今日好玩嘢

手套 remote　跳住〈江南 Style〉玩飛機

2012年10月17日 ~~ 第282期 Face

細細架嘅遙控直升機愈來愈多人玩，但其實個遙控器幾難控制，推少少就隨時飛過龍。想直接啲控制？竟然有人諗到用體感遙控直升機，玩家只要戴住手套單手玩，擰吓手腕就可以控制到，而且力度更易掌握，邊玩邊跳紅爆全球嘅〈江南 Style〉都冇問題，實型仔到引晒江南啲靚女實啦！除咗體感直升機，呢期仲有天眼直升機同砌得積木遙控車，等你玩盡千奇百趣遙控玩具。

互動片段

手套 remote　跳住〈江南 Style〉玩飛機

Spec.
電源： 9V電池、 USB充電
使用時間： 10-15分鐘
售價：$468
查詢： JC Shop（ 3148 9455）

擰手腕唔使大動作

呢部體感直升機控制器由一支控桿同手套組成，操作原理同普通遙控直升機雙控桿操作一樣。控桿控制高度同水平橫移，而手套就負責前進、後退同轉向。玩時要手握控桿、戴住手套，將手臂水平伸出。想推控桿升空，只要扭動手腕就得，拗前就向前飛、拗後向後飛，擰左擰右轉彎。我哋跳住〈江南 Style〉騎馬舞，大力甩住手腕，飛機就跟 beat前後飛，即使大動作打圈都影響不大，因為佢主要偵測手腕動作。玩落唔難上手，比遙控器更易控制，唔易轉過龍。

控桿作用同遙控器式直升機一樣，控制升空高度，推左右就係水平橫移。

起飛後控桿要 keep住畀力推少少控制高度，一下子放手架直升機就會冇動力，跳樓式跌落嚟，雖然架機好實淨，但都有機會整爛！

手套就負責感應手腕控制移動，拗前、拗後、擰左、擰右操作直接，但要代入直升機方向操作。（圖為左手示範）

前進

後退

轉左

轉右

玩後感：室內啱玩

玩時姿勢就係 keep住水平伸直，擰手腕就玩到，大幅度郁反而冇反應。

負責扮 PSY試玩嘅傑仔對呢架體感直升機操作好滿意，不過就覺得只適合室內玩。「個操作方法幾易上手，又新奇。不過充一次電只夠玩 10分鐘左右。另外試過室外玩，少少風都吹到失晒控，所以都係適合喺室內玩，最想買架喺 office玩。」

天眼通錄影直升機

對體感手套冇興趣，其實傳統遙控器直升機都有新花款。呢架 Sliverlit Sky Eye內設鏡頭，遙控器上更有彩色屏幕，可即時直播鏡頭實境，邊看邊錄影拍攝都得，十足十 007特務裝備。而遙控範圍就有 10至 15米，高度可升至 5層樓，以後傳媒想拍高官豪宅有冇僭建，可以考慮用佢。

使用 micro SD咭拍攝儲存，影片同相片皆為 640× 480解像度。

試片
640× 480解像度，清晰度一般。

Spec.
解像度： 640× 480
記憶： microSD
電源： 8× AA電池、 USB充電
查詢： JC Shop（ 3148 9455）
售價：$1,380

積木模型車　手機當 remote

大人細路都鍾意嘅 Lego其實都有出模型車，不過佢唔太多部位可以砌，反而由 TICO推出嘅 UTICO遙控積木車更自主。皆因佢除咗可以用手機遙控，成架車更畀你由底板開始組裝，大半架車都係由你逐粒砌好，夠晒滿足感。操作方面就交由手機負責，並支援 iOS及 Android，只要到 App Store或 Google Play下載 UTICO app，打開 app後再開啟車底開關就即刻自動連接。比較特別係設有 Turbo掣，開咗之後架車速度拍得住四驅車，爽！

車背有充電插孔，用附送嘅 USB充電唔使入電池。

UTICO app可免費下載，操作方式有用手指篤虛擬軚盤同用陀螺儀體感，兩種玩法。

手機要喺 3.5mm插頭裝上紅外線發射器， iPhone 5的話就插喺底部。

Spec.
支援平台： iOS、 Android
電源： USB充電
使用時間： 20分鐘
售價：$499
查詢： UTICO（ 3101 0163）

分為 van仔同 GT跑車兩個系列，玩法一樣，用嘅積木亦一致，買多幾款可打亂顏色自由組裝。