韓式韃靼牛肉配醬油汁$198
用上來自韓國的牛 loin肉，可撈埋旁邊的雪梨絲再加埋醬油同吃，牛肉甜甜哋，雪梨爽口，口味豐富。

潮𡃁便當

韓風停不了

2013年01月02日 ~~ 第293期 Face

上個月 BIGBANG演唱會， facebook人人洗版，就知「韓」流幾勁！
韓燒興咗幾年，最近市面上更多是韓國宮廷菜、家庭菜，宮廷菜價錢再唔係天價，家庭菜口味亦愈見親民，「韓」風全面吹到，無孔不入！

失傳宮廷甜牛肉

登上 18字樓的 JANG，從落地大窗可望到半山建築物，老闆 Chris 2x歲（不肯透露），西裝骨骨，個子高大，帶點韓劇總經理外表，揀喺 18樓開店，全因為 18在中國人眼中好意頭，居高臨下，感覺亦 relax。 Chris眼見時下韓國餐廳以香港人印象中的韓國菜如韓燒為主，決心求變，提供韓國傳統美食為主，當中一款炸年糕，塗上蜜糖及柚子，賣相精緻，乃從韓國古代宮廷菜式中改良而成， 400-500年前韓國國王都食。另一道招牌菜韃靼牛肉，同樣為傳統宮廷菜式，牛肉每 3-4日從韓國空運而來，確保新鮮，製作時，師傅亦會減少用手觸摸到牛肉，希望原汁原味。由於開在中環， JANG星期六賣大包，叫一道菜，另一道菜 50% off，講都唔信。

特選牛肉石燒飯$158
材料及米飯熟後以 170度加熱 15分鐘，撈起會發現飯焦，熱辣辣，冬天食啱晒！

炸年糕配香草蜜糖汁$68
年糕塗上蜜糖及柚子後，酸酸甜甜，外脆內煙韌，好好咬。

韓風炸雞鎚$148
雞鎚較普通，但炸得不油膩，減梗肥的女生都唔驚。

三色飯糰$88
傳統之餘，這裏亦有較新潮的菜式，飯糰有泡菜、銀魚柳、牛肉 3款口味，銀魚柳甜甜脆脆，泡菜最惹味。

食客　 Yippee　文員

我第一次嚟，幾鍾意呢度嘅炸年糕，因為幾特別，韓國嘢好少有甜品食。

JANG

地址：中環皇后大道中 139號 The L. Place 18樓
電話： 2412 0002
營業時間：星期一至星期四: 11:30am-3pm， 6pm-12mn；　星期五至星期六： 11:30am-3pm， 6pm-1am；　星期日： 11:30am-3pm， 6pm-11pm

日賣 50碗辣湯麵

尖沙咀一向多韓國餐廳，最近開張的漢城美食，早前從金巴利道舊址搬來，老闆娘 So Seob，來港 20多年，幾年前因打理開餐廳的朋友返回韓國，接手其生意，首先請來韓籍師傅主理食物，增加菜式數目，甚至請個年輕韓妹店員，唔知以為去咗首爾！當中海鮮辣湯麵乃店鋪大賣之作，辣醬及麵條均由店鋪製造，過程乃機密，入口時辣味十足。泡菜辣湯飯則用上醃製已經數天的舊泡菜，使其變得更腍更入味，辣湯用上來自韓國辣粉，味道香濃，酸酸辣辣，當汁撈飯食啱晒！

海鮮辣湯麵$70
店內大賣之一，麵條吸盡湯身辣味，好滋味。

泡菜辣湯（連白飯）$70
湯內有豬肉及豆腐，貫徹韓國食物用料樸素的特質，最正莫過於泡菜，一咬爆汁，吸晒湯汁酸辣味。

傳統炒牛肉年糕$70
年糕長身，軟腍，帶甜味，有別平時食開都是酸辣的韓國食物。

泡菜餅$50
材料基本上以泡菜為主，較單調，但入口香脆，點辣醬同吃就最惹味！

食客　 Peter　傳媒

第一次食炒辛辣麵，夠辣同惹味，平時好少食韓國嘢都覺唔錯！

漢城美食

地址：尖沙咀寶勒巷 6-8A地下
電話： 2367 5025
營業時間：星期一至五： 11am-11pm；星期六至日： 12nn-11pm

雪碧味蘿蔔冷麵

以尖沙咀為基地的阿利水最近新開分店，面積遠比尖沙咀店小，位置亦有點不起眼，但 lunch時仍然吸引大批寫字樓食客前來。店師傅宋先生，本身為韓國人，向來在尖沙咀店幫手，得老闆信任， 4個月前調來分店，主理泡菜年糕、冷麵、湯麵、石頭飯等地道韓式食物。雜錦冷麵在牛湯內加入冰粒，蘿蔔、青瓜、辣醬、牛𦟌等材料大玩層層疊，侍應邊行邊搖搖欲墜，睇到都驚！當中辣醬加入蜜糖及雪梨，好讓辣醬多帶甜味，不會死辣，最特別是蘿蔔創意地加入雪碧，令蘿蔔咬落更爽，帶汽水味；而呢款冷麵，好多韓國人都喜歡食完熱食後再食，點解？冬天去過韓國，就知道佢哋室內開暖氣似係夏天，咁食絕對有理！

人參雞湯$110
每碗雞湯有半條人參，雞內有紅棗、糯米、栗子等材料，入口微帶酒香，好暖身。

雜錦冷麵$60
冷麵本身味道較淡，較冰涼，在吃過石頭飯及辣泡菜等熱食後進食，喉嚨好舒服。

煎餃子$80
菜單不包括煎餃子，但晚市師傅會因應客人需要提供，表面煎得好香脆㗎！

海鮮炒年糕$80
海鮮包括蜆及魷魚，年糕入口有嚼勁。

食客　 Anna　學生

我 working holiday嚟到香港，住係附近，見到有韓國餐廳，嚟食年糕，我之前食過冷麵，估唔到香港都有。

阿利水韓國料理

地址：鰂魚涌濱海街 56號地下
電話： 2351 2626
營業時間：星期一至日： 11am-10pm

外賣最強杰汁年糕

最近在土瓜灣零零舍舍開了間韓國小店，一入門口旁邊有個雪糕櫃，不賣雪糕卻賣自家醃製的泡菜。韓國人老闆 Winnie見該區附近冇韓國店，就夾埋阿媽哥哥聯手經營，提供家庭式韓國菜，例如炒粉絲， Winnie說是韓國媽媽經常煮來招呼客人的菜式。為迎合港人口味，年糕炒得更濃味，辣汁好杰，並特別設計了外賣紙筒，方便客人帶走。

泡菜炒飯$35
用上自家醃製的泡菜加入雞肉一併去炒，又開胃又惹味，最有趣係會加埋隻煎蛋，因為香港人鍾意。

炒年糕$35/韓式雞翼$35
年糕內加咗韓式魚蛋，一片片，咬口唔錯，辣汁呈杰身，配合年糕煙煙韌韌，唔捨得咁快吞！

雜錦海鮮煎餅$48
客人 order後即用韓國麵粉及蛋漿開撈，確保上碟新鮮熱辣，外脆內軟，蛋香葱香濃郁。

炒粉絲$40
粉絲味道不算太濃，微微帶辣。