，話會有 Kinect 2.0同有一個設計新穎玩法、獨特 嘅新手掣。

Wii U喺 12年搶閘推出，本以為 Microsoft同 Sony必會 喺 2013年出新機應戰，但傳聞已久 嘅 XBox新機未於 E3亮相，令不少玩家失望。通常家用機公布後要再等一年先會推出，就算傳聞中 嘅 XBox720同 PS4真係公布，估計都要 2014年先有得玩。早前 XBox遊戲雜誌《 XBox World》 喺停刊前，就話據內幕消息畫 咗 XBox720預想圖，人之將死，其言也善，呢幅摺書遺圖應該有幾分真！ 

手提機　 PSV掙扎鬥 3DS大作

PSV開賣約一年，全球銷量得 360萬部，對比早賣 10個月，但有 2,500萬部銷量 嘅 3DS簡直天壤之別。 3DS喺 12年尾氣勢迫人，日本人氣爆發 嘅《動物之森》，用 咗兩星期就賣過百萬，可見好遊戲最重要！ 嚟緊 3DS仲有《 Monster Hunter 4》照住， 13年預期會係 3DS收成期，入手無慮。反觀 PSV，歐美廠對手提遊戲機信心不大，日廠專注 3DS，要突圍唯有靠 Sony自己發力喇！


3DS喺日本已累積達 900萬部銷量，預計會有更多如《 Monster Hunter 4》 嘅第三廠大作推出。
3DS/Capcom/ACT/2013年夏天發售


靠《 Call of Duty》打救成效不大， PSV全球銷量得 360萬部實在慘不忍睹，發售兩個月 嘅 Wii U都賣過 370萬，你話慘唔慘？

手機遊戲　挑戰家用機

手機遊戲崛起， EA創辦人賀金斯更預言家用機會被取代，淪為小眾玩意！今年手機遊戲界日廠最出位，兩大神作《擴散性 MA》同《 Puzzle& Dragon》成為各大討論區長客，傳統大廠 Square Enix更全力投入，《 Final Fantasy》手機版出唔停。但要取代家用機就言之尚早，傳統大作《 Call of Duty Black Ops2》、《 Assassin Greed III》銷量比上一集有升冇跌，始終射擊同動作遊戲都要靠家用機。但無可否認手機遊戲興起會令家用遊戲變得更機迷向，可能搞到冇後生仔打機，機迷高齡化添！


《 Puzzle＆ Dragon》在港日熱潮久久不退，圖鑑、虛寵都有得炒賣。


FF音樂遊戲《 Final Fantasy Theatrhythm》登陸 iOS， Square Enix積極發展手機平台，反而家用機隻《 Final Fantasy Versus XIII》搞 咗 6年都未見影！


遊戲免費，但逐首歌收錢，分分鐘賺得多過手提遊戲機。

2012 game壇靠傳統

回顧 2012年，以一 game一機最有話題，先有令機迷久候 12年 嘅《 Diablo III》因為單調流程及極高難度引 嚟廣大討論，最終只能說毀譽參半； Wii U推出冇耐，暫時唔算有太多勁 game，對市場衝擊唔大。真正支撐住遊戲業界依舊係一眾傳統勁作， 2012年全球銷量 5強全屬名門之後，期待 13年會有新秀湧現！


《 Call of Duty Black Ops II》
銷量： 17,915,639
（ PS3、 X360/Activision/FPS）


《 FIFA13》
銷量： 9,294,299
（ PS3、 X360/EA/Sports）


《 Assassin’s Creed III》
銷量： 7,436,842
（ PS3、 X360/Ubisoft/ACT）


《 Halo 4》
銷量： 6,443,550
（ X360/Microsoft Game Studios/FPS）


《 Pokemon Black/White Version 2》
銷量： 5,749,516
（ NDS/Nintendo/RPG）

（資料來自 Vgchartz，只計算 2012年截至 12月 28日銷量，《 Diablo III》未有提供電子版銷量，不計在內。）

儲定錢換機喇！

《 FACE》 Gadget版監修人 903 DJ Donald

2013年我最期待有其他顏色 嘅 iPhone， iPod都可以，點解 iPhone唔可以？唔用殼 嘅 iPhone係最好，快 啲出啦！其次就係新電視機發展，宜家電視價錢愈賣愈平，要鬥就要鬥新功能。 2013儲定錢想買可以換鏡頭 嘅 full frame Sony數碼相機， RX1係好，但我要換鏡頭呀！ 

撰文：鄺浿鏇、司徒港燊
攝影：傅新發