單車球一樣有「十二碼」，如同一隊 2個球員入晒半圓禁區，就要俾人射 4米罰球。

兩個轆專區

踩單車　去踢波　 Cycle Ball

2013年01月02日 ~~ 第1093期交易通．搵車快線

講起單車嘅運動世界，你第一時間可能只會想起公路車、山地車咁，就算係室內單車比賽項目，亦頂多知道有花式單車存在。
不過，單車除咗就咁踩之外，原來仲可以拎嚟踢波咁過癮！如果你覺得現時全民皆 bike嘅時代玩靚車都威唔起，追求更勻踩車法，必 learn！

單車球運動以 2對 2對陣形式進行，上下半場各 7分鐘，留意同一隊伍只可以有一個球員進入半圓禁區。

據香港單車球代表隊教練鄭富慈講，原來單車球早喺 80年代已經引入香港，比賽以隊制形式進行，每隊 2位運動員， 2隊以控制單車為主要技術，做到控球、傳球、搶球等，最終目的係將球射入對方龍門。除此之外，傳統以嚟單車球仲係一項只限男性參加嘅運動，到𠵱家香港仍然冇女子隊，真係極之少見。

源於 30年代

單車球運動源於 30年代德國。

踩單車踢波呢項運動其實叫「單車球」，係一種單車配合球類衍生嘅運動，源於 30年代德國。玩法其實與足球類似，運動員要控制單車嘅運球，然後射向龍門。喺當時，單車球運動所用嘅單車設計非常特別，單車嘅前轆差唔多係後轆四倍咁大，不過其後單車球運動不斷改進，為讓運動員更易操控，單車逐漸演變成前後轆同一比例嘅車形，成為現代款式。

重心全新定位

香港單車球代表隊教練鄭富慈

室內單車一般都係用冇 brake嘅 fixed gear去玩，但除此之外，單車球所用嘅單車亦有專用設計。最明顯嘅分別，單車球單車嘅座位設於後轆之上，目的係將重心移後，方便做一啲起頭動作。而單車嘅手柄亦有別於花式單車，成 Y形向前，令運動員喺控球、射球方面更加靈活自如。齒輪組合採用一比一設計，向前向後、左右跳動都能把持重心。其次係考慮到比賽中經常與對手碰撞，所以車架以全鋁製造，比通常用合金造嘅花式單車更加堅固，售價約$12,000至$18,000不等。
鄭富慈：「因為單車球嘅單車設計特別，香港到現時為止都冇公司有呢方面嘅成車出售，所以我哋好多時都係由外國購買，成本會增加唔少。」

玩法近似足球

知道用咩玩，都要識得點玩嘅。單車球嘅比賽以單車嘅前轆、後轆、身體嚟控球及射球。但若球員腳部着地或者跌下，就要去底線重新出發先可繼續作賽，否則會送咗一個自由球畀對方。而禁區方面，就係指龍門前 2米嘅半圓，區內只限一位防守及一位進攻球員進入，守門員可用雙手擋球。不過如果同一隊伍 2個球員同時進入 2米禁區，將會被罰 4米罰球，情況類似足球嘅十二碼，入球率相當高。其餘界外球、角球等，則與足球賽例相若。

比賽場地於 11× 14米室內場進行。

場內兩側各有一個 2× 2米龍門。

手柄冇剎車系統，成 Y形向前，使運動員能發揮最大動力。

前叉可隨時用六角匙拆開，方便損壞時更換。

車架以全鋁製造，柱位設計特別堅固，能承受比賽時撞擊。

座位設於後轆之上重心較後。

齒輪比為 1比 1，容易把持重心，移動更加靈活自如。

車胎使用與花式單車相同嘅原子胎，能承受高磅數氣壓。

比賽用球重量約 500g，直徑 18cm，以馬毛製造。

基本功主導

講咗咁耐，相信對單車球都有個概念係點玩，不過唔好以為識踩單車就覺得好易上手，筆者自問都有玩開單車，但採訪當日一試，莫講話射門，就連停定平衡都頂唔到 10秒，究竟初哥要由邊方面學起呢？「單車球運動係一項好著重基本功嘅運動，要喺單車上由平衡企穩、彈跳、原地急轉、射門，每個細緻動作都需要反覆而又沉悶咁練習。以新手為例，單係練習平衡都要個幾月時間，若想練習到射門嘅話，耐性係不可或缺嘅條件。」
Paris為單車球訓練班學員，學習單車球只有 1個多月時間，佢認為單車球最大難度在於學習平衡階段。「起初踩上部車連向前行都唔得，練到𠵱家先叫做啱啱平衡到。不過克服咗平衡問題之後，就可以做到好多其他動作，相對容易啲，趣味同滿足感亦大好多，對單車球嘅興趣大增，亦係繼續學嘅原因。」而據鄭富慈教練講，新手練習單車球就有以下 4大步驟。

龍門得 2× 2米，防守時打橫架車連埋個人已經擋住 1/3，但因為踩住單車移動接球唔靈活，個波又細到得 18cm直徑，好容易就會喺「罅」位射入。

Paris為單車球訓練班學員，佢認為起初學習平衡會有難度，但熟習過後興趣大增。

Step 1　平衡

想做好其他動作，就必先要克服平衡。練習方法係上車後重複將重心放喺左右腳踏兩邊，慢慢適應重心轉移，直至可靈活從移動中停頓企穩。

Step 2　控球

練習時運動員需反覆練習用前後轆盤球，不過控球亦係單車球中最難掌握嘅技術，因為技巧變化多端，所以練習之餘仲要多思考。

Step 3　射門

練習射門通常以多球訓練方式進行，運動員需高速轉動前轆，將球射向龍門，以練習準繩度及力度。

Step 4　走位

當雙方控球技術勢均力敵，場內走位即係戰術運用就係唯一打開缺口嘅方法。走位練習通常都係從練習比賽中取得經驗，教練會再加以解釋，將走位進一步優化。

爭取出國與高手較量

徐振濤（左）與麥詠新拍檔多年，多次為香港出征外地。

單車球球員都以參加到世界室內單車錦標賽為最終目標，現時世界賽前幾位嘅國家有瑞士、德國、日本同韓國等，而香港從 1982年開始亦有參加，直至 2012年世界排名已經躍升至第 5位，玩咗單車球差唔多 10年嘅香港代表隊隊員徐振濤表示仍會鍥而不捨。
「起初接觸單車球係由民安隊裏面開始，有一班師兄弟話一齊玩，就開始咗。最初都花咗 1、 2個月先平衡到，直至流暢自如活動，就差唔多用咗 3年幾。玩落之後先會感受到佢另類嘅速度感同刺激嘅節奏，因為你要將部單車控制到好似手手腳腳咁，嗰種滿足感係純踩單車同其他球類活動都畀唔到你嘅！」徐振濤與拍檔麥詠新代表香港出戰多年，可惜佢哋認為香港太少人玩單車球，喺冇競爭嘅環境底下，難有好大進步空間，所以希望能爭取更多出國機會，與世界級高手較量。

保護裝備過分簡單

單車球運動經常出現碰撞，但唔好以為咁，運動員就需要配備全套保護裝備，剛剛相反，運動員落場比賽同隊只需穿着一致嘅服裝，其次只係需要簡單嘅腳 pad同一對高筒鞋即可。其實單車球嘅速度同力量都相當之大，喺採訪當日都有球員因撲救擦傷，雖然對於佢哋嚟講已經當食生菜咁食，但筆者認為做足安全措施絕對可防患於未然，至少都應該戴個頭盔吖！
查詢： 2504 8176(香港單車聯會)

單車球最重要指定裝備係一對高筒球鞋，以防扭傷。