近日股市飄搖，散戶心慌慌，不斷要搵專家指點迷津，其中陸東可以講係散戶心中嘅偶像，皆因以往測市奇準。佢最近接受傳媒訪問，話恒指最壞情況可見萬八，但下半年有機會上返兩萬七，係先苦後甜格局，所以只要捱過今日嘅慘況，未來股市仲好有希望。

佢測市咁叻，但炒股嘅表現又點呢？原來佢離開瑞銀自立門戶，成立對沖基金一年，截至去年十二月底嘅一年回報係百分之十二。睇番同期恒生指數由一萬五千五升到兩萬一，升幅三成六，好多股民如果買咗中資股、細價股，回報隨時有五成甚至一倍。反而香港股神陸東一年只係賺嗰區區十二巴仙，分分鐘好多封佢做偶像嘅師奶，舊年嘅回報都好過佢！

不過，正所謂旺市個個係股神，一言認為唔能夠單以一年半載論成敗，喺近日波動市中，炒股功力先至見真章，我哋不妨等到今年底，再睇睇陸東基金表現再下結論。

事實上，相對於一眾財經名嘴，陸東有自己一套睇法，而且十分清晰，更加唔會好似一般分析員咁，市升話升，市跌又跟跌。一言有時聽到財經名嘴啲言論，確實教人啼笑皆非。

股民往往視財經名嘴為黃大仙，最緊要攞「冧把」。

三十六蚊買入 三十五蚊止蝕

年初有某外資行女名嘴建議投資者：「三十六蚊買入領先RAFI美國（2803），三十五蚊止蝕，另外石油每桶七十三美元入市，目標價八十五美元。」

吓！隻股三十幾蚊，跌一蚊即係跌咗百分之二點七，稍為有投資股票的人都清楚，股市咁波幅，股價一日上落百分之二至三閒閒哋，投資者信佢，咪要頻頻止蝕，長此下去，蝕使費都唔掂。投資專家威廉奧尼爾都話，止蝕點應定在百分之八，如果咁少風險都承受唔到，學乜人炒股票。最搞嘢係股票設止蝕，石油期貨咁高風險就冇畀止蝕位，呢啲係乜投資建議。

又有某基金經理話：「今年恒指會在萬八至兩萬六點上落。」嘩，大哥，你講晒，上落區間成八千點，使乜你去講，牛頭角順嫂隨口講都錯唔到去邊，舊年個市由三月時反彈上升，咁波動的市場，到年底都係升咗八千幾點咋。

至於某某財經大師開班登廣告，引用某學員言論作宣傳：「我參加咗呢個班，結果賺嘅錢較學費高出十幾倍。」哈，睇番財經大師的學費，原來兩百幾三百蚊，即係位學生哥只係賺咗幾千銀，有乜值得炫耀。

名嘴噏得就噏

早前大成糖業（3889）準備喺台灣發行預託證券，每張發行價係高出香港股份價格一倍，當時有專欄作家就話大成糖業抵買，大超值，事關預託證券每張高過正股價咁多，一旦預託證券掛牌，按道理應可推升股價。

事實係咪咁？答案梗唔係喇，位作家似乎仲未搞清楚，大成糖業預託證券發行比例係每份相等於兩股香港股票，換言之預託證券價格並沒有偏離正股價。

最離譜有次，約莫一個月前，希臘危機逐漸湧現，有名嘴喺電視拍心口話一定冇事，你估理據係乜？佢話：「希臘有幾千年歷史，點會破產，如果係嘅，神話都破滅喇。」一言簡直畀佢嚇了一跳，佢根本冇分析過問題，所謂理據只係因為希臘歷史悠久，咁嘅財經分析，使乜你去講。若果依佢邏輯，巴比倫應該仲存在喺世上至啱。

大成糖業發預託證券，每張等於兩股正股，專欄作家唔做功課，仲叫人買正股。

大行亦都不外如是

有時又好難怪佢哋，事關有懶惰的股民，才有名嘴的市場。再講，你話名嘴易做又得，難做又得，易做就是佢地隨口噏，冇責任。一旦有人抽後腳，點應付又確實係一門好高深學問，就好似有名嘴年頭先話今年見三萬三點，豈料見大市幾個月冇乜起色，又反晒口，卸晒膊話人哋聽錯，曲解佢意思，仲話佢係講最樂觀。今日嘅我打倒昨日嘅我，咁識轉彎，呢方面真係少啲功力都唔得。

不過，唔好話一般的名嘴，就算係投資大行，都成日錯。啲外資大行分析員、策略師，年薪隨時過千萬，質素都好唔得幾多。好似○九年咁，年初間間大行估大市點衰點差，最樂觀全年都係睇萬七點，結果眼鏡碎一籮籮，後尾馬後炮解釋話全世界放水。嘩！全世界放鬆銀根，○八年底全世界都知，早又唔講，到個市升晒先講。