大肚 林嘉欣 湊女 送老公
【今日我至讚】林嘉欣推住BB女，同老公食飽飽行出嚟，見到記者都笑晒口，真係要讚吓佢哋好有禮貌。
【中環ifc】林嘉欣早前公佈已經為老公袁劍偉懷咗第二胎，預產期喺明年5、6月生個蛇BB。為咗搵奶粉錢老公袁劍偉自然要密密接工作，大前日1點鐘佢充當司機，車咗嘉欣同囡囡去咗中環ifc。
■林嘉欣個女等位期間要起身玩，袁劍偉即刻放佢落地。
袁劍偉泊低架車喺停車場後，先從車尾箱攞咗架BB車出嚟，再從後座接過B女放落BB車，之後嘉欣負責推車，老公就拉住行李一家三口去咗香港機鐵站。袁劍偉拖住行李入閘埋櫃位辦理check in手續，兩母女就喺閘外面等，其間嘉欣不停逗BB女玩，而眼仔睩睩嘅B女似乎對鏡頭好敏感，不時望住記者方向非常可愛。
■林嘉欣個囡囡好精靈，對鏡頭好敏感，果然繼承咗媽咪嘅演藝基因。 第二胎冇壓力
Check in手續搞咗大概5分鐘，跟住一家三口去咗ifc食以日式豬扒聞名嘅銀座梅林餐廳，雖然過咗中環食飯高峯時間，但都要等位。佢哋食完飯離開時，一馬當先行出嚟嘅袁劍偉見到記者即刻有啲怕醜咁行開，留低老婆同記者傾偈，嘉欣笑笑口話：「老公出trip去外地做嘢，兩三日就返，我自己一向都小心亦都冇壓力，第二胎係咪仔都OK。」跟住老公上機鐵去機場，嘉欣就揸番架車返屋企。
採訪、攝影：文國駿、梁繼光、徐錦池
全站熱搜
留言列表
{{ article.title }}
