今年娛圈喜事多，多位中女趕嫁，又有多位女星懷龍B。雖然未必個個好似李玟有個1.5億超豪婚禮，好似莫文蔚、梁詠琪都有個越洋豪華婚宴，連剛出嫁嘅「長腳蟹」呂慧儀都唔執輸，舉行百萬「森林婚宴」。
29歲的呂慧儀（Koni）與33歲的前港男、現任職健身教練的黄文迪（Dickson）於上週二（13日）假會展筵開28席，當日新娘好要面，狂晒百萬鑽飾，強調婚禮由新郎一手打點兼出晒錢，但據知一直俾外間指搵錢少過長腳蟹嘅Dickson，表面話婚禮使費一力承擔，但其實幕後多得有個富婆契媽陳君宜（Qinnie）出錢義助，贊助禮餅同酒席，契女長腳蟹先嫁得咁風光！

 
06年港姐季軍呂慧儀同08年落選港男黄文迪拍拖十年，相識於model年代，Dickson自落選港男後，一直未得無綫重用，年前更索性離開TVB，改做私人教練和營養師，自力更生。上月尾，呂慧儀突然在微博晒婚照宣布婚訊，即引來「奉子成婚」傳聞。

隱形婚禮sponsor
長腳蟹與Dickson在會展君爵廳筵開28席，婚前被指嫁窮港男的Koni當晚非常風騷，見記者不時晒身上合共20卡鑽飾和鑽戒，仲話：「呢套鑽飾成20卡，加埋其他三套鑽飾，價值過7位數！全係Dickson送畀我嘅，愛巢都係老公嘅。」但據知今次婚禮，由旅行影結婚相，花車、禮服至場地布置等均獲贊助慳番唔少，其中更由呂慧儀契媽兼同樣model出身，已升為億萬闊太嘅陳君宜（Qinnie）出錢贊助。

契媽：幫到手咪幫囉
只大呂慧儀4年的陳君宜，與長腳蟹識於微時，近年嫁了給前玩具城老闆鄭躬明，變身闊太後，與呂慧儀仍然「好姊妹」，呂更暱稱她為「契媽」。本刊上週五（16日）致電陳君宜（Qinnie），問有關贊助契女婚禮一事，佢直認說：「有！有啲禮券同禮餅囉，仲有贊助部分酒席（幾多圍？）幾圍啫，我哋係識咗10年嘅好姊妹，（點解Koni會叫你做契媽？）佢選港姐時，係我老公（鄭躬明）做提名人，Koni得第3名後就叫我老公做契爺，我做契媽，今次佢結婚嘅榮華禮餅和回禮，加埋我公司幾百份禮券，都有成六位數字，連埋一封五位數大利是，幫到咪幫囉，都係一份心意啫！」

 
不過事隔幾日，本刊週一（19 日）再致電Qinnie，她就轉晒口風，幫晒契女講好說話：「當晚啲酒席都係Dickson自己畀晒，我有提議話sponsor佢禮餅，Dickson都一口拒絕話自己搞掂。啲coupon係我公司嘅，我當宣傳吓啫。」契媽為人為到底，反口覆舌都制，真係唔話得。呂慧儀同Dickson愛情長跑一直未被睇好，外間一直認為女尊男卑，直至二人公開婚訊，Koni被認定窮嫁Dickson，死要面Koni不斷死撐，連婚後亮相好友阿感（黎國輝）主持嘅《范後感》都不斷晒幸福撐老公，Koni話：「佢嘅活潑係我獨家，唔好諗住同我爭。」又晒求婚甜蜜：「嗰日喺屋企食完餐飯，佢問我食唔食雪糕，原來佢將隻戒指放喺雪糕上，低能㗎！好爆囉！不過sweet嘅。」

「唔介意搵得少過我！」
週一，新婚幾日就搏命搵錢嘅呂慧儀返無綫開拍《女警愛作戰》，對於死要面充大頭鬼婚禮一事，明顯有備而來：「成個婚禮，都係我老公一手包辦，冇任何sponsor，我唔會食唔飽、着唔暖，又有屋企，只需要帶個人嫁過去就得。Dickson一 開始知道我唔鍾意搵人贊助自己嘅婚禮，所以冇搵。（婚禮用幾多錢？）我真係唔知！總之我一蚊都冇出過。（契媽贊助禮餅同酒席喎！）餅係自己畀嘅，派coupon係畀個位Qinnie宣傳吓（婚紗呢？老公搵幾多？）咁我真係唔知，就算佢搵得少過我都唔介意，何況我分分鐘搵得少過佢呢。」呂慧儀撐到底，呢位賢妻抵娶啦！而至截稿前，Dickson的電話一直長響，轉駁至留言未有回應。

契媽出錢出力
契媽陳君宜雖然已為人妻，呂慧儀新婚當日（13日）依然做姊妹幫足全場；出力之餘，更出錢贊助禮餅及小禮物、又借出Bentley名車畀「契友」做花車。Qinnie話：「我識咗佢（呂慧儀）十年，冇乜計啦！贊助咗禮餅同coupon，又可以幫我公司宣傳吓。我仲贊助咗佢幾圍酒席，大家咁老友咪幫吓手囉。」認真唔話得。

微博認贊助
呂慧儀得契媽Qinnie的網上購物網站公司贊助coupon及禮餅，曾喺微博公開多謝契媽。

契媽贊助約33萬
禮餅400盒 X $500= 20萬 Baccarat相架300個 X $100= 3萬婚宴酒席5圍 X $9,299= $46,495 5萬大利是

護夫語錄

契爺身家逾5億
今年33歲，5呎8吋高的陳君宜（Qinnie）曾於理大讀時裝設計，畢業後投身model界，認識同期入行的呂慧儀和徐子淇。03年陳與大她21年的前玩具城老闆鄭躬明拍拖，二人同居於過萬呎的富豪海灣董事屋，今年以億元放售，繼而進駐半山獨立屋。專炒樓的鄭躬明，04年曾一炮過以1億購入20個嘉亨灣單位，加埋其他物業，估計身家逾5億。06年，呂慧儀選港姐的提名人就是Qinnie男友鄭躬明，她獲選季軍後便稱呼鄭做契爺Qinnie做契媽。呂慧儀經常到Qinnie的豪宅和遊艇玩，不過Qinnie就話連呂慧儀屋企喺邊都唔知，唔係啩？

贊助變被請
本刊上週五中午首次致電Qinnie，佢直認有贊助契女婚禮，但於黄昏時其公司微博突然上載一幅契爺鄭躬明（中）多謝Dickson請傳媒朋友食嫁女餅嘅留言，及至週一Qinnie亦離奇改口風，話自己冇贊助契女，明顯硬撐契女婿。

老公扮熊遇溺
33歲黄文迪（Dickson），畢業於香港警察學校，身形健碩嘅佢其後成為模特兒，於08年由女友呂慧儀提名參選港男，惜三甲不入，其後簽約無綫，一直被投閒置散，曾參與節目「大咕窿」中扮巨熊，其中一集與鄭欣宜玩大咕窿時，他身穿巨熊衫浸入水中，差點遇溺，其後佢亦漸漸淡出幕前，轉當私人健身教練和營養師。

迷幻長腳蟹
呂慧儀06年奪得港姐季軍入行，但曾有蒲友向本刊爆料，指呂慧儀入行前其實是屯門迷幻妹，喜歡參加rave party、同男仔攬頭攬頸。不過入行後呂慧儀已修心養性，努力拍劇同做主持，終於靠「謎女郎」和「長腳蟹」起朵，現時擁有屯門海翠花園和龍門居兩個物業，另有報道指她在屯門豐景園和佐敦道都有物業，合共市值約1千萬。 07年有蒲友向本刊供相（左圖），指03年、22歲未變索的呂慧儀曾參加九龍灣一迷幻派對的照片，當時呂慧儀解釋：「冇呀，有朋友幫個party做宣傳，佢請我咪去囉。」 ####


同佢一齊係好無憂！真實對白
呂慧儀與Dickson結束愛情長跑，雖然老公賺錢能力被質疑，但長腳蟹一於撐到底，晒鑽飾證老公有米。


10年好友呂慧儀（左）10年前做model時，與當時同為Elite model嘅陳君宜（右）成好友，就算好友做咗億萬闊太，感情都有增無減。《蘋果日報》圖片


唱歌冧老婆 Dickson上週二娶得愛妻，不惜在記者前清唱自創情歌晒恩愛，「就讓我對你對你……我愛你love you……」氹到Koni鬼咁開心。


富貴娘家其中一個物業屯門龍門居是呂慧儀父母住所，呂慧儀常返娘家探望父母，極為孝順。


我唔會食唔飽、着唔暖！真實對白
19/12死撐買婚紗：係人都知設計師Alex Lam同呂慧儀合作無間，Alex Lam的婚紗公司微博亦不斷賣廣告話替Koni搞婚紗，但她死撐：「都冇sponsor我，我係識Alex，但Dickson自己去搵Alex搞婚紗，Alex根本唔識Dickson，冇sponsor㗎！」


小小心意啦！真實對白
陳君宜在婚禮當日擔任姊妹非常落力，向傳媒大派自己公司嘅coupon。


回禮3萬回禮的Baccarat相架亦由Qinnie出錢，300份約共3萬元。


禮餅20萬 Qinnie贊助了400盒禮餅及禮券給賓客和記者，每份約值$500，合共成20萬。


包花車 Qinnie又借出以其公司「ZEUZ」（倩型時尚有限公司）做車牌嘅400萬Bentley房車給呂慧儀做花車，而當日在會展君爵廳的28圍酒席共26萬，部分亦由Qinnie贊助。


包婚紗呂慧儀早前赴泰國影婚紗相，亦是由Alex Lam的婚紗店包酒店和機票。


呂慧儀的婚紗則由另一老友Alex Lam（紅圈）贊助，Alex是婚紗店Monique Co Wedding老闆，周日（18日）呂慧儀更到會展的婚紗展撐場，即日將照片放上微博給力。


（千萬豪宅）係我屋企人㗎！愛巢係佢（老公）嘅！


（見記者晒鑽飾）呢套頸鏈、鑽戒成20卡。


婚禮加4套首飾；加埋成百萬都係老公畀。


2人去年6月結婚，鄭即打本過千萬畀老婆在中環搞時裝店Ballet，又在今年10月中開設購物網站ZEUZ。《蘋果日報》圖片


Qinnie一直係千億新抱徐子淇密友。


於09年4月時Dickson扮巨熊與欣宜玩大咕窿。《蘋果日報》圖片


巨熊Dickson跌落水後，過了約30秒才有救生員救上來。《蘋果日報》圖片


08年參選港男時，身形fit爆，可惜三甲不入。《蘋果日報》圖片


未參選前，Dickson已是資深模特兒，曾拍下激凸內褲相，高峰期據悉月入數萬。《蘋果日報》圖片

arrow
arrow
    文章標籤
    dickson koni 酒席 alex sponsor 本刊 老公 coupon lam model
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stinglife 發表在 痞客邦 留言(0) 人氣()

    E-mail轉寄