維他奶創辦人之一陳南昌的孫女陳妙蘭（Christina），一向是廚藝高手，去年更豪揼過百萬開餅店Christina's Creation，以用蔗糖做的cup cake及3D蛋糕聞名。無論是手袋造型，或卡通圖案，皆做得維肖維妙，搞到班富豪好友個個排住隊搵佢整cake，做到無停手。
「我以前都幫襯過出面啲蛋糕，但覺得好難食，又唔靚。直到個仔三歲那年，終於忍唔住要自己親手整生日蛋糕，點知朋友食過都讚好，於是就一直整到依家，至今出自我手的蛋糕已超過一百個。」
明明可以蹺埋雙手做少奶奶，她卻有自唔在，說到底都是為了戥人「糕」興！
煮意
甫踏進中環雲咸街的Christina's Creation，聖誕老人、白雪公主、反斗車王等逐一映入眼簾，大人、小孩見到都咧嘴而笑。
眼前造型可愛的蛋糕，全是老闆娘陳妙蘭跟住卡通人物的照片，再加上創意的精心傑作。造型神似，只因她自細已是畫畫及雕塑高手。
「我九歲就學人像素描，十歲已在大會堂開書法展覽，之後又學過水彩畫同油畫。中學時家政堂老師叫我用肥皂雕一條魚，我攞全班最高分。」
陳妙蘭並無跟過名師學廚，廚藝可說是無師自通。「小時候，屋企每星期都叫到會，福臨門、醉瓊樓的廚師輪流來我家花園煮菜，我好鍾意企側邊睇，好快就學識整炸鮮奶。二年班，我更自創了一個『太陽出來了』炒飯，其實即係茄汁炒火腿蛋飯。」
婚後，她更成了一家之「煮」，周一至周日，日日煮不同國家的菜式供兒子品嘗。「星期二煮意大利菜，星期三煮牛扒，星期五就煮中餐，總之日日唔同款。我屋企個廚房好似酒樓的廚房咁大，老公每次請客，我都係一手搞掂十幾人的菜。」
陳妙蘭左手挽着真實版Hermés Birkin，右手拎着3D版手袋蛋糕，像真度極高。
女人的最愛，離不開名袋與高跟鞋，陳美齡早前就送了這個手袋蛋糕賀母生日。
鬼妹性格的李玟，為了給丈夫驚喜，丈夫生日時送了這個約一萬元的裸女蛋糕給他，讓他一次過與四個裸女大被同眠，夠晒香艷。
賭王四太梁安琪今年生日，一班好友送上黃色手袋蛋糕贈興，手袋的鑽石扣是用Swarovski水晶做。
鄭明明上月廿五號生日，好友訂了這個皇冠蛋糕，配合她「美容天后」的身份。
郎朗被稱為鋼琴王子，這個鋼琴蛋糕與他襯到絕。
全站熱搜
留言列表
{{ article.title }}
