80年代初紅透電玩界《閃電手阿修》（ Fix-It Felix, Jr），由破壞王（左）做奸角專拆屋，之後由主角阿修（右）修補，但今次《無》片玩突破，將奸角破壞王變成主角。

西面

聖誕破壞王

2012年12月05日 ~~ 第289期 Face

仲有 3個禮拜就到聖誕，想開開心心歡度 X'mas，當然唔少得睇番套老少咸宜卡通片啦。
由迪士尼製作的全新 3D動漫《無敵破壞王》，以電子遊戲中的奸角破壞王改邪歸正的故事為中心，搞笑得嚟夠正氣。
戲中還出現多種 80年代經典電子遊戲主角。
識得玩集體回憶橋，實爆啦！

重鎚拆屋
《閃電手阿修》遊戲裏面，破壞王下下重鎚出擊拆屋，但呢份拆屋嘅工作做足 30年，搞到好厭倦。

由迪士尼製作的《無敵破壞王》將於 12月 20日攻打香港聖誕檔期，但此片早於 11月頭已在美國率先上畫，唔少影評好似美國《時代雜誌》都大讚《無》片是本年度最具創意及最富娛樂性的合家歡電影。

洗底闖禍

以往的卡通片大多以忠角擔大旗，但今次《無》片就玩突破，起用經典電子遊戲《閃電手阿修》中嘅奸角破壞王孭飛做主角。故事講 30年來，破壞王一直於遊戲中日日拆屋，大英雄一直冇佢份，卒之搞到佢鬼咁 down。一日，破壞王終決定洗底做英雄，於是闖入唔同電子遊戲，希望可以出人頭地，點知闖出唔少禍！
今次《無》片搵來美國大受歡迎的卡通《阿森一族》導演 Rich Moore操刀，即洗甩晒迪士尼卡通陣童話除，成套戲變得搞笑兼抵死。

食鬼出場
做足 30年衰人，破壞王想洗底轉做英雄人物，於是搵班同樣係電子遊戲中嘅奸角出嚟呻，連 80年代初紅極一時嘅食鬼（中）都話感同身受。

衰大嚿
破壞王辭工唔撈《閃電手阿修》，之後曾去過另外一個遊戲《英雄使命》試工，點知一上戰場，就被人嫌太大嚿阻住晒，叫佢過主。

燒 13億港元

唔好以為套戲冇真人演出，製作成本一定慳唔少，但由於《無》片中出現唔少 80年代經典遊戲角色如食鬼、《甜蜜大冒險》的雲妮露及《英雄使命》的卡爾安隊長等，已需要支付大筆版權費，加上迪士尼堅決以 3D製作，最後成套戲製作費高達 13億港元，簡直係燒銀紙。

最型
戲中最有型角色，一定係遊戲《英雄使命》中嘅隊長卡爾安，負責率領一班未來戰士去對付兇猛太空蟲，而卡爾安亦將帶住破壞王一齊去打怪獸。

最 cute
此戲最得意角色，係賽車遊戲《甜蜜大冒險》嘅雲妮露。一向牙尖嘴利嘅雲妮露最鍾意同破壞王鬥嘴鬧交，煩到破壞王都頂佢唔順，引發唔少笑話。

《無敵破壞王》

上映日期： 12月 20日

星級配音

《無敵破壞王》除原裝英文版外，更有廣東話版，而廣東話版更請來影帝黃秋生同巨肺 G.E.M.一齊配音，認真係星級動漫。

G.E.M.
首次做配音嘅 G.E.M.就負責配雲妮露，佢話牙尖嘴利、周身郁冇時停嘅雲妮露同佢好似，十足度身訂做一樣。

黃秋生
今次黃秋生負責配主角破壞王，佢講笑話：「其實我同破壞王一樣，做奸角都做咗差唔多 30年，都好厭倦，真係感同身受。」