娛樂八掛大放送★

地位超然

四大唱片公司因版稅問題跟無綫反面，造就英皇、東亞兩間唱片公司歌手曝光率驚人。外人養唔熟，無綫自肥，旗下親生仔女個個踩界唱埋歌，為了自製天王天后，無綫開「行」馬力，要英皇娛樂幫林峯再於紅館開個唱。
「就算係一線歌手，通常都要隔兩至三年先會再開騷，林峯舊年六月喺紅館做咗一場演唱會，加上佢唔多夠歌，今年又再開真係快咗啲，不過咁，係無綫決定要開，公司只係接 order做嘢，我哋梗係唔想得失無綫！」英皇工作人員說。
不過，因為紅館檔期一早排到密，英皇方面亦無紅館檔期可出讓，為了林峯，無綫竟要一年一度的港姐決賽讓路。
「港姐選舉係無綫每年大騷之一，連六叔邵逸夫亦例必出席，為咗省招牌，呢幾年都會喺紅館舉行，不過今次林峯要開演唱會，紅館檔期又滿晒，無綫咪要港姐讓路，改地點舉行，將紅館七月底個期俾咗林峯，港姐決賽應該轉咗喺邵氏影城搞。可以想像，林峯喺公司地位有幾超然！」一位無綫員工說。
後台夠硬，令林峯更肆無忌憚，近年拍劇經常遲大到，早前跟歐陽震華、楊怡等拍攝新劇，因為他經常遲到缺席，令很多一早搭好的廠景要拆完再搭，浪費人力物力，同劇演員敢怒不敢言，連監製亦要忍氣吞聲。

千依百順

無綫唔理好醜，催谷唱歌水準未穩定的旗下藝人出唱片做埋歌星，但唱片公司為與無綫保持良好關係，仍將就配合。
「簽無綫藝人出碟，同無綫就親上加親，頒獎禮都有感情分加；好似○七年英皇簽林峯，一早都講明會同佢開演唱會，所以就算金曲唔多，舊年林峯一樣可以喺紅館開個唱，之後仲去埋澳門威尼斯人開騷，無綫梗係滿意啦！」
英皇落足力外，跟無綫關係友好的東亞娛樂，對無綫同樣千依百順。
「無綫重開邵氏電影，已經一連開咗兩部戲捧林峯，分別搵阿 Sa同千嬅做女主角，兩個都願意減片酬，今次再幫林峯開演唱會，無綫更加開口要唔同唱片公司嘅千嬅同寶貝仔合唱造勢，聽聞首歌仲會擺喺林峯隻碟度，東亞娛樂呢鋪明益無綫啦！」知情者說。

極速坐正

出身富貴的林峯，其父有「廈門李嘉誠」之稱，與利孝和夫人私交甚篤。甫出道林峯就獲公司瞓身力捧，套套劇擔正，令他火速上位，成為一線小生。

2001年
有傳初出道的林峯拍攝《尋秦記》時屢次遲到，又經常在化妝間與工作人員嬉戲阻遲進度，令另一主角古天樂不滿。

2001年
簽約正東唱片做歌手，可惜歌藝未精唔出得街，出碟唔成。

2002年
出道短短兩年，林峯已被無綫捧為劇集第一男主角，與李彩樺合演《雲海玉弓緣》。