呢個就係海盜阿頭 Vass，性格火爆、殺人成性，就係佢親手槍殺 Jason大佬！最諷刺係遊戲封面竟然係佢做主角，嬲呀！
下：佢先係少年 J

漫遊毒物

少年 J的迷幻漂流 Far Cry 3

2012年12月05日 ~~ 第289期 Face

又到旅行旺季，好哋哋有台日韓唔去， Ubisoft重口味新作《 Far Cry 3》個主角 Jason卻選擇同班老死玩極限運動，仲受風暴影響漂流到神秘孤島，俾瘋狂海盜綁架。
大難不死走得甩嘅少年 J，錯有錯着被土著巫師所救，盡修山寨邪術，學習埋活用迷幻草藥、美女色誘、血腥暴力，目標就係要報復兼走佬！

名稱：《 Far Cry 3》
機種： PS3、 XBox360
類型：動作
人數： 1至 4人
廠商： Ubisoft
售價：初回版$388
　　　（送多款 DLC任務、武器）

重口味五宗罪

記者實試覺得《 Far Cry 3》嘅製作非常紮實，有大量提示、地圖系統幫你打任務，完全唔難入手。而佢嘅 FPS打法亦做得多樣化，單講頭一場 Jason從集中營走佬，開頭玩潛入、後尾就高速狂奔，官能剌激十足。入到正章，熱帶叢林舞台中有大量毒蛇猛獸同海盜等你打，除射擊外仲有動作、求生元素，有時要用刀、斧頭等原始武器生劏敵人。 Dennis仲會教你殺野獸用皮造衫、啪迷幻蘑菇提升能力，聽講後來仲會送啲野性土著囡囡同你玩遊戲，等你血氣高漲，殺人都殺得「近」啲。近期大作《 COD》、《 HALO 4》雖然製作超認真，但傳統軍事、科幻作品，食到太飽真係會厭，一齊睇埋《 Far Cry 3》入面嘅五宗罪，係咪頂得順呢啖重口味山草藥！

迷幻
定時要做任務執山草藥自製回復藥，亦要打獵殺野生生物，劏毛皮造衫造袋。最具爭議性就係搵瘋狂博士拎迷幻蘑菇提升能力，好踩界。

暴力
除咗埋身喺背面用開山刀劏頸放血，島上嘅軍火都比較舊款，多數係 AK47、 Uzi槍等等，不過最暴力都係後來拎到火焰噴射器（仲有限定版送嘅訊號彈槍），可以射到敵人着晒火，燒到變乾屍，好暴力！

殺生
又要讚 Ubisoft連野獸嘅 A.I寫得勁像真，種類亦多。聽講後期會有 DLC打神獸，可以將戰利品做特別武器。雖然話全部係虛構，冇真正殺生。但近日香港全城譴責殺貓狂徒，其實記者玩落都有啲唔忍心。

色情

Jason走佬時執得番自己部單反（成 19個對焦點，一定係貴嘢），可以用人臉對焦功能， scan吓畫面中有冇敵人、野獸（會以紅色 icon表示）。不過記者就喜歡用佢影村姑做龍友！後期有個光頭巫女，仲會脫清光跳土風舞，唔影唔得啦！

貪財
佢 multi-play專玩 CO-OP合作，分單機 2P同連線 4P，故事學《 Lost》玩 flashback回憶，好似第 1版就講 Jason登島前半年， 4個有黑道背景嘅船員，為追殺夾帶私逃嘅船長，追到 Rock Island劫金殺人！

神棍海盜二世祖

呢位就係四眼巫師 Dennis，開頭以為佢幾好人，後來覺得佢只係想借主角引敵人注意，唔係咁理你死活。不過點都好，冇咗佢你乜技能都學唔到，只好聽佢支笛啦!

《 Far Cry 3》故事舞台 Rock Island長期被黑幫控制，奪走土著嘅銀両、物資、美女，主角 Jason卻係首個從集中營成功走甩嘅人，四眼巫師 Dennis認為可以利用阿 J當作旗幟，刺激班村民群起反抗，於是落手落腳訓練 Jason成為超級反擊王，由得佢行先死先。但佢唔知主角其實只係一個碌老豆張黑咭、帶囡囡去迷幻之旅嘅二世祖，全靠佢當兵嘅親哥哥以死相救先走得甩，所以個故事發展應該勁有趣。