助手喺街上不停講嘢，化咗妝嘅嘟嘟就好有耐性咁聽。
咪俾藝人表面呃咗呀。藝人都係人，私底下如同你或者牛頭角順嫂，一樣要呼吸要講是非要撩鼻屎。好似幕前正經八百嘅嘟嘟原來口水多過茶；謝安琪台上潮台下竟然娘；Sammi明明愛得高調，偏偏要低調撐男友。好心啦，你哋表裏如一連戲啲好唔好？
嘟嘟口水多過雨花
呢輪香港成日狂風驟雨， 搞到媽咪姐鬼死咁心煩，不過陰晴不定嘅天氣，似乎影響唔到鄭裕玲（嘟嘟）。媽咪姐早前喺九龍城撞到正準備返商台開咪嘅嘟嘟，雖然當日落住毛毛雨，但嘟嘟同助手唔嫌煩， 擔住遮一邊傾偈一邊遊街，上車時仍雞啄唔斷，鬼咁長氣。不過正常嘅，有開心嘢梗係想同人分享。嘟嘟主持嘅電台節目《口水多過浪花》，收聽率持續向好，加上佢上周為《me！》影嘅封面好評如潮， 唔開心就假。
鄭秀文至愛男友衫
呢排突然對煮飯仔有興趣嘅鄭秀文（Sammi），自言學習廚藝是「這陣子嘅大興趣」，更揚言未來第一站就係廚房。煮得多自然食得多，梗係要做運動keep fit啦。最近Sammi就喺微博上載跑步之後嘅相，佢身上着住嗰件藍色T-Shirt，媽咪姐愈睇愈覺得熟口面，先醒起件衫原來係安仔25周年演唱會嘅大會T-Shirt。不過Sammi有啲怕羞，將心口上面嘅「25」字樣遮住。哎吔，都愛得咁光明正大，仲怕乜醜啫。
謝安琪強國look遊街
媽咪姐成日都覺得做人行得正企得正，行步路都醒神過人。上個禮拜，媽咪姐喺中環行行吓街， 見到有個戴住白色帽、幾乎遮晒成塊面嘅女人喺停車場行出嚟。驟眼睇，以為係打扮娘爆嘅強國女人，再望清楚啲，先發現係謝安琪！其實嗰日唔算好猛太陽，而且頂帽唔靚唔潮又誇張，真係唔戴好過戴啦。 ####
嘟嘟同助手由街頭傾到上車，即使落住雨都唔怕，所以話女人要吹水， 真係咩環境都啱！
嘟嘟依家每天輕輕鬆鬆開工，與少爺占同Donald吹水90分鐘就收工，錢真係易搵。
容祖兒喺微博落足鞋油，猛讚嘟嘟為《me！》影嗰輯相好索，仲話嘟嘟「一出手就趕盡殺絕」，真係世界女。
Sammi身上嘅藍色T-Shirt同許志安嗰件，款式一模一樣，分分鐘係安仔着過都唔出奇。
頭戴白帽嘅謝安琪，形象跟平日出鏡時好大差別，唔睇清楚仲以為係內地同胞。
留言列表
{{ article.title }}
