名人落ball場，每次出動都上足彈藥，身光頸靚見人，連行步路都要零舍有儀態。不過有時見到老友講到興起，鬼馬趣怪表情hold唔住， 爆晒出嚟，冇錯可以搶到收視。至於靚唔靚呢？噢……見仁見智啦！
鄧麗欣 牙肉王
鄧麗欣同方力申情侶檔出席時裝活動，不時含情脈脈望住對方，全程冧爆，仲搭晒膊頭任影。方力申同鄧麗欣講咗句說話，到女方笑唔停，笑到連牙肉都爆埋出嚟！嘩，想嚇死媽咪姐咩！
何超蓮 兔仔牙
上周三（13日），何超蓮路經金鐘嘅時裝活動，記者問到家姐超雲被指似仙杜拉，佢好激動咁話︰「唔似，家姐靚啲！我全力支持佢，佢瘦咗少少㗎喇！我覺得陳山聰肥啲！」見佢愈講愈興奮，成對兔仔牙都突晒出嚟！
趙式和 日本風
華光航業集團董事長趙世光個女趙式和，上禮拜四（14日），搞咗個慈善ball，請嚟大堆好友撐場。提到自己喺畫廊擺咗三幅畫拍賣，講到唔停口，興奮程度爆晒燈，再加上佢嘅白面、紅唇同鳳眼妝，好有日本味道喎。即係似乜？大個嘞，自己諗吓啦！
李民橋老婆 櫻桃嘴
東亞銀行副行政總裁李民橋老婆鄺淑嫻（Bonnie），孖住趙式和搞慈善ball。當晚佢滿場飛，鬼咁風騷，仲一時瞇眼，一時嘟嘴，表情多到暈。不過老公李民橋一到場，佢即時變番賢妻。呢啲，咪豪門絕技囉！
陳君宜 口擘擘
徐子淇密友陳君宜，同老公鄭躬明一齊出席趙式和嘅慈善ball。佢未行到入場，被李民橋老婆鄺淑嫻叫停，即時拉裙大叫，擘大個口，反應大到不得了，連佢老公都嚇到呆咗。 ####
全站熱搜
留言列表
{{ article.title }}
