生蠔款式多達 8款，有最大路 Coffin Bay，更有先鹹後甜的 Normandy，好少 buffet都食得咁精。

潮𡃁便當

聖誕 Buffet Go Go Go!

2012年12月05日 ~~ 第289期 Face

望吓月曆，又到 12月，普天同慶的聖誕節，自然要聚埋食餐好又勁，今期帶大家 check in幾個聖誕 buffet，無論男女朋友、大班朋友、一家老幼，都可以齊齊慶祝啦！

8款生蠔任食

一向以 cook to order即叫即整作為自助餐概念的 Mr.Steak Buffet a la minute，聖誕以夢幻王國作為主題，提供多達 30款甜品，包括炒雪糕、朱古力噴泉、栗子蛋糕、心太軟、手捲棉花糖等，當中最特別莫過於一款 3D Barbie蛋糕， Barbie裙襬以忌廉人手打造，有多種顏色，食得又影得！除了甜品，自助餐提供四大王牌主打：生蠔、皇帝蟹腳、鵝肝以及和牛，當中生蠔款式更多達 8款，來自法國、蘇格蘭、澳洲及南非等地，無限量供應。 4大主打以外，更有多達 10款刺身，例如帶子、甜蝦、赤貝、三文魚等，菜式夠晒多元化！

鐵板煎鵝肝：貫徹 cook to order作風，鵝肝即叫即煎，有效收緊肉汁，入口外脆內軟，肥美甘香，伴埋多士一齊食，味道就更加平衡。

冰島皇帝蟹腳：自助餐的蟹腳堆到成座山咁高，唔好誤會只係得個擺字，真係任拎㗎！

3D Barbie蛋糕：裙襬以人手打造，有多種顏色及口味，如士多啤梨、芒果、青蘋果等，睇見都唔捨得食！

京葱雪花和牛：選用澳洲和牛肉眼部位，肉身腍軟，肉汁豐富。

蜜桃龍蝦路易斯沙律：小小沙律，都用上大龍蝦鉗，啖啖肉，配埋香芒，更鮮甜。

Mr. Steak助理經理
鄭偉迪
以 Sweet Wonderland做主題，我哋自然推介 3D Barbie蛋糕，另外我哋會向每位入座客人即時奉上半客波士頓鐵板龍蝦。

日期、價錢及時段：
24/12及 25/12
首輪 6pm-8pm　成人$528、小童$338
次輪 8:45-11pm　成人$598、小童$398
特別優惠：凡入座即時奉上半客波士頓鐵板龍蝦。
Mr. Steak Buffet a la minute
地址：銅鑼灣百德新街 2-20號恒隆中心 3樓 T03號鋪
電話： 2881 5757

阿童木手繪蛋糕

黃金海岸酒店今個聖誕與日本品牌 Tezuka Moderno首度聯手，推出「 Tezuka Moderno阿童木．飛躍溫馨綠聖誕」活動，為經典動畫主角阿童木、小蘭、怪醫秦博士和藍寶石王子等重新設計形象，除了入住特定住宿計劃可獲阿童木聖誕禮品包，酒店聆渢咖啡廳裏亦應主題於自助餐內提供阿童木造型蛋糕，口味日日不同，蛋糕上面所有阿童木動畫公仔，均由甜品師傅每天花 2-3小時親手繪畫，分外花工夫。另外，咖啡廳最受歡迎的露天位置還提供多道即烤佳餚，例如應節火雞、芝士焗釀蟹蓋及香煎牛柳伴鵝肝醬等，更設 BBQ區域，提供花旗參蟹肉比目魚老火湯、燒琵琶鴨、燒雞翼及燒菠蘿等，寒冬下更見溫暖！

焗釀香烤火雞：不少人都說火雞嚡口，但這裏的火雞就以慢火去烤，加上雞身內釀入栗子、雞肝、香草等材料，汁香肉嫩，進食時更可點金巴利汁或芥末醬同吃。

酒店四周都以阿童木作為裝飾，當中位於大堂、 4呎高的飛天立體小飛俠最顯眼。

自助餐海鮮種類達 10款以上，包括紅蟹、雪花蟹爪、龍蝦、大頭虎蝦、翡翠螺等。

芝士焗釀蟹蓋：將鮮蟹拆肉後，加入 Parmesan及 Mozzarella芝士炒香及焗製，香味濃郁。

阿童木動畫主角造型蛋糕：蛋糕內層包括朱古力松露餅、芝士餅及雜果等口味，而面層忌廉則有薄荷、朱古力咖啡及芒果等味，上面一系列阿童木動畫公仔，都是甜品師傅手繪之作！

黃金海岸聆渢咖啡廳
初級助理總廚　周永輝
火雞唔係一開始就咁燒，會先鋪上煙肉，將煙肉的香味及油分完全滲入雞隻表面，再用溫火慢慢燒。

日期、價錢及時段：
24/12
首輪 5:30pm-8pm及次輪 8:30-10:30pm
成人$728、小童$458
25/12
首輪 5:30pm-8pm及次輪 8:30-10:30pm
成人$698、小童$528
　
特別優惠：
•凡入座每位成人奉送大閘蟹一隻。
• 12月 14日前預訂及繳付全數享 8折。
聆渢咖啡廳
地址：屯門青山公路 1號黃金海岸酒店地下大堂
電話： 2452 8355

中西合璧滷水鵝肝

城景國際向在特定主題中尋求多變見稱，聖誕主題「鵝肝•黑松露•海鮮自助晚餐」，就在坊間常見煎鵝肝的基礎上，再推出以中式方法烹調的滷水鵝肝、用熱湯將鵝肝生撞的鵝肝忌廉湯、把鵝肝當果醬的夾牛柳以及鵝肝連蛋一齊去燉的法式燉蛋，花款多多。除了主題菜式，自助餐更提供現場烤肉、任食美國生蠔、長腳蟹、法國黃金螺及即切刺身等，實有一款啱心水！

鵝盰威靈頓牛柳：將牛柳醃製後，於酥皮上逐層放上火腿、鵝肝茸及牛柳，皮脆肉嫩。

滷鵝肝配黑車厘子凍：結合中西烹調方法，將鵝肝以滷水汁入味，另一方面則加入以酒浸過的黑車厘子果凍，酸酸甜甜，好鬼醒胃！

黑松露鵝肝汁焗大扇貝：以黑松露和鵝肝炮製出秘製醬汁，再淋上帶子焗香，巧妙令黑松露香和鵝肝汁融入帶子鮮甜中。

煎鵝肝配黑毛豬風乾火腿多士：甘香且外脆內軟的鵝肝，配搭同樣油香十足的黑毛豬火腿和多士一起吃，絕配！

聖誕野草莓甜品精選：甜品以野莓為主題，當中以野草莓芝士餅最好食，唔會太甜，食多多都得！

城景國際 City Cafe
行政總廚　楊啟明
推介滷水鵝肝，因為用咗中西兩種烹調方法，雖然鹹鹹甜甜咁，不過口味其實好夾，試過就知。

日期、價錢及時段：
24/12及 25/12　 6pm-9pm　成人$548、長者$498、小童$438
特別優惠：
• facebook fans下載優惠券並於 12月 14日前購買餐券及親身前往酒店付款可享優惠，成人$438、長者$398及小童$308。
•凡入座送黑松露鵝肝汁焗大扇貝一客。（ http://www.facebook.com/thecityviewhk）
City Cafe
地址：香港九龍窩打老道 23號城景國際 1樓（油麻地港鐵站 A2出口）
電話： 2783 3287

有機自助餐
無限任食龍蝦

九龍富豪酒店今個聖誕以綠色聖誕為主題，將「有機」概念融入美食之中，自助餐沙律吧提供 20款有機食材如番茄、生菜、粟米等，更會配上有機醬汁：羅勒汁、辣椒汁、香茅汁及意大利香草醋汁。菜式方面，自助餐提供日本珍寶帶子，以成分天然的喜馬拉雅山火山鹽燒製，保留帶子鮮味之餘，貫徹健康宗旨。別以為走綠色路線，自助餐就冇咩好食，當中亦有即煎鵝肝及芝士焗龍蝦，龍蝦更是全天候供應，跟平時自助餐只送一隻半隻不同，食幾隻就維番皮！

龍蝦米多：選用味道較淡的 Parmesan芝士，著重帶出龍蝦鮮味。

聖誕樹頭餅：聖誕節自不然要有個樹頭蛋糕應吓節，入口軟綿綿，朱古力味仲好濃郁！

香辣九層塔炒花蛤：辣椒及九層塔均是酒店自家種植，加上花蛤肉身肥美，食落啖啖肉。

火山鹽燒珍寶帶子：採用日本刺身大帶子，只簡單以火山鹽烹調，著重帶出帶子鮮味。

香煎鵝肝配秘製蘋果醬：鵝肝配上青蘋果茸就有效中和油分，再加入砵酒汁及醋製成的醬汁，更醒胃。

富豪九龍雅廊咖啡室行政總廚
林志榮
推介大家有機沙律，其次是珍寶帶子，特別用喜馬拉雅山火山鹽燒製，絕對天然。

日期、價錢及時段：
24/12
首輪： 6pm-8pm　成人$658、小童$428
次輪： 8:30-10:30　成人$738、小童$428
25/12
首輪： 6pm-8pm　成人$618、小童$398
次輪： 8:30-10:30　成人$678、小童$468
特別優惠：• facebook fans下載優惠券並於 12月 10日前購買餐券及親身前往酒店大堂付款可獲 7折。
• 12月 16日前親往酒店大堂付款獲 85折。（ http://www.facebook.com/regalkowloonhotel）
雅廊咖啡室
地址：尖沙咀麼地道 71號富豪九龍酒店地庫 1樓
電話： 2313 8718