黑色皮梳化、咕及茶几均購自九龍灣，石祐珊喜歡大梳化，「攤喺度、瞓喺度都得。」

明星、名人二代，大部分都愛蒲爛玩食慣歎慣，薛家燕長女石祐珊卻是例外，自大學畢業返港，她一直幫薛家燕打理事務，又成立自家經理人公司。回港後她便搬進這個千多呎羅便臣道單位，裝修、搵料、買傢俬一腳踢，她說屋企不需要太過花巧，最緊要應使則使，「其實靚擺設，都係要嚟擺㗎啫！我反而會注重多啲清潔，同埋係慳錢。」

環保傢俬
石祐珊○二年到美國讀書，○九年因為母親薛家燕割膽手術後胃炎，曾一度陷入昏迷狀態而回港，在美國生活七年，回港後不自覺將彼邦的生活習慣一併帶回香港，「可能嗰陣時同朋友住、有room-mate，會注重多啲清潔，同埋係慳錢囉，會學識唔好亂咁使錢，佢哋係好興你用完張梳化俾我用，環保嘛，又會上網站買電視。」石祐珊與弟弟石耀庭兩姊弟所住的這個羅便臣道、一千多呎單位，是薛家燕於○九年買入，薛家燕則住於同層的隔籬單位，雖然薛家燕並沒有規限她的裝修費，但她卻自動四處格價，「呢間屋裝修買傢俬時，就會諗，邊度、點樣可以平啲呢？我自己去過睇一啲有牌子嘅傢俬鋪，呢度又幾萬蚊、嗰度又幾萬蚊，嘩！邊有咁多錢呀！」

家燕迷你倉
對於住屋要求，石祐珊自言簡單、舒服，不要太過花哩花碌，「我想以黑白為主，感覺有少少摩登，因為出面個環境都已經好似好多嘢，想入番嚟會舒服，唔想太過花巧。」屋內另一特色就是特別多儲物空間，但為了不讓儲物櫃破壞整間屋的設計，石祐珊特意請教室內設計師的意見，「我哋由細到大都好多嘢，同埋我媽咪唔鍾意丟嘢，好多嘢舊晒唔用得，但又唔丟棄。可能由細到大都慣咗呢樣嘢啦，好似唔想嘥，擺住喺度先啦，所以就收埋好多嘢。」的確，現場所見，屋內大部分擺設都屬於家燕姐，如六十大壽時所收到的各式金器擺設、年輕時的照片等，驟眼看去，真係有啲似家燕姐的私人迷你倉呢。 ####

 


座枱燈是莫文蔚母親送薛家燕的生日禮物。


家庭照隨處可見。


Q版薛家燕金人和李香琴送的金桃（右），都是薛家燕六十大壽的禮物。


首飾盒是石祐珊兒時自製送給薛家燕的母親節禮物。


飯廳以銀白色為主，旁邊的儲物、飾物櫃，除放了兩姊弟的雜物，還有別人送給薛家燕的金器禮物。


主人房由兩間房打通而成，大床購自深圳，床單則購自美國，「我對被同床單最講究，棉質柔軟度高，瞓上去舒服好多。」


廚房面積不大，所以用黑玻璃作廚櫃門，令感覺變得闊落。


書枱選用玻璃桌面，有助擴闊房間空間感。

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄