娛樂八掛大放送★

生夠五個

一心一意為馬家開枝散葉的黎姿，婚後曾經向身邊友人透露，希望同老公馬廷強生五個小朋友，結婚後，兩公婆立即不設防，但眼見自己明年便滿四十歲，黎姿愈等愈急，婚後半年仍毫無動靜，去年六月，她便聽從老公意思，搵高人改名黎珈而催運生仔，同一時間，又搵生殖科醫生何永超進行人工受孕，務求盡快做媽咪。
「佢兩公婆都好鍾意小朋友，話要生夠五個，有個大家庭會熱鬧啲，所以佢哋選擇人工受孕，依從醫生指示進行胚胎植入，試咗三次就成功，舊年十月知道得咗，兩公婆開心到不得了，今次仲係雙胞胎添，咁就可以一胎生兩個。」黎姿身邊人說。

住院安胎

懷孕初期，黎姿經常作嘔，更一度入住嘉諾撒醫院一星期安胎，待 BB穩定先出院，馬廷強為經常陪住老婆，更減少生意應酬，放工便第一時間趕返家。「佗咗三個幾月，見 BB穩定咗，啲孕婦唔舒服徵狀完全無晒，馬生就安排咗個東京之旅，等黎姿出埠行吓輕鬆啲，無咁緊張。不過因為佗住孖胎，黎姿個肚大得好快，雖然無再作嘔作悶，但經常腰骨唔舒服，依家已經重到一百八十磅。見老婆佗 B咁辛苦，馬生都好心痛，佢好緊張，除咗搵按摩師幫黎姿紓緩腰酸背痛，又請咗四個菲傭、兩個看護，全天候照顧老婆起居出入。」

落手落腳

佗住兩個金笸籮，下個月便生得的黎姿，依然對細佬黎嬰的皮膚護理中心生意親力親為，每星期都例必返一次診所，處理業務。
「間診所係黎嬰同黎姿嘅心血，佢亦堅信細佬假以時日，會完全好番，所以佢對中心嘅運作好着緊，佢仲話將來一定會將診所搞到妥妥當當咁交番俾細佬；所以佢先叫老公投資擴充，就因為皮膚護理中心擴充到七千呎，前排又啱啱請多咗兩個美容醫生助陣，仲係黎姿親自接見啲醫生，佢又會留意住有乜新嘅儀器同親自去搜購，從來唔假手於人。」黎姿身邊人說。

放棄去澳洲

眼見老婆對黎嬰的生意如此賣力，馬廷強亦明白黎姿對細佬的康復進展充滿信心，為表示對黎姿的支持，早前他便花過千萬豪裝蘭心閣寓所，購入腦神經及物理復康儀器，設計了一間設備先進完善的療養房，給康復出院的黎嬰入住。
「 GiGi依家個肚咁大，佢都少咗出街，但依然會不定期返皮膚護理中心，同埋偶然會陪細佬出去外面食嘢，黎姿認為俾多啲鼓勵黎嬰同接觸外界，對佢建立番自信會好有幫助，除咗心理，佢又請物理治療師同語言訓練導師照顧黎嬰，依家細佬講說話已經可以講到句子，面部表情亦控制得好咗，兩姊弟都好堅強，冇放棄過。」黎姿好友說。
有傳黎姿懷的是龍鳳胎後，馬廷強亦一度計劃讓老婆到環境較清靜的澳洲待產。「馬生喺澳洲有好多物業，又有好多親戚，原本都想黎姿喺嗰邊養胎，等生完 BB先返香港，但因為黎姿怕細佬搭長途機唔方便，佢想細佬睇住 BB出世，所以最後都決定留番喺香港生。」知情者說。