娛樂八掛大放送★

每個人嘅時運高低，唔止單純講命數，亦有賴後天個人嘅積德修行。所以想做小生意嘅朋友，除咗睇個人運氣之外，都要睇下所揀嘅舖位地點旺唔旺！

依家一般想創業嘅朋友做生意，都會選擇喺細商場開間蚊型舖，因為所付出嘅投資本金少，只需十萬八萬按金連上期就得，加埋裝修、入貨都自己一腳踢，就以為可以開張大吉，甚至大想頭即賺錢。
點知最後蝕到攤攤腰，執咗間舖離場又唔甘心，強撐下去又輸埋老本，你話點好？
計我話，初次創業者喺揀商場試業時，千祈咪貪平租，商場本身到底旺爆場定係門可羅雀，有定數之餘，都要靠聚氣。

新場難做
新開或重新包裝嘅商場，最興出幾招嚟引蛇入洞，例如用免按金、一蚊舖租、明星效應等伎倆嚟引啲新客戶上釣。老實講，邊有咁大隻蛤乸隨街跳吖！個商場旺，都要講聚氣，新場至少要守一至兩年，靠人流多來催旺旺氣。
若然個新商場，捱半年就話頂唔住，我勸你就咪揀或咪再租落去，壯士斷臂好嘞！自己唔夠錢，就搵多個合作夥伴，籌集多啲資金，搵個租金貴啲，但保證人流多嘅商場，先至好開舖囉！喺旺嘅地方先可有商機，先至有可能有錢賺，正所謂：「做生意唔怕米貴，最怕運滯！」

死場實例

坊間有好多「死場」，春風吹又生，搞生意嘅初哥更加要小心。就好似之前喺我公司附近，位處佐敦道同上海街交界嘅「佐×廣場」，前身係酒樓，結業後就變成購物廣場。喺開賣時有聲有色，舖位轉眼就賣光，但係招租期間，只有少量店舖開張。至今，已經封場玩完，相信喺統一業權之後，又會拆租。
另外，較偏遠嘅有元朗教育路某酒樓執笠後變成嘅「嘉×商場」，雖然嗰個位置，喺元朗區嚟講人流唔錯，但係就唔一定可以流入呢個場，至今都唔見好旺場！又好似尖沙嘴廣東道80號嘅「Ca×onya×a」，招租時嘅廣告板係威係勢，拉攏特色主題店進駐，可惜其他絕大部分嘅商舖都係一般嘅店舖，幾年間搞嚟搞去都唔起。其實，呢個情況喺銅鑼灣之前嘅「×ime×lus」更加嚴重，因為大部分嘅商舖所賣嘅都只係上環、深水埗呢啲批發地方嘅貨色，全無創意可言。邊有可能只靠一、兩間本地設計商舖就能帶旺整個場呢？

So Time
讀者牛奶姨婆問：
以下是我的姨甥孫資料：她叫「譚×瑩」，女，出生日期為2004年新曆1月×日，下午4:30。現有問題如下：
1. 她一生大致運程如何？何時行大運？
2. 讀書運如何，讀派位學校可以嗎？還是直資或私立較好？會否很費時去找學校（中學），可否讀大學？要谷她讀書嗎？小學考到了，但會否讀得辛苦？
3. 姻緣如何？
4. 財運如何？
5. 她的一生有甚麼要注意？

蘇師傅答：你嘅姨甥孫命格屬「金」，生於冬天，要「火」嚟照暖，「木」嚟生「火」，佢一生有運行，8歲行運行到28歲，28歲至38歲停一停，38歲之後仲有30年權運地位運幫夫運。少年讀書運大致上冇問題，不過佢行「百厭活躍讀書運」，宜去外地讀書，或者選讀活動教學嘅學校都會對佢有利。依據佢嘅命格，讀上大學亦冇太大問題，同埋不妨參加多啲課外活動，佢會有機會獲獎。至於佢嘅姻緣運，因為佢嘅出生日同出生時辰對沖，45歲前無論佢識邊個都好似唔太夾，感情唔會太穩定，反覆多變化，特別喺45歲嗰年要特別留意。佢較容易有姻緣運會喺「6」、「7」字尾嘅年份。財運好唔好呢，就睇個人運而定啦，入大運就係財運好嘅時期。佢要留意膝頭，呢個部位喺一生中易受損，所以不宜跑步太多，仲有逢係虎年及猴年都較易受傷。