雷明輝師傅
詠春年資： 40年
師承：葉問弟子何金銘
演出經驗：《功夫傳奇》、《詠春拳法紀錄片》

今日好玩嘢

詠春一代宗師

2012年12月05日 ~~ 第289期 Face

詠春熱由 08年宇宙最強套甄子丹套《葉問》帶起，系列最後一集《終極一戰》改由黃秋生擔正，雖然煞咗科，但就預計 2013年中先上映。不過，呢個 trend絕對唔會停，事關拍足 10年，由王家衞執導，並由梁朝偉飾演葉問嘅《一代宗師》，終定於明年 1月 8日上畫。兩大影帝都做葉問，必定令詠春熱更盛。
最近佛山就開咗個「詠春堂」，畀你拜師學藝。去完武術之鄉，返香港仲可以學小師妹陳嘉桓同佢師兄周定宇，搵個本地師傅深造，他朝有日你都可能成為一代宗師。

互動片段

學打詠春

上佛山學詠春

除咗電影打詠春，現實入面，搞地產嘅羅康瑞當年都跟葉問徒弟學詠春。作為詠春弟子，佢除咗搵埋師弟雷明輝師傅拍咗套《詠春拳法紀錄片》，仲喺佛山打造嶺南天地，畀套戲取景之餘，更整咗個「詠春堂」，由同門雷師傅打理。
其實十幾廿歲人先學詠春，會唔會太遲？雷師傅話，佢收徒弟要求唔高，最緊要有心學。佢話：「曾經教過個學生，個樣傻吓傻吓，仲鬼咁瘦。但上咗 4堂，已經打到成套套路，仲可以踢樁，真係估唔到！」詠春講求快，唔係蠻力，好似基本套路小念頭咁，係講求動作準確，拿捏到「中線」，做到「快打」就得。

雷師傅即席同弟子對打，真係拳拳到肉，睇到好緊張。

詠春堂除咗有武術味十足嘅中堂，轉個彎仲有呢個古色古香嘅大露台，喺到學武真係靈氣十足。

體驗基本功

成日聽咩中線、日字沖拳同二字拑羊馬，等雷師傅即席教 model示範你睇。

二字拑羊馬

Step 1
收拳置胸部，挺直身體後，雙腳微屈，膝肩要成一直線。

Step 2
雙腳打開約 60度，令腿部出現一個鵝蛋形空間。

Step 3
後足踝再向外打開，令雙腳形狀變成內八字，師傅話感受到身體重心變得集中，腳底受壓平均，而且雙膝無感受到壓力為之正確。

日字沖拳

紮好馬，詠春出拳一樣有型有款，但絕非求其打出去，出拳時要保持盤骨唔郁，更要留意唔好出拳後個身變側。

正面睇，師傅出拳位置喺正整個人中間，準到對正鼻樑位，而另一隻準備出拳嘅手，亦喺正中位置等待，就係詠春拳法的「中線」。

詠春堂

雖然師傅主要駐守佛山，但雷師傅喺澳門同香港都有武館，有心長時間跟師傅學詠春，可以上佢網站睇睇。（ luimingfai.wix.com/vingtsun）

地址：佛山市禪城區天地路嶺南天地旅客服務中心 2樓
查詢： 86-757-8255 2612
前往方法：乘直通巴往佛山市後轉乘的士
體驗班報名方法：關注嶺南天地微博（ http://weibo.com/lingnantiandi），轉發詠春相關嘅微博訊息，就會收到體驗班登記嘅私信。之後致電詠春堂作登記，預約上課時間。
上課時段： 30分鐘
收費：免費
常規詠春班 A（適合初學者）：每月 12堂課，自選時間
上課時段： 90分鐘
收費：人民幣 500（月費）

拜訪葉問堂

上得佛山呢個葉問師傅嘅出生地，點可以唔拜訪一下位於祖廟嘅葉問堂。祖廟位於嶺南天地隔籬，行過去只係 5分鐘。呢個祖廟極之大，成個四合院咁，設計古色古香，原來仲係古蹟嚟，入面有祖廟、孔廟等建築，而葉問堂只係其中 1間屋仔。不過話晒葉問都係近代人物，入去葉問堂時，唔好預期有一堆嚇人古物。作為香港人，更覺得展品熟口熟面，但作為詠春迷，點可以唔去了解吓大師？

堂入面點少得葉問銅像，記得合照。

講起葉問住過嘅地方，資料搜集者好有心咁影晒大廈外觀，好彩葉問係近代人，如果唔係應該拆晒！

較有「古味」嘅展品，就有呢堆葉問用過嘅舊物。

葉問生前嘅合照，全部放到大一大印喺牆上。

佛山祖廟

地址：佛山市祖廟路 21號
開放時間： 8:30am至 7:00pm
入場費：人民幣 20

詠春紅到外國

拍攝當日，記者撞見班外國人參觀葉問堂，原來一行 8人都喺荷蘭一齊學詠春，今次係專程拜訪葉問堂。而白頭叔叔 Gert-Jan（小圖）就係佢哋師傅。師傅話自己當年睇李小龍，覺得詠春好型，於是走去學詠春。佢話外國其實好興呢門功夫，大熱程度更係記者估唔到咁話！

佛山仲有黃飛鴻

黃飛鴻館極之宏偉，而且展品亦比葉問堂多。

唔好忘記，當年李連杰嘅黃飛鴻系列，亦帶起咗「佛山黃飛鴻」熱。唔知係咪因為較早成名，連祖廟入面嘅黃飛鴻館都比較大座。入到去，見到一大片庭園鋪晒軟墊，仲有幾個精壯青年耍槍弄劍。原來佢哋都係黃飛鴻館弟子，仲每日會定時表演。

速食詠春

去完佛山體驗詠春功夫，返香港一樣可以跟師傅繼續學。拜師冼國林嘅同門師兄妹周定宇同陳嘉桓，既係明星又係詠春高手。作為影壇初哥嘅周定宇，仲有 12年詠春經驗，又係連續 4屆世界武術冠軍，今次喺《葉問—終極一戰》，親身上陣之餘亦擔任顧問。
習武多年，周定宇話學詠春係習武最好嘅起點：「學詠春最講求角度同速度變換，出手要擊中點，要求係速度唔係力度。」佢話學最基本嘅套路小念頭，以前都要學足一兩年，不過家個個學武要「速食」，所以都唔似以前。不過詠春勝在動作唔難學，要熟習當中手法，唔需要太耐， 3至 4個月已經略有所成，但要實際應用，就必需再被師傅指點。

陳嘉桓
詠春年資： 3年
師承：葉問之子葉準徒弟，冼國林師傅
演出經驗：《葉問前傳》

周定宇
詠春年資： 12年
師承：葉問之子葉準徒弟，冼國林師傅
演出經驗：《葉問—終極一戰》

女仔學拳好處多

只係學咗 3年詠春嘅 Rose，話自己之前完全冇運動底，雖然初學詠春好多蝦碌事，但家都叫有啲成績，師兄周定宇都猛叫：「佢啲踢功好勁，俾佢踢中真係不得了！」 Rose話自己柔軟度唔高，而且冇乜力度可言，不過全部唔係問題。只係初學耍套路時，經常左右調轉，「成班師兄弟一齊耍，一錯就好明顯，好瘀！」不過學詠春有好多好處，包括醫好寒背問題。「紮馬時，肩膝要成一直線，練得多，寒背問題都冇埋。」佢仲話要減拜拜肉，練出拳就最好。

成日聽嘅黐手，其實就係正式練對打，重點係感受雙方肌肉變動，預計對方出手方式。

Rose即席示範差少少嘅一字馬，證明冇柔軟度，一樣可以學詠春。

打木人樁唔係要打到好大聲，而係要到位， Rose話初頭學都有用錯力，一味死打，結果搞到雙手瘀晒！

拜師有法

香港點搵師傅拜師？可以上 Rose同周定宇都係會員嘅香港詠春聯會網頁，入面有常規課程外，網頁仲會公布唔同嘅短期體驗班，新手必睇。

香港詠春聯會常規課程

主教練：梁定國師傅
時間：每節 90分鐘
日期：每個月第一個星期三開班
地址：香港灣仔天樂里 2-4號金豐商業大廈 20樓
收費：每月$500（非會員）、$400（會員）
網址： http://www.hkwingchununion.org

宅屋自學

想喺屋企練詠春，其實唔難。簡單一條長毛巾，就可以自製木人樁，喺屋企練基本手法。

Step 1　正掌、坐馬
拎條長毛巾綁喺柱上，一手拉住，變成木樁柱。首先當然係紮好馬，然後好似周定宇咁，做個正掌準備動作。除咗擺位要正中，仲記得手肘要向下（沉肘），咪批肘出去呀！

Step 2　膀手、上步
出擊第一步，馬步輕微右轉，令身體更接近對方，然後一個膀手，擋開對方攻擊。

Step 3　轉身、攤手
再一個轉身，馬步又再正向對方，用全身轉力加一個攤手，壓伏對方出手。

Step 4　臘手
然後一個臘手，捉實對方。

Step 5　殺頸手
最後快速轉手，用右手嚟招殺頸手，擊倒對方！