從亞視走到無綫，螢幕上的文頌嫻總扮演着乖巧聽話的可人兒，她那種陽光氣息，瀰漫處處。

她從沒有想到，原來「BB咁麻煩，瞓咪瞓囉，又要喊又要扭（計）！」隨着去年八月榮升人母，向來堅強硬朗的她，似乎感受到荷爾蒙的變化，以及小生命的威力，情緒起伏不定，眼淚經常不由自主地落下，「有時餵緊奶，會諗起自己好似唔夠母乳餵個女，驚個女食唔飽，會望住佢喊；有時睇電視，明知情節係好老土，嚟嚟去去都係咁，都會喊到成面眼淚！」

女兒Jamie如今五個月大，藉着朋友間的育兒心得和書本上的育嬰資訊，文頌嫻拾回自信，「喊包」才不至於每天以淚洗面。

頭髮稀少的Jamie，兩個月大時被發現於後腦長出「士多啤梨」瘤，一度嚇得文頌嫻花容失色，後經醫生診斷後知道無甚大礙才放心。

文頌嫻剖腹產女當天，因久咳未癒，醫生建議她作全身麻醉；但為了迎接女兒出生的難忘一刻，她堅持半身麻醉。

三個月大的Jamie，在父母循循善誘下，收到利是已懂做出「請請」動作，今個農曆新年大派用場了。

Jamie一個月大，文頌嫻即邀請好友如周家蔚、關寶慧、佘詩曼、湯盈盈等，到家中為BB慶生，氣氛熱鬧。

去年三月，文頌嫻與拍拖三年的李梓慎，於四季酒店筵開二十八席舉行婚禮，同時宣布懷孕三個月，雙喜臨門。

情緒波動

去年三月，文頌嫻與拍拖三年的圈外男友李梓慎（Jason），於四季酒店筵開二十八席舉行婚禮，同時宣布懷孕三個月，雙喜臨門。轉瞬間，女兒Jamie於同年八月出世。榮升人母的她，直言面對小生命的來臨，情緒變得波動，動不動便淚流滿面，「其實大肚嗰時，情緒已經好敏感好波動，譬如：睇電視咁，啲情節係好老土，嚟嚟去去都係咁，已經估到個劇情喇，都可以喊到成面眼淚。生完之後，可能湊BB辛苦啦，同埋又覺得自己唔夠人奶，驚囡囡食唔飽；有時餵餵吓奶，自己會不期然咁喊。不過，依家好好多o架喇，BB都五個月喇，情緒都控制到。」

兩口之家忽爾變成三人世界，整個生活都圍繞着剛出世的小女兒，再加上睡眠不足，令文頌嫻的脾氣變得暴躁非常，經常按捺不住向丈夫發怒，慶幸丈夫對她百般忍讓和遷就，才沒有損害夫妻間的感情。

文頌嫻坦言產女後責任感大了不少，縱使有時間出外購物，也是着手選購嬰兒用品，然後便歸心似箭，感覺一日二十四小時也不夠用，「因為我唔想交低個女畀傭人湊，自己想親力親為照顧佢多啲！我見有啲朋友嘅細路，畀傭人湊到變咗『港孩』，我想訓練到個女好獨立、有禮貌，起碼識得嗌人、同人相處，健健康康就得o架喇。」

不假手於人，事緣於兩個月前，文頌嫻偷閒與丈夫外出拍拖看戲，交帶傭人於晚上照顧女兒，便令本來能夠一覺瞓到天光的Jamie，每晚半夜紮醒嚎哭。文頌嫻娓娓道來：「平時我會喺夜晚十點餵個女食完最後一餐奶，然後就將佢擺落牀，由佢『呀』兩聲就會瞓到第二朝六點。點知我出去一晚啫，個女就晚晚半夜紮醒扭計，可能係傭人嗰晚抱住佢嚟瞓，所以依家我嚴禁老公、傭人夜晚抱BB，一定要狠心啲，由佢喊吓。」