Nokia C6 平玩雙料操控 @ 娛樂八掛大放送★

尋日係iPhone 4行貨推出的大日子，唔少手機廠都避席唔出新機住，但老大哥Nokia就一於少理，同期推出C6及E5兩部Social Phone。當中又以C6賣點最吸引，事關唔使$3,000就玩到篤芒及QWERTY雙料操控，按幾下就可睇到新聞、天氣、中六學位同駕車資訊，至啱預算有限又心多多嘅用家！

側滑QWERTY手機愈來愈受用戶歡迎，較新的有Nokia N97 mini同Motorola Milestone，只可惜此機款一向定位較高，冇$3,000都咪使旨意玩，因此Nokia突然殺出部平價C6，相信會為對手帶來一定壓力。

雖然C6較N97 mini略為肥大，但女仔拎上手其實剛剛好，加上有黑、白兩色任揀，至啱情侶一人一部。

影相介面都幾簡潔，起碼兩邊選項唔會阻住取景，但冇人臉對焦或一笑即拍，自拍就較為麻煩。

繁簡自動轉換

好多人可能會問，觸屏已經有虛擬鍵盤，仲要實體QWERTY做乜？但其實只要用過5800XM或iPhone，就知道經常打Email或SMS的話，虛擬鍵盤太易打錯字，反而實體QWERTY可減低出錯機會。Nokia C6比N97 mini優勝之處，在於按鍵數量更多、排列更密，而且右方新增方向掣，無論上網還是輸入文字都更具效率。內置輸入法方面，有齊倉頡、速度、注音、五筆及手寫輸入，而且入完繁體後，按個掣就可變簡體字，返大陸公幹一樣啱用。

機側設有microSD卡槽，唔使拆蓋就加到記憶卡。

厚度為16.8mm，以QWERTY機款來說唔算厚。

雖然唔係蔡司鏡，但仍提供500萬像素攝錄及閃光燈，隨拍好夠用！

免費導航軟件

跟N97 mini一樣，C6採用了S60 5.0智能系統，重點在於主介面嗰6塊「腹肌」，最頂端負責更改日程及查詢天氣，中間部分則放新聞資訊及Facebook更新資料，用戶仲可新增其他Widgets或將擺位調來調去，直到啱心水為止。另外，作為Nokia手機，當然唔少得一些自家分唇，例如Nokia Messaging及Ovi Maps等，前者可同時收發10組電郵帳戶，後者則免費提供全球多個國家地圖，為用戶慳番筆買導航軟件嘅使費。

設有4排QWERTY按鍵及方向掣，打字速度比篤芒順暢得多。

主頁有6塊「腹肌」，時間、新聞、Facebook更新及各式Widgets一眼睇晒。

《中五放榜全攻略》幫你搵齊全港中六預科剩餘學額，末代會考生搵學校唔使四圍騰了！

放榜攻略App

為配合新機推出，最近Ovi Store有大量新App下載，C6用戶亦可免費玩。在芸芸新App中，以《中五放榜全攻略》同《車師傅》最實用，前者跟學友社合作，會在中五放榜當日即時提供中六預科、中五重讀等學額資訊，方便莘莘學子搵學校。至於《車師傅》則針對搵食車，網羅全港各汽車店、緊急維修、汽車美容等資訊，進入着數區還可搜尋全港泊車優惠，精明嘅司機大佬一定要裝呀！