電訊型科

慳水 4G機　 HTC One SV

2013年01月02日 ~~ 第293期 Face

話咁快就 2013年，如果你仲未試過 4G手機嘅極速快感，再換新機的話，冇理由仲停留喺 3G，甚至 2G龜速嘛？ HTC剛到港新機 One SV，有齊 1800同 2600MHz兩個 4G頻譜，訊號接收更闊之餘，最高更有 100Mbps下載同 50Mbps上載速度。想多啲選擇的話，仲有連 BoA、少女時代、 MissA等韓星都潮撐嘅韓系水機 SKY A850。同期更有首個專為 Android機而設嘅 docking，一機一 deck都唔使$4,400，比 iPhone 5同 GALAXY Note II LTE等 4G機平一大截！

互動片段

速試 4G

Spec.

作業系統： Android 4.0
處理器： Snapdragon S4 1.2GHz雙核心、 1GB RAM
制式： LTE、 3.5G、 GSM
屏幕： 4.3" 800× 480
鏡頭： 500萬像素
記憶：內置 8GB、最高 32GB microSD
體積： 128× 66.9× 9.2mm
重量： 122g
售價：$3,888
查詢： HTC（ 3520 1234）

平機交足貨

雖然行抵玩路線，不過呢部 HTC One SV規格都算見得人。好似 4G機最怕食電， One SV就跟粒 1,800mAh可拆式電池，電量比 iPhone 5多之外亦方便 user換電。而且用得 4G機，實係無時無刻 download一大堆 app同片。呢部機內置 8GB記憶體之餘，仲可以插 microSD咭，冇咁易塞爆部機。不過相機就得 500萬像素，好在都有 F2.0大光圈、 28mm廣角、 1080p高清拍片。以$4,000有找嘅 4G機而言，都算交足功課。

之前 HTC幾部 One系都被人狂鬧冇得換電同插記憶咭，今次 One SV終於加番。

HTC One SV個芒只係比 iPhone 5大 0.3吋，但拍埋去比厚度，竟然輸成條街！

試速度
想感受 4G速度，即上 YouTube睇 INFINITE嘅高清 MV〈 The Chaser〉，幾乎一 click就 load，完全唔窒，正！

試聲
HTC播歌介面有 Sound Hound分唇，想搵首歌嘅詳細資料，一 click就有。

試相
只得 500萬像素鏡頭，但相片質素完全唔覺跌呢，輕易造出淺景深效果，顏色亦夠 sharp。

Android專用 docking LOTS STON

換咗 4G手機下載歌曲更快手，可惜 Android用家一直對 iPhone有 docking聽歌得個恨字！好在最近終於有呢隻專為 Android機而設嘅 LOTS STON，佢設有 microUSB插頭，一插就可以播歌充電。
用落最好笑係 Android機實在有太多 brand，制式唔劃一，好似 Sony機個 microUSB頭設喺機頂，而 HTC機個插頭就前後調轉，插上去即變機背朝天！皆因 LOTS STON設計時擺明係為最好賣嘅 Samsung機而設，所以插佢就最 fit。好彩廠商都算醒目，識加番個 AUX插頭，乜機都十卜。試聽效果，機仔細細都算夠力，話晒內置 2組 1W單元，比手機內置 speaker明顯有立體感得多。

售價：$368
查詢： LRT（ 2395 3913）

插部機上 docking，手機介面即時唔同晒，方便播歌。

機座背面有 AUX插頭，就算 docking唔啱位，搵條 3.5mm線駁番部機，一樣可以播歌。

插部 HTC上去，由於個 microUSB頭同插頭位前後調轉，搞到機背朝天好搞笑。

平玩韓系 4G旗艦 SKY VEGA R3 A850

若學高登仔問：「如何買平 4G機而不失霸氣？」答案肯定係買韓系水機！因為去到頂班 4G機嘅範疇，其他國家水機就算再平，價位仍唔算好低，唯獨韓系機性價比特別高，可用中階機嘅價錢，玩到旗艦級嘅機款，唔使將貨就價！尤其係韓國第 3大手機廠 SKY（ Pantech）嘅年度機王 A850，近排仲跌價到$4,000樓下，唔怪得無論先達定網上都勁多人話要買！

Spec.

機背有三角細紋防跣手，而且背蓋可以打開插 microSD同換電，不過機身重 169g，較為墜手。

作業系統： Android 4.0.4
處理器： Snapdragon S4 Pro 1.5GHz四核心、 2GB RAM
制式： LTE、 3.5G、 GSM
屏幕： 5.3" 720× 1,280
鏡頭： 1,300萬像素
記憶：內置 16GB、最高 32GB microSD
體積： 144.7× 74.3× 10.25mm
重量： 169g
售價：$3,980
查詢：三禾電氣（ 2374 0618）

頂級規格平$1,200

行貨嚟講，要數現時最勁嘅 4G機，大家可能認為係 Samsung Note II LTE，咁就睇睇 A850嘅規格點拍得住佢？
四核 U加 2GB RAM已近乎係勁機基本條件， Note II同 A850都配備，用落亦都覺 A850有 Note II咁爽。而 Note II仲有個 5.55吋 720x1,280解像度屏幕，雖然 A850個芒得 5.3吋細少少，但解像度就同 Note II同級！ Note II更只有 800萬像素鏡頭，但 A850個鏡頭就達到 1,300萬像素，直頭反超前 Note II添呀！仲要話埋畀大家知， Note II LTE歐美版水機最平都賣$5,180， A850平過佢足足$1,200，同係冇官方保養，我就揀 A850喇！

比較特別嘅功能有呢個畫圖解鎖，喺鎖機畫面只要跟住底部嘅指示畫對應圖案，就能即刻進入短訊、播放器等 app。

SKY仲設計咗個簡潔模式畀人選用，入面只會提供最基本嘅功能， icon亦變到大大粒，方便揸車等時間用機。

試速度
雖然 4G速度係關乎網絡問題，但由於 A850規格勁啲，開 app同處理圖像速度都高啲，所以上 YouTube睇 HD片，感覺比 HTC SV更快！

試相
A850個 1,300萬像素鏡頭有幾正？就係喺昏暗室內試影麥兜，唔只清晰兼冇乜 noise，影像仲細膩到連毛都逐條見到。

試芒
A850係用 Sharp嘅 IPS芒，顏色準過 Samsung AMOLED芒，而且 720x1,280解像度睇呢張花花 wallpaper，都比一般中階芒細緻得多。

功能全部用得番

A850支援 1800MHz嘅 LTE頻譜，雖同 iPhone 5一樣，但就唔似得 iP5咁封鎖某啲 4G台，所以用到晒 SmarTone、 CSL、 3HK同 PCCW四大台嘅 4G。而且批水貨係經韓國網絡商正式解鎖，喺香港用得番所有功能，連早排韓系機收發唔到 SMS嘅問題都解決咗。

韓星真心撐　外號 Star Phone

SKY喺香港雖然唔算出名，但呢部 A850喺韓國就絕對巴閉！皆因佢除咗搵嚟天后 BoA做代言人外，更有大堆韓星真心用佢。由少女時代秀英、 MissA嘅秀智、影帝金明敏等都成日拎住佢影相、玩 app， trendy程度直迫當年 iPhone 4，令佢更被韓國人稱為 Star Phone，港人玩平機都可享受埋明星效應！

Eugene、秀智、奇泰英、金明敏、白雅言、朴信惠、金惠秀等一大堆韓星都係用 A850， Star Phone之名絕對不假。

少女時代侑利同允兒，前排用 GALAXY SⅢ四圍 snap，但中間嘅秀英就冇跟風，愛 A850有 1,300萬像素鏡頭。

奴 COMMENT

兩部 4G機都好吸引，我愛 SKY有大芒，但 HTC影相有保證，各有優點。呢個價入 4G合理嘅，不過加入甚麼功能，例如樣貌鎖機或電子消費也不及軟件、 app重要。看看 iPhone 5吧？就算薄咗快咗冇地圖都係俾人鬧！另外希望 4G可以支援多啲地方，有時我部 iPhone 5都會跳去 3G仲滿格數其實冇料到，但相信好快會解決，以後睇片唔使等。