Tim Sir高峰時期曾養有過百條球蟒，近年雖說要減產，但飼養數目仍逾五十條。

壹些事壹些情

我為蛇狂

2013年02月14日 ~~ 第1197期香港《壹周刊》

蛇，很趕客。有毒、咬人、能把整隻牛生吞、引誘夏娃偷食禁果……多年背着負面形象，即使今年是蛇年，但走一轉年宵市場，跟蛇有關的年貨仍是寥寥可數。不過，正如梁振英無論撒多大的謊，也有蔣麗芸高呼「愛」的宣言，保駕護航一樣；哪管你多討厭蛇，也總會有人對牠們死心塌地。他們有的愛蛇，愛到傾家蕩產；有的養蛇，視作一盤生意；有的靠蛇，養活三代。慘被抹黑多時，喜逢蛇年，且讓一班愛蛇之人出來替牠們漂白一下。

球蟒養殖大師

Tim Sir是小學老師，教中文、體育，一家三口，仔細老婆嫩，為口奔馳，是平凡不過的上班族。不過，每日下課後，走到長沙灣的「私竇」， Tim Sir即搖身一變，成為球蟒養殖專家。他高峰時期曾養殖過百條球蟒，更成功繁殖出全球獨一無二的球蟒，成為世界第一人。
一說起蛇， Tim Sir就像說起初戀情人一樣，臉上總會不自覺露出幸福的微笑，「你上我個網都應該知道，我同球蟒點結緣。」 Tim Sir愛球蟒，開了個網站「球蟒天地」，把自己十多年來養殖球蟒的心得都寫在網站，更為球蟒賦了一首情詩《詠球蟒》：「她，由幾內亞灣，悄悄出發，默默地，擄獲我們歡心……」
Tim Sir對球蟒一往情深，旁人或許覺得騎呢，但對他身邊的人來說，卻見怪不怪，「我細細個就鍾意養埋啲冷門動物，好似馬騮、金絲貓、蜘蛛等等，初中時候，經過金魚街，有個店員遞咗條球蟒俾我玩，一拎上手，成身好似觸電咁！」小時候談戀愛，最難過的就是父母那一關， Tim Sir對球蟒一見鍾情，最後同樣過不了母親一關，「媽媽話一見到就起雞皮，如果喺屋企見到，實會掟落街！蜘蛛就話可以收喺書包偷偷地養，球蟒咁大條，點得呀？」
結果，在讀書時期，他沒法跟球蟒偷情，但到了千禧年間出來工作，自己租屋住，終於可投入球蟒世界，「起初去金魚街買一條嚟養，望住已經好開心。後來上網睇外國資料，嘩！不得了，原來養殖先係玩球蟒嘅最高境界。」他二話不說，找美國的球蟒之父 Bob Clark，空運六條白化球蟒到港，開始自家繁殖，「一口氣買咗五條乸，一條公，十幾年前都要成八千蚊。」 Tim Sir說。

Tim Sir手上拿着的正是由他親手繁殖出來，全球第一條的香草花崗岩球蟒，他更因此名留球蟒百科全書。

Tim Sir月花數千元在長沙灣租了一個舊樓單位，作私竇養殖場，層架擺放的全是球蟒。

每條球蟒孵化後的蛋殼，和脫下的皮， Tim Sir都一一收藏，堪稱瘋狂。

Tim Sir說，球蟒無毒，天性善良，且害怕陌生環境，故經常像個球體般捲作一團，球蟒亦因此得名。

身價$40,000
Paradox Candino，值錢之處在於頸上有一處像污漬的黑色班紋（箭嘴）。

自家繁殖

養殖球蟒就像烹飪，手上拿着一本球蟒百科全書，就可繁殖出不同紋色的蛇，「就好似食譜咁，呢條基因搭嗰條基因，就可以生到另一款全新基因嘅蛇。不過都唔係次次中，有時可能只遺傳到其中一方嘅基因，個樣唔會變。」 Tim Sir講了一大輪如何將蛇的基因配搭，繼而繁殖出新品種，記者聽得一頭霧水，只知道要誘導兩條蛇交配，必須控制好室溫及燈光。
每年春夏之間，蛇蛋孵化，是 Tim Sir最期待的時候，「球蟒一年繁殖一次，所以唔中就惟有等多一年。有時要成功配一款，好彩嘅話三至四年，唔好彩嘅話，成世唔中都唔出奇。」○九年，他繁殖出全球第一條斑鼻花崗岩及香草花崗岩球蟒，成為首位名字登上球蟒百科全書的亞洲人。
Tim Sir在全盛時期養了過百條球蟒，現時少說也有五十條，他不但養，還會把每條球蟒的蛋和脫了的皮保存下來，更每月特地花幾千元在長沙灣租了一個舊樓單位，作為私竇養殖場，「為咗確保佢哋有足夠食物，我其實仲要養殖一大堆老鼠。老婆算係體諒，只要我唔拎啲蛇返屋企，就當見唔到。不過為咗啲蛇，我十幾年嚟都唔敢去旅行，最多只係試過離港三日。冇計啦，要日日上去 check住室溫，又要餵水餵食物，真係走唔開！」

城市森林負責人阿熙預計，在蛇年效應下，生意將更旺。

身價$60,000
Bee Pied，值錢之處在於全條蛇身白色，惟獨頭上有花紋。

蛇年效應

在金魚街有廿九年歴史的爬蟲寵物店城市森林，主力售賣寵物蛇。負責人阿熙說，養蛇的人近年激增，他更深信蛇年效應之下，生意更旺。「爬蟲類入面，養蛇最方便。佢哋粗生粗養，好易打理，一個膠箱同一兜水，七至十日餵佢食一隻老鼠，保持廿零度室溫，咁就搞掂。有時幾個月唔食嘢，佢哋都唔會死。」
香港從前最多人養的是粟米蛇、牛奶蛇、皇帝蛇和豬鼻蛇，價錢由三百至約三千元不等。但要數近年最流行的，卻是球蟒，「佢哋可以繁殖出好多唔同紋理同顏色，而家最少有二千種變化，唔似其他品種，嚟嚟去去得幾種款與色！」球蟒一般有二十多年壽命，最長可達三至四呎，加上可繁殖出千變萬化的紋色，最貴一條可叫價達數十萬。在阿熙的店內，最貴的一條價值六萬，「愈多基因愈值錢，我哋鋪頭最勁嗰條有三種基因，算係小兒科，美國試過有人培殖出一條包含八種基因！」
養殖球蟒之風，源自美國，近年蔓延至香港。阿熙說：「我哋淨係球蟒，已經起碼有過百名熟客仔，會不斷返嚟入貨。佢哋好多都當養蛇係集郵，一有新款就嚟買，好瘋狂！」
養蛇族愛得瘋狂，不過香港愛護動物協會福利部副總監侯安娜醫生表示，由於蛇只能活在特定的濕度及溫度，市民家中未必能提供合適環境；加上蛇須以活生生的老鼠餵飼，多不適應進食已屠宰的肉類，故提醒市民飼養前請先三思。

大蛇吞鼠三部曲

把老鼠（箭嘴）放入膠箱內，球蟒即時進入戒備狀態，準備隨時襲擊老鼠。

一有機會，球蟒用身體把老鼠捲實，再慢慢將其勒死。

確認老鼠死後，球蟒會慢慢把牠吞入肚中。

全港唯一女蛇王

有人把蛇當寶，珍而重之；但有人卻日日將蛇煎皮拆骨。他們不討厭蛇，不過就是靠捉蛇劏蛇，養活一家幾代人。
深水埗蛇王協的話事人周嘉玲，縱是嬌滴滴的女兒身，但打從十三歲起，每天便在蛇堆裡打滾，見過最兇猛的毒蛇，也分屍過無數條肥美的蛇，是香港唯一的女蛇王。
「小學都未畢業，就跟阿爸出嚟搵食。」周嘉玲是家中大女，對下有一妹五弟，自小跟着父親周祥賣蛇、烹蛇、劏蛇、捉蛇，對蛇分分鐘多過對人，父親過身後，她繼承了蛇店。記者這天到訪，她一直忙得不可開交，蛇店各大小事務，由入貨送貨到拉客，都要她出馬，久久未能坐下接受訪問。待她有閒坐低，記者說她好生意，她卻說：「冬天都冇生意，咁就死得啦！我哋夏天做埋一日都唔夠二千蚊生意，而家賺埋要使成年㗎！」說着，又有一對情侶走過，她又走去拉客，「點解淨係食一碗蛇羮呀？熱氣生痱滋？食唔到蛇咪飲龜湯囉！」
冬天主力做蛇宴，夏天少生意，惟有靠捉蛇幫補。每年炎夏，是蛇出沒的旺季，每次接到警察電話，周嘉玲就會出動捉蛇，每次有八百元車馬費，「去得最多就係九華徑，最高紀錄試過一日收三次電話，一日捉幾次！」

周嘉玲自小在蛇堆中
長大，就算一手擒着數條毒蛇，也面無懼色。

九七年，周嘉玲擒獲全港有史以來最大條的過山烏毒蛇，當日雖威風，但回想起來卻猶有餘悸，「如果今日要我再捉，我真係未必睬你。」
（《蘋果日報》圖片）

生擒過山烏

捉蛇比想像中簡單，也比想像中兇險，周嘉玲每次拿着一個布袋和一對手套，便隻身上路，「最多帶多個鈎，方便引佢哋出嚟。試過被蛇咬到手指，腫到腳趾公咁粗，痛足兩星期；有次俾蛇咬，仲暈咗幾個鐘。」一九九七年，她在西貢水警基地捉到一條十二呎長、九斤半重、粗如消防喉的過山烏，是香港有史以來最大的毒蛇，「嗰次真係俾政府班人激死，打嚟話係條普通蛇仔，我去到先知原來係過山烏，仲要咁大條！當時已經好多記者喺岸上擺晒機等影相，臨陣縮沙好瘀，唯有焗住上！」她說來輕描淡寫，記者卻聽得驚心動魄，「上到船，我就同阿 Sir講，有咩事你就向船頭走，唔好掉頭，自己都準備隨時跳落海。」最後，她一手捉住蛇頸，順利生擒巨蛇。
這條巨型過山烏，後來也難逃被煎皮拆骨的命運，「蛇膽賣咗七千蚊，蛇肉賣咗一千蚊，不過可能因為太張揚，政府之後就規定捉返嚟嘅蛇，一定要歸政府，蛇王冇得落袋。所以而家我都唔係次次幫手捉，每次賺得八百蚊，有時仲要晨早四點鐘打電話叫你去，的士錢都蝕埋。而且捉蛇咁高風險，吓吓搵命搏，試過有次捉咗條蛇第二日見報，保險公司打嚟話我哋太危險，唔同我哋續勞工保險，咁仲點做生意？」