喪隊3啤
Mark跟女友的友人明顯不相識，消夜初段，他只顧喪隊啤酒，少有傾談。三杯到肚，Mark才開始提及欣宜。
娛聞樂 早前，鄭欣宜與長跑好手Mark Ryan五年情玩完。分手不久，欣宜火速搭上大隻韓模崔豪晉（Jin），煙韌到出面。
據知眼火爆的Mark不甘示弱，近日頻頻帶竹升新女友見親朋戚友，擺明向欣宜示威。唔單止咁，上周二（12日）晚，本刊目擊Mark與新女友到尖沙嘴食消夜。隊了3杯大啤後，Mark開始酒後吐真言，記者親耳聽到他向友人笑欣宜「so fat」，更數落視欣宜如半邊女的前經理人陳淑芬「horrible（恐怖）」。
如此完唱，態度認真唔要得。
欣宜自從今年4月高調戀上六呎高大隻靚仔韓模崔豪晉，更不避嫌帶男方返自己香閨，而舊愛Mark則局住搬離昔日與欣宜同住的西半山嘉和苑愛巢，一支公遷往砵蘭街舊樓。
據知Mark對於欣宜比他先有新戀情一直心有不甘，經常whatsapp欣宜慰問，其實借故探聽對方感情發展。據Mark友人透露，5月初他在友人敍會中認識了竹升妹並火速撻着，自此經常帶新女友介紹給親友認識，乘機向欣宜示威。
新女代唧暗瘡
上周二（12日）晚十一時許，記者發現Mark陪新女友，與數名相信是其女友的友人在尖沙嘴「乾杯」日式串燒店消夜。可能太夜關係，Mark甚少吃東西，反而專注隊啤。起初他少有跟同枱友人傾談，只顧與打扮性感的女友卿卿我我。女方不時𠌥低身請阿Mark食波餅，又以「honey」稱呼男友。但最噁心的，是女方竟當眾替honey唧去額頭暗瘡，Mark卻十分受落。隊了3杯啤酒後，Mark開始放下戒心，主動跟新相識的友人閒聊。記者親耳聽到他們部分對話，Mark言詞間企圖否認跟舊愛欣宜的一段情，更直踩對方肥，認真冇品。 友人A：Have you dated Joyce before ?（你同欣宜之前真係拍過拖？） Mark：……I treat her like my little sister！（我當佢細妹咋！） 友人B：Can you talk about her ? （講吓佢吖！） Mark：Oh！She's so fat…haha… but she is brave and eager to improve herself.（佢好肥……哈哈……但係佢好勇敢同上進。）She has a horrible manager. We're wrong if we stay together. （佢有個好恐怖嘅經理人，我哋一齊好似係錯事咁。）
陳太：一定企欣宜嗰邊
眾所周知肥姐沈殿霞生前好友、張學友經理人陳淑芬，在肥姐離世後，一直視欣宜如半邊女。欣宜簽約星煥唱片，陳太便是介紹人，在此之前亦不收分毫替欣宜接工作，Mark口中所指的「horrible manager」，矛頭直指陳太棒打鴛鴦。對此指控，上周五（15日）陳太出席太極演唱會記招時硬撐說：「我唔覺得佢矛頭指我喎！邊啲人講乜做乜根本唔使理會。（分手）成件事我冇過問亦冇參與，我睇報紙先知。」當記者複述Mark笑欣宜肥，陳淑芬反應最大：「嫌佢肥？唔係嘛！咁我一定企Joyce嗰邊啦！只要佢開心我一定支持佢！（欣宜同Mark仲有冇見面？）聯絡都少，更何況見面。（覺得欣宜嘅韓籍男友如何？）我又唔覺得佢哋拍拖喎，朋友啫！」事後記者多次聯絡欣宜，惟截稿前仍未獲回覆。
欣宜原諒韓模男友
今年4月，欣宜被揭與31歲的六呎韓模Jin撐枱腳後，不時被影到甜到漏拍拖，即使上月尾Jin被本刊拍下與味之天使「柑桔」雨中漫步兼攬到實，但事後欣宜都戀愛至上，原諒男友。自此與男友愛得更高調，本月初二人竟在人多的港鐵車廂不避嫌纏綿，之後更齊齊返回欣宜的西半山香閨。早前Jin更公開表示唔覺得欣宜身形肥，睇嚟欣宜揀Jin係正確選擇。 ####
欣宜與Mark熱戀時，有如糖黐豆，想不到分手後，男友在外人面前彈欣宜肥。
欣宜其實都有瘦過，03至10年間修身堂幫她減肥，由220磅減至130磅，惟近年又翻脹不少。
當眾唧瘡 Mark雖然與新歡只拍拖個多月，但竹升妹性格open，當眾幫男友唧暗瘡，核突當情趣。
肉緊啜爆吃至中段，Mark等人轉到室外吸煙區，記者再無法聽到Mark有否再彈欣宜。只見他卻不時做鬼臉討好新女友，情到濃時更肉緊啜爆對方額頭。
上周五（15日），陳淑芬得知Mark嫌欣宜肥時，反應甚大，表示一定撐欣宜。
秋官對欣宜十分緊張，知道愛女與Mark分手，即表示：「分手當然有少少可惜，但無論點我都支持你。」上月30日，秋官更專登陪欣宜慶祝25歲生日。
留言列表
{{ article.title }}
