教堂行禮
攝影師 Dickens話，狗狗結婚相不限性別，有主人貪得意，帶兩隻狗仔嚟影斷背結婚相，一樣無問題。

寵物家

狗狗出嫁了

2013年02月14日 ~~ 第1197期香港《壹周刊》

要帶狗仔感受結婚氣氛，可以去影結婚相。有寵物攝影公司推出狗狗婚禮攝影套餐，情人節仲特別旺場。本刊直擊一對貴婦狗拖友的婚禮拍攝過程，就算唔係狗界的伊健 YoYo，只要跟足攝影師教路，一樣可以影到靚相。祝天下有情狗終成眷屬！

減咗肥先

介紹兩位新人：新娘子貴婦狗女朱古力，僅僅重五磅，正牌窈窕淑女。反觀新郎哥 Mocha，重十幾磅，身形似中型犬。負責婚紗拍攝的 Dickens話，小型犬禮服一般是中至大碼，胸圍闊 36至 54cm，選擇不多， Mocha再肥啲就著唔落。「所以我哋要客人提早一個月預約，萬一唔啱著都可以減定肥。」明嘅，同人類影婚紗相一樣。

花絮一：講數

Mocha好動，朱古力文靜，搞咗成粒鐘都唔肯企埋一齊。結果攝影師要聯同主人即場訓犬，由基本坐立做起，等狗仔企定定。

花絮二：瘋狂試衫

一見靚靚婚紗，成班主人仲興奮過狗狗主角，係咁研究邊件有 Deep V或透視效果，仲決定加碼幫襯最貴的$4,880套餐，可拍攝兩套禮服和婚紗。

花絮三：搶花球

拍攝尾聲，新娘竟然同新郎鬥搶花球？其實花球是用來給狗仔模擬做花仔花女，幫新人遞埋戒指，好受歡迎㗎。

有嘢食味……

搶呀！

提早做美容

搞掂衣著，跟手執靚個樣。 Dickens提醒主人要在影相前一天帶狗仔做美容，但不可安排在拍攝的同一天內進行，以免狗仔太累。還要注意拍攝當日不可預先餵食，以免狗仔食飽，難用零食引誘。最好帶埋有聲玩具，只要成功吸引狗仔企定定，影靚相無難度。

設有五款布景，包括教堂、宮廷、和室、電單車及旅遊主題等。

服飾由專人縫製，手工精緻。婚紗有喱士裙、白紗裙，細節如織花及閃片都做得一絲不苟。禮服有黑、白、條紋西裝，另有頭飾、頸鏈、煲呔可搭襯。

日式婚禮

影完西式婚禮，仲可以換番套和服影埋日式布景。不過和服只有小型犬 size，肥啲都唔啱著。

Jelly Pet Photo寵物攝影

一般竉　物攝影套餐收費$1,550起，包三款自選場景，衣飾自備。

成立於 05年，拍攝對象包括狗、貓、兔，但只有狗隻設婚禮攝影，須提早一個月前預約。
婚禮攝影收費：共三款套餐，最平$2,880起，包木框大相、禮服或婚紗各一套（只供拍攝用），可選 22張相片及附送影像光碟。
地址：葵涌葵喜街 13至 29號永恒工業大廈 1503室
查詢： 6430 4275
網址： http://www.jellypetphoto.com