Phoebe（左）與 Stephen一同在廢車場將倉狗帶上車運走，接受絕育手術，狗籠後狗群緊緊跟着送別。

壹些事壹些情

絕育敢死隊

2012年12月20日 ~~ 第1189期香港《壹周刊》

一個下着細雨、微寒的早晨， Phoebe、 Jessie和 Stephen駕着殘舊的麵包車，帶着狗籠、狗糧和簡單的醫療用具，到元朗偏僻的回收場探望
他們的動物朋友。「十幾歲時，屋企樓下有個地盤有好多狗，我去餵佢哋，點知餵餵吓愈來愈多狗，所以我自己搵愛護動物協會流動絕育車，同啲狗絕育；我又識一個元朗嘅倉主，幫佢啲狗做完，就一路掃附近啲倉，舊年再發展到同 Jessie、 Stephen成立『動物朋友』。」廿多歲的 Phoebe說。
他們自稱動物朋友，其實是滿身油污，沒人愛也沒人理的倉狗忠實朋友。

這回收場的八隻狗都接受了絕育手術，看來像兇巴巴的流浪狗，實際上溫馴怕人。

每逢週六、日，各有工作的三人都風雨不改，趁工餘時間出車主動「巡倉」，經主人同意後接走有需要的狗，提供免費絕育，再送回主人身邊。「其實我哋到而家已經做咗四百隻，名單上排緊隊嘅都有過百隻，怕做唔切所以個個星期都出動，今日都算好，夏天真係好熱！」 Jessie口中噴着霧氣說。

瞓身捉狗
無功而還

Jessie爬入鐵籠想捉走唐狗女， Phoebe在一旁打開自家狗籠準備。

兩女合力將狗女放進狗籠準備帶走。

狗主忽然改變主意放走狗女，拒絕讓兩女帶走。

兩女為此大感奇怪，擔心下次到訪時狗女已生下一群狗仔。

污糟狗朋友

經過多條蜿蜒小路，麵包車停在一個回收場外，門前站着七隻大唐狗，牠們腳踏微濕的油污地，排成一線遠遠地凝視門外的人。其中一隻本為白色，但已被污水洗刷成黃色的大狗率先叫吠，更衝向我們，身旁的 Phoebe卻已迎了上去將牠擁入懷中，肉緊地說：「 Mimi！你點呀？肥咗喎！」其他狗亦搖着尾巴簇擁着， Jessie亦隨即加入熱鬧的歡迎儀式。

絕育保平安

「佢哋做晒絕育，啲『男仔』就唔會再通山走打交爭女，無咁嘈無咁惡，對附近的滋擾會少好多；女嘅唔使不停生仔，就唔會再有咁多狗走來走去，少啲人投訴，唔使俾漁記（漁護署）捉。」獸醫顧問 Stephen在一旁解釋，在兩女情緒激動的時候，他有着獸醫的冷靜，為狗隻檢查身體；需要擔擔抬抬的時候，則有男子漢的手瓜：「搬狗上車落車需要男仔幫手，但同倉主傾叫佢俾啲狗我哋做絕育，絕對係女仔方便好多，通常佢哋兩個女仔去傾掂咗，我先會去檢查隻狗係咪可以做手術，再帶返去診所幫佢做。」
果然，同日中午 Phoebe隻身走進陌生車場，向素未謀面的車場老闆提出要「閹你啲狗」，更要即日車走，「一輪嘴」講完絕育的好處、手術及運送安排，老闆停了半秒就說：「好呀！你想帶邊幾隻走？」隨即便幫忙捉狗，這類主人原來不少。
「啲狗其實好怕人，得把聲，有嘢食就會過來，我哋捉狗無受過訓練，都無咩點俾佢哋咬到。」 Stephen仍然一派冷靜口吻，一邊搬着狗籠上車，兩、三個狗籠已塞滿麵包車。

接走狗隻後，會帶牠們到獸醫診所絕育，每次手術約一千元。

每次探訪他們都會帶備簡單醫療用具，檢查狗隻健康狀況。

怕出名

麵包車旁， Jessie一邊倒掉一泡大得驚人的狗尿，一邊如數家珍：「我哋架車呀、狗籠呀其他雜費都係自己俾，我哋太細無人識，得個 Facebook戶口，又好少搞籌款，無大 funding，每次絕育要成千蚊，真係僅僅夠。」
那為何不多作宣傳，吸引更多捐款？「太多人搵我哋真係做唔切，其實好掙扎……想幫嘅好多，但係我哋得三個人，我哋主動去巡倉去傾，有啲狗主真係俾唔起錢，所以先會絕育同運送都盡量免費……我哋基本上只做倉狗，唔會做屋企嘅寵物狗，咁先可以對捐款人負責。」

責任

不論狗朋友有多大多髒， Phoebe還是喜歡喊牠們「傻豬」，身旁的狗主亦受感染，頻頻讚倉狗夠「黐家」又乖仔。

願意貼錢做好事，有時卻會熱臉碰上冷屁股。 Jessie無奈道：「有啲人會兇我哋，明明自己可以帶隻狗去絕育，都同我哋講『你哋唔嚟我就由得隻狗自生自滅，我丟佢出街』，但我哋係好清晰，呢個唔係我哋責任，我哋一定會仔細篩選 case先去做。」
這天他們接到電話再到另一個回收場，為一隻生病的黑色唐狗檢查身體， Stephen替牠檢查開藥後，建議可帶走關在同一鐵籠內的唐狗女絕育，狗主亦同意。但兩女將狗女放入籠後，狗主又改變主意，硬將狗女放回鐵籠，要求他們替後山的狗先絕育，於是 Stephen帶着狗籠跟上去，走過山墳，甚至見到三隻小黑羊，就是沒有狗。
兩女不肯放棄，又費盡唇舌落力游說狗主交出唐狗女，在舊雪櫃、破電視和鐵油桶之間來回穿梭，狗女抱起又放低，狗主仍只一句「唔得」便拒絕。「佢呢度幾隻狗都係我哋幫佢做（絕育），我真係唔知點解！」 Phoebe皺着眉：「下次再嚟呢兩隻實會生一竇出嚟！」
惟獨是 Stephen依然冷靜：「我哋慣㗎啦，做得幾多得幾多啦。」然後收拾行裝，又向下一個回收場出發。