鄭嘉穎被指與國產女模徐靖雯撻着，身為緋聞女友嘅佘詩曼表示唔清楚事件來龍去脈，不過就幫口話：
男同女可以有純友誼接觸。
嘩，阿佘緋聞多到爆，幾時變到咁純情吖？呢番話出自佢把口，真係零說服力。
已育有兩子嘅栢芝話仔唔怕生，生女生仔都好welcome，屋企依家有三條煙，
多條Queen都冇所謂。
咁又係吖，再生仔就湊夠「四條」；生女就「煙俘虜」，都係無敵組合。
吳君如突然辭演電影《熱愛島》，更遭任達華、甘國亮踢爆有孕，但日前吳君如出席活動時例牌否認：
你哋咪放長雙眼睇吓囉。
當年佢死口唔認懷孕，今時今日邊個再信佢講嘢吖？大家都聽過狼來了嘅故事嘅。
近日有指劉愷威整容整到似林峯，林峯坦言冇留意事件，
聽咗都係笑一笑就算。
咁唔係可以點？佢自己都「整」過唔少，唔通告人「侵犯版權」咩？
房祖名早前表示冇同薛凱琪（Fiona）拍拖，更踢爆對方男友其實係方大同。日前Fiona出席活動就指祖名亂講嘢，
佢又講啲唔好笑嘅笑話。
祖名老竇成龍出名噏得就噏，有其父必有其子嘛，Fiona冇得怨。
有報道指千嬅為準備個唱而停止行房，老公丁子高就話兩者冇關係，行房令人血氣暢通，
可能唱歌仲勁啲、大聲啲。
如果係真嘅，唔該丁生努力啲，媽咪姐都想聽番場好嘅演唱會。
全站熱搜
留言列表
{{ article.title }}
