我身形似林雪！

漫遊毒物

肥仔宅男加速溝女神

2012年10月17日 ~~ 第282期 Face

輕小說已係近年日本動漫界大勢力，繼早年紅到爆嘅《灼眼之夏娜》同《涼宮春日》後，當今最厲害嘅輕小說首推《加速世界》。輕小說唔少得美圖插畫，一睇女主角一身黑髮 look夠煞食，再睇男主角不得了，草食系宅男做主角見唔少，但又肥又矮似隻豬真係未見過。難得佢諗到條打機變男神絕橋，肥仔入 game即變飛天型男，連女神都要倒追，完全滿足動漫迷妄想。小說爆紅，動漫化之後近排仲出埋 game三線發展，一齊加速睇吓點解佢咁紅。

機種： PSP、 PS3
廠商： NBGI
類型：冒險
遊玩人數： 1人
售價：約$700（ PS3）/約$580（ PSP）

指令格鬥易上手

《加速世界》係日本第 15屆電擊文庫輕小說冠軍作，仲拎咗 2009年「這本輕小說真厲害」年度大賞；講一班擁有 Brain Burst「腦加速」特殊能力嘅少年，進行虛擬格鬥對戰遊戲。由小說變做 game絕對唔難，但奇就奇在隻 game唔係玩動作，係玩 RPG式回合制打法，分配行動點數揀指令打交。遊戲分為日常生活同戰鬥兩部分，平時好似《心跳回憶》咁讀書升能力，同其他角色打好關係，推進劇情後進入戰鬥部分，靜態啲但保證打格鬥唔叻嘅原作 fans都玩得投入，加上大量遊戲原創劇情，追下唔同女角又有泳裝睇， fans必玩。

遊戲有 PS3版同 PSP版，內容係一樣嘅，分別在於 PS3版畫質好好多。兩邊都有限定版附送短篇動畫 DVD。但留意兩版本並無連動， save暫時亦唔共通。

戰鬥有啲似玩猜拳，每個回合可自由分配行動點數予攻擊、防禦、命中、回避四個選項，佢哋之間互相剋制，想勝出除咗靠高 level，令總點數更多之外，都需要靠運氣估吓對手下一步行動。

跟番小說故事，主角們日常仍然係高中生，戰鬥部分以外，幾似戀愛育成遊戲，可以鍛煉自己能力，又可以同其他角色約會增加好感度。

Game版有唔少原作冇嘅新劇情，比如叫肥仔同一班女角去海邊旅行，多玩幾次攻略唔同女生，儲泳裝插畫都有排玩。

加速學懂加速世界

《加速世界》故事發生在未來東京，市民唔使再排隊買 iPhone，人人都可以靠神經裝置「 Neuro-Linker（神經連結裝置）」上網。喺呢個 VR虛疑世界中，仲有一班神秘嘅格鬥遊戲《 Brain Burst》玩家，佢哋可以將腦波加速 1000倍，化身為戰鬥角色「 Burst Linker」進行格鬥對戰。肥仔男主角春雪返學成日俾人恰，但被女主角黑雪姬看中其超人打機天分，邀請佢下載「 Brain Burst」。入到 game之後春雪變身飛天又好打，女主角開場冇耐仲表白愛意倒追肥仔，劇情夠晒爆，加上遊戲堅似 online game，靠對戰儲點升呢買裝備，有愛情又有戰鬥，真係計算精準之神作，難怪 fans勁冧。
故事中有大量比較難懂嘅專用術語，𠵱家就嚟個速成班帶你領會加速魅力。

連結

故事發生喺未來世界，每人條頸都裝有神經連結裝置，用以連線上網以及通訊。戀人同親人仲會飛晒所有防火牆，用最原始駁線有線連接作「肉體接觸」，黑雪姬就係咁樣插入春雪，幫佢安裝 Brain Burst程式。

對戰

Brain Burst虛擬戰鬥中同格鬥遊戲規則相似，有 HP同限時，時限為 1800秒，但喺現實中只係 1.8秒。對戰勝方能奪取對方點數升級，點數用盡會自動反安裝程式退出 BB，用家同時仲會「被洗腦」，完全忘記有關 BB之事情，以防不傳之秘外洩。

Cosplay界大愛　 Coser阿魚：「蝴蝶翼夠華麗」

記者覺得黑雪姬造型 charm point係心口到肚臍嘅真空位置。

Coser都係喜歡美型嘅事物，所以蝴蝶夫人版黑雪姬，喺 8月香港動漫節已經有人扮佢參加比賽。男主角就冇乜人 cos，多數係女主角買隻肥豬公仔抱住就算。又聽吓動漫節以黑雪姬造型參賽嘅點講:「黑雪姬最多人鍾意，性格古怪，唔係好識表達感情。加上華麗蝴蝶翼外形，深受 cosplayer喜愛。另外故仔有好多謎團未解開，大家就陪住男女一角一齊成長，令人忍唔住追看。」

精品篇：一人三角搵真銀

上頁 coser阿魚都話過動漫迷勁 like《加速》造型，而作者川原礫仲食腦地將「 Avatar」（即遊戲內嘅主角替身）概念融入，除現實真身同虛擬戰鬥時用嘅角色之外，仲有一個登入校內網絡用嘅 Avatar，有少少似 Wii遊戲機入面嘅 Mii公仔，每個主角都有 3個 look，由 PVC美少女 figure、 Q版公仔以至 BANDAI機械人模型都出齊，賺到笑。咁多個造型各有精品 figure，以下幾款公認高質必玩。

真身：有田春雪

喺學校經常被欺負嘅肥仔，為人冇自信，連校內 Avatar都係隻長城牌白豬仔（被壞學生惡搞），被黑雪姬意外發現其驚人潛力，邀請佢加入 Brain Burst。對戰角色為銀色金屬兵 Silver Crow，係 Brain Burst唯一有飛行能力嘅角色。

校內： Avator Pink Pig

對戰角色： Silver Grow

6吋高 S.H.Figuart figure
關節夠多，仲有支撐架同埋透明效果配件，做出飛行、擊拳、衝刺等動作。約$230

真身：黑雪姬

真名從未公開過，性格沉默寡言，但對春雪異常主動，毫不掩飾表達愛意。真身係 Brain Burst最高等級七人「純色七王」之一嘅黑之王，因為堅持要升上最高等級 LV10，被其他六王仇視，所以搵嚟春雪幫手。校內 Avatar為與本人相像。對戰角色為 Black Lotus，四肢都為劍，擅打近身戰。

日版夾公仔景品（ 6吋高），女主角係洗衫板身形，真唔明點解要出波裝 figure。約$250/套

校內：黑鳳蝶

Q版肥蝶

呢個 4吋高 Q版系列雖然冇手冇腳、擺唔到乜嘢甫士，但上色最靚。約$399

對戰角色： Black Lotus

要自己砌，完成後約 8吋高，超平超抵玩。同系列本來有 Sliver Grow，但銀色位變晒灰膠，唔推介！$120

書本篇：輕小說重意涵

《加速世界》作者川原礫自細打《 UO》同《仙境傳說》，小說主題同佢嘅愛好都好有關係：網絡世界愈益發達，究竟人心被拉得更近，定係扯得更遠？作者認為玩家若認真超越自我，為保護同伴同信念而戰，喺打機升呢嘅過程中，一樣可以令真實嘅人格升華，跟夥伴建立友誼。原裝《加速世界》動畫暫時未有香港電視台播，加上近日日本推行「非法上載刑事化」法案，想上網即時追看都唔易，可以先睇吓《加速》同姊妹作《刀劍神域》原裝中文小說、漫畫。（各中文版由角川洲立發行．漫畫店有售）

《加速世界》中文版小說， 1-10集。$65至 75

《小加速世界》 Q版漫畫，個人覺得冇睇原作唔會識笑。 1期$38

《加速世界》漫畫版，暫時有 1期，有排出。$38

《刀劍神域》川原另一套作品，原為網上原創小說，《加速》得獎後同步推出文庫小說版，風格較為《魔戒》風，別有一番風味。 1-9集。$58至$75