騎呢縮肚有肚腩仔最多俾人話baby fat，但湯洛雯大力縮肚，令小腹變晒形，真係好礙眼囉！大熱還大熱，佢呢副怪S身材，媽咪姐睇完都笑咗出嚟，唔怪得王晶話今屆港姐身材差勁全部要out啦！
港姐八日嘅倫敦外景， 因為是非太多，眨吓眼就過， 媽咪姐連去過白金漢宮都爭啲唔記得。一到埗陳百祥（叻哥）就將啲佳麗分成兩組對決，咁啱得咁蹺啲大熱佳麗湯鎮業姪女28號湯洛雯、張堅庭外甥孫17號張名雅、大熱門29號曾明俐同「翻版陳妍希」25號陳潔玲等，全部同組，好大機會內定啦！咁多日外景，湯洛雯都係獨家村。鬼咩！媽咪姐收到風，佢為順利入決賽，背後搞咗好多小動作。金手指一出，結果「浴照佳麗」鍾麗，同青春貌美嘅陳華鑫要執包袱返港。湯洛雯殺人於無形， 仲唔係攪屎棍？
16位佳麗喺英國分成A、B組對決，結果A組輸咗要即場互out，宣布結果時湯洛雯頭耷耷扮唔開心，咁好戲，無綫又咁睇佢，一選完就可以拍劇啦！
罪行1屈陳華鑫食煙
有工作人員透露，湯洛雯四圍唱陳華鑫喺酒店房食煙，令工作人員同記者對陳大打折扣。事後媽咪姐向陳華鑫及佢嘅同房朱千雪求證，兩人都話冇啲咁嘅事。無啦啦俾人打毒針，真無辜。
罪行2唱鍾麗發姣
早前鍾麗男友Man Yu突然post自己同女友去旅行喺酒店自拍嘅浴照，令鍾麗曝光率飆升。去到倫敦後，有知情人士爆湯洛雯成日暗寸鍾麗發姣博上位，又唱佢專登叫男友post浴照上網，令佢俾同組佳麗杯葛。喺佳麗自行投票即時淘汰環節中，其他佳麗訛稱會投自己，鍾麗信以為真，投咗自己一票，間接out咗自己。
罪行3扔同房行李
湯洛雯有高層撐腰，惡到明恰同房竹升妹李渼琦。好彩另一佳麗尤蔭蔭睇唔過眼爆料，直斥湯洛雯喺酒店房亂扔李渼琦嘅行李，最離譜係將用過嘅濕毛巾同着過嘅底衫褲放喺人哋張牀。但湯洛雯扮無辜話：「唔知點解傳啲咁嘅嘢！」
罪行4向高層投訴
知道有佳麗踢爆自己真面目，湯洛雯即時發功， 向無綫高層投訴。據知尤蔭蔭同李渼琦喺投訴當晚，即俾無綫高層照肺，叫佢哋唔好再搞事。
挑戰惡勢力
竹升妹李渼琦在好姊妹尤蔭蔭力撐下數臭湯洛雯，指證湯將用過嘅濕毛巾同bra放喺佢張牀。敢公然挑戰惡勢力，媽咪姐欣賞你！
阿叻傍實
冇佳麗肯做姊妹唔緊要，湯洛雯全程有阿叻睇實，每次出外景，阿叻成日同湯洛雯雞啄唔斷。有人撐腰，唔怪得可以恃勢凌人啦！
港姐水着 恐怖過睇《怪談》
港姐喺英國話係由一班隱形評判俾分，選出三甲人選。邊個有份做評判，媽咪姐真係唔知囉！不過選出嘅冠、亞軍都周身肥肉，仲有鬆弛籮同大量橙皮紋，而季軍湯洛雯就肋骨大過胸。睇港姐水着，真係恐怖過睇《怪談》。 ####
被out雙妹論樣貌論身材，陳華鑫同鍾麗都唔弱，就係有威脅先俾人殺囉！周六被飛翌日上機返港，返到香港就齊聲炮轟賽制唔公平。依家先知，太遲啦！
獨家村有指湯洛雯英國之旅極度唔受其他佳麗歡迎。現場所見，每次大家圍埋傾偈，湯洛雯都埋唔到堆，有圖有真相。
冠軍籮鬆 29號曾明俐 26歲的曾明俐高頭大馬，雖然學歷只得文憑程度，但暫時得分最高直入決賽，即使肚腩凸籮又鬆，依然對自己信心十足。
亞軍肉騰騰 17號張名雅有堂舅公張堅庭撐腰的張名雅，第二高分入決賽。着泳衣周身肉嘅佢，仲有一對嚇人象腿。好心啲大熱門修吓身啦！
肚有摺痕 24號林泳淘走奶露半球，仲話feel唔到個胸涼浸浸。再睇清楚啲，佢肚上面嗰條摺痕咁明顯，遲啲會唔會俾人傳生過仔㗎？
岩石胸生瘡 11號王舒銳身材算係平均，好可惜個胸被指似岩石，而面部同胸邊都生晒大瘡，又冇猛人撐腰，睇怕下一round未必有得留低。
留言列表
{{ article.title }}
