面對面
真的瀨嘢了 農夫
對上一次和農夫做訪問，是 2010年，兩年之間，兩位成員經歷了人生和事業上的多重變更，用俗話說，瀨咗嘢，兼且一瀨再瀨。
30歲的陸永，搞大女友肚奉女成婚，現時女兒陸一穎八個月大，一次過做埋老襯與老豆； 28歲的 C君，一早揚言要娶拍拖六年女友過門，卻在求婚成功一年後分手，想做老襯偏偏不讓他做；走埋一齊搞演唱會，八月中開騷，七月尾因為門票滯銷宣布取消，身為歌手，最瀨嘢莫過於此。
10年前出道， 5年前以一首〈風生水起〉大紅，一直與玄學有緣又樂於鑽研此道的農夫，從這兩年的經歷悟出一個道理：人，鬥不過命。
陸永說：「改咩變啫？其實呢啲改變咪就係我嘅人生囉……人害怕改變，係因為佢哋一廂情願假設每一步應該要點行點行咋嘛！」
C君說：「一早批話我結唔成婚，我係唔信邪、係要搞咋嘛……今次我算到自己真姻緣年尾到，仲好，唔使煩，繑埋雙手等佢出現。」
兩人都說，原來幾時瀨嘢，命盤術數能預早推算，瀨得有幾甘，則要到時候才知道。
下一站自爆
陸永與 C君中學同樣就讀於港島鄧鏡波中學，因為同樣喜愛說唱文化，結成好友並組成組合， 2002年簽約於 DJ Tommy正式出道。以香港樂壇絕無僅有的說唱組合來說，農夫發展順利、涉足多瓣， 2010年還成為香港第一隊踏上紅館的 hip hop組合。因此，八月的《雙喜臨門》演唱會突然取消，讓人詫異。
C君：「取消係因為宣傳時間唔夠。人哋正常係未出碟已經宣傳定，我哋係出咗先開始宣傳，宣傳得隻碟嚟個騷又就嚟開，時間重疊，冇人知我哋係宣傳緊隻碟定宣傳緊個騷。」
陸永：「大家（唱片公司與農夫）都有問題……」
C君：「覺得時間唔夠，我哋可以一早出聲，但正常嚟講，宣傳嘅嘢都唔係我哋諗……」
陸永：「但係正常我哋做咗咁耐都應該要知……」
C君：「唔係話唱片公司做做得唔好，佢哋做碟做得好好，但我哋唔係正常歌手，以前拍開都唔係正常唱片公司……由呢件事我哋上咗一課，要學識幫自己打算。」
陸永：「一定要識為自己打算……十一月十八日，我哋喺九展開 talk show，名為《一尾講自爆》。其實今次個騷都趕，不過個宣傳夠……用取消一個騷嚟宣傳呢個騷，你話幾大成本？」
原定於八月十一日舉行的演唱會定名《雙喜臨門》，改名改到咁喜慶，結果都搞到取消收場。
與星煥合作兩年不再續約， C君話：「取消演唱會對我哋影響唔大，係要投不信任票都係投畀唱片公司啫。」
最怕改壞名
去年初為 now主持遊戲節目《撳錢》，農夫透露未來將會回歸無綫，週一至週五晚擔任資訊節目主持。
合作有分歧，又搞到取消演唱會咁大鑊。農夫因此與唱片公司星煥上月滿約後不再續約。獲得經理人 DJ Tommy和贊助商支持捲土重來，不過這次不是開演唱會，是 talk show。
C君：「今年一味瀨嘢，個騷講呢啲都夠啦……其實我哋有諗過個騷叫《瀨嘢》，但驚運程唔好。」
陸永：「呢啲係一早我哋就有嘅玄學知識，名唔可以改得太盡。亂叫瀨嘢，真係會瀨晒嘢㗎……」 
入行十年出入多間唱片公司，惟獨與經理人 DJ Tommy情不變：「我哋成長咗， Tommy都見到， 𠵱家我哋可以自己決定咗先至知會佢。」
C君：「唔係演唱會取消，我哋都唔會諗到，係喎，唔使一定定位係歌手囉！其實去到今年，農夫先至搵到條路應該點行。 30歲搵到自己條路，已經好好，我哋身邊有好多人， 30歲都未知自己想點，我哋已經好好彩。」
陸永：「我記得自己廿歲嗰年答過一個問題，希望 30歲時係點……我話希望知道自己條路應該點行。今次我哋真係搵到農夫條路應該點行，應該做多啲 talk show……」
C君：「然後做少啲音樂……我哋做咗十年音樂，年年要出一隻碟其實好花精神。同埋你有冇咁多嘢講呀？嗰年多嘢講梗係做啦，我希望做到一個地步，冇嘢講咪唔做囉。」
陸永：「有時真係有嘢想講，咪講出嚟囉，唔係下下憑歌寄意嘅。」
C君：「兼且 𠵱家音樂已經唔係一個主要娛樂。我哋搵另一個形式，令自己事業長壽啲。」
陸永：「同埋 keep住熱血啲……」
結婚與退婚
與前度 Gloria搞婚禮時至分手，原定今年七月結婚的 C君話：「我信一定會有 perfect match，同埋佢一定會出現。」《蘋果日報》圖片
農夫兩位成員，外表看來都說陸永花弗， C君專一。陸永早年與唐寧傳緋聞，兩年前搭上年青貌美（現年 22歲）地產經紀 Rainah； C君夠長情，與圈外女友 Gloria拍拖六年，常說想成家立室。 10年 11月在微博深情預告旅行求婚計劃，想不到一年後卻落得分手下場。
C君：「決定咗要結婚，先至會諗一個問題：如果一世都要對住呢個人，得唔得呢？如果一世都係你就我我就你，不如唔好結啦。咁多年一齊，真係愛嘅……但係理性唔想一世人咁多忍讓將就，聽太多人話『忍忍吓就一世』，做咩要忍？我真係信呢個世界有個 perfect match，同埋一定會遇到……咪理智啲分手囉，要結，陸永幫我結囉……」
陸永：「唔好話我滾大人個肚呀！呢啲咩邏輯？老婆靚就話我滾大佢，唔靚就係佢陰大我咩？我都覺得幾好，一個咁嘅契機令我 29歲結婚。我本來諗住三十零歲結婚，三年後生個 BB……原來人生咪就係冇得 plan囉。」 
C君：「見到佢拍拖唔夠一年就結婚生女，就更加覺得自己當初決定分手冇錯，唔使拍好耐拖鋪排好耐嘅，嗰個人真係出現咗係唔會遲疑㗎！」
陸永：「我同老婆都係有責任感嘅人，佢冇嚟（月經）嗰日已經話畀我聽，等我有個心理準備開始驚……心裏邊梗係想佢（月經）快啲嚟番啦，我唔信有咁嘅人，聽到咁嘅消息第一時間『好嘢！』、即刻走去買 BB床囉……佢自己驗，驗完話有，梗係懷疑支嘢係壞啦，買多幾隻牌子再驗……好鬼衰，支支話有，零零舍舍有一支話冇，我梗係信冇嗰支，覺得其他先至係壞晒啦，結果，咪就係醫生都話有囉……佢打電話同我講有咗，跟手嗰晚我要開廠，做《撳錢》。心裏邊翻天覆地起咗變化，把口就喺到例牌嗌：『又係時候派錢畀大家啦！』其實 𠵱家喺度諗，改咩變啫，呢個咪就係我嘅人生囉。人害怕改變，係因為佢對人生有設定，假設每一步應該要點行點行咋嘛。」
C君：「我哋自己學咗咁多年玄學，結唔到婚其實好易睇到，我自己都計到。係都要搞結婚，係因為我唔信，真係好愛想結吖嘛！其實呢啲嘢應該要信，命運都係挑戰唔到，我哋做緊嘅所有嘢都順應緊命運。」
陸永：「呢兩年轉變太大，令我更加識得樂天知命。做人，真係唔好諗住安排太多，有啲嘢你根本控制唔到。」
曲赤小風波
陸永去年奉女與 Rainah成婚，女兒陸一穎現時八個月大：「唔係倉促結婚，老婆令我唔再想會諗其他女人。」
陸永給女兒改名叫陸一穎，又係因為請人計過夾過八字。今年五月，陸太 Rainah與歌手連詩雅雙雙捲入娛圈新一輪慾照風波，疑似被前男友曲赤出賣宣傳唱片。左計右計、機關算盡，不知道有冇得讓寶貝女兒不要重蹈母親覆轍，避開啲人渣呢？
陸永：「個個覺得我應該要嬲，其實邊有嘢？佢（ Rainah）全部嘢我都知，係爭在冇睇過相咋嘛。呢啲嘢好快過，唔好話曲赤啦，我老婆係咩樣， 𠵱家都冇人記得啦！我知我個女係點㗎，我發夢見同佢一齊喺後台睇人表演，佢好好㗎……我好相信個夢，阿女第時就應該係咁。」
C君：「應該望你個女食仔無數，點解一定要仔食女，唔可以女食仔啫……」 
陸永：「佢成日灌輸我生女應該咁……未生女咁諗係幾好玩，真係做咗老豆梗係唔會咁諗。但係戀愛觀呢樣嘢好難灌輸，邊個人啲戀愛觀唔係自己摸索出嚟嘅呢？」
C君：「所以佢應該教個女出賣人，唔好俾人出賣……」
陸永：「係囉，唔好畀自己老豆肉赤，應該畀人哋老豆肉赤……仔女嗰代發展成點好難講，我唔敢諗，我隨時準備同時代脫節架啦……你話如果第時個女雙性戀，帶個男朋友返嚟，個男朋友又帶埋佢嘅男朋友返嚟呢，咁我就真係接受唔到，太新潮啦。我以前喺街係睇女， 𠵱家係睇人哋個女。我睇街度啲女仔，好少見到會希望佢第時係咁，反而係唔想佢係點……譬如話，我唔想佢係嗰啲落雨，擔住把遮喺簷篷底行，冇公德心冇良知；同埋唔好曬到自己太黑囉。佢本身黑唔緊要，唔好特登曬……好男人，一定要佢參考我啦！咩我係底線呀，我係頂線！唔好要求搵個男人好得過老豆，太難啦……」
陳老闆
陸永和 C君說，最近常在一起研究娛圈成功例子，希望偷師，前老闆陳冠希是其中一個學習對象。
三年前陸永曾在個人 talk show《我係明升呢》上說過， 08年轟動娛圈的慾照風波，陳冠希唯一的錯是不會修理電腦。當年農夫是陳冠希旗下藝人，陸永言行被指擦鞋。我問做了爸爸的陸永現在怎麼看，他說看法沒變。
陸永：「我都係覺得陳冠希樣樣叻，唯一錯係錯在要攞部電腦畀人整……我好鍾意一個黑人歌手，我最近見到陳冠希同佢一齊……嗰個人國際知名，真係好勁，陳冠希到底做咗啲咩，可以做到咁遠呢？」
C君：「尤其我哋共事過，陳冠希真係好叻。所有我哋嘅作品，佢都可以諗得商業化。所有創意嘅成品，佢都可以睇到錢。」
原來不論過了多少年，男孩們都一樣，都希望成為陳冠希。 
留言列表
{{ article.title }}
