Wii U美版白機賣$3,180，炒價冇黑機咁狼。

漫遊毒物

Wii U美版黑機常缺貨　白機買得過

2012年12月05日 ~~ 第289期 Face

WiiU美版比想像中更快降價，截至 11月 30號，市面嘅白機已由$3,800回落到$3,200，但黑機就賣$4,400（美金原價折合分別為白$2,500、黑$2,900），炒價都企得幾硬，而且成日缺貨，記者就認為唔值得為咗 32GB容量捱貴炒價。

因為 Wii U其實可經 USB插口將遊戲 save同 file移動到硬碟（最高支援 2TB）、手指、 SD咭、 SDHC咭。而且主機內置 RAM其實已經被 firmware食咗近 3、 4GB，就算黑機都唔見得夠用，駁 harddisk只係遲早問題，家吓黑、白機差價足足有$1,200，已經夠買 1隻 1TB外置 HDD（約$600），同補購番《 Nintendo Land》遊戲（不過就冇咗型仔黑色機身、直度主機架、手掣座枱充電架），如果屋企有多出嘅 HDD，慳多 6百夠買多隻 game啦！

實試真係 work

用《 Mario U》試吓經外置硬碟同 USB手指抄資料，移動嘅過程係經由 GamePad子芒操作，唔使開電視，方便你坐定慢慢整理 save，好體貼。發現咗兩個要點，首先， Wii U會將儲蓄媒體 format一次，其後就只能畀 Wii U使用，唔可以兼用於其他電腦；其次，原來 Wii U只限移動（ Transfer）而不設抄寫（ copy），冇得 dub多個 file送畀朋友㗎！不過抄落手指嘅 save，唔使搬返去主機，遊戲都能直接讀取。所以，買白機駁硬碟儲 save，絕對抵過買黑機！

試過用 USB手指、 2.5＂硬碟都 work。

畀 Wii U用嘅硬碟，入面唔可以再裝其他電腦 file。首次用時 Wii U仲會格式化你隻碟，小心洗咗重要 file呀！

File只限 Transfer或 delete，不設 copy，防止將 save一開二。不過記者 test唔到係咪所有 game都可以移動 save，因為過去 Wii有遊戲係不能抄 save。

介面易用過 PS3，唔只可以成隻 game整個 folder抄晒，仲 check到內置 RAM、 USB各餘下幾多容量。

再抄蘋果
年底推出 Wii Mini

個人覺得外形仲有型過 Wii U，但就剔除對應 GameCube遊戲同網絡功能。

任天堂又學 Apple，除咗 Wii U，舊版 Wii會以 Mini平價版見人，定價 99.99美元，約 775港元， 12月 7日發售，暫時限於加拿大發售。 Wii Mini外形搶眼，黑色襯紅邊跟機仲有一對紅色 Wii Remote同 Nunchuk，拍埋一睇， Wii Mini主機只係長身過支手掣少少，非常細部！