我 Laughing唔會認輸！I will be back！（設計對白）

盛傳喺頒獎禮當日上晝，無綫七位高層得知，觀眾投票結果係鄭嘉穎跑贏謝天華成條街，即時召開會議商討視帝人選！最後鄭嘉穎得到六位高層支持，加埋眾多監製力撐同觀眾票，贏晒！謝天華似乎亦心知大勢已去，頒獎禮當晚全程無乜心機，扁晒嘴。



我九姑娘講嘢，你要聽！（設計對白）

《萬千星輝頒獎典禮 2011》完咗幾日嘞！攞頭獎嘅鄭嘉穎、胡杏兒固之然笑晒喊晒做晒封面，媽咪姐都戥佢哋開心，但更加想同賽前大熱、點知臨門脫腳嘅謝天華講番兩句。
查實，早兩個月媽咪姐已經講過力撐「 Laughing哥」，因為睇住佢由低做起，從一個舞蹈員到進軍大銀幕，再入番 TVB拍劇，撐到今時今日，終於擔正出人頭地，每步都有血有汗！感情分，我俾足㗎。

臨近頒獎禮，媽咪姐喺跑馬地撞到謝天華。嗰時盛傳無綫為力谷其新片《潛罪犯》，內定佢做視帝。 Laughing哥自然心情大好，去萬寧買雞精都識笑，仲 chok住過馬路！





06年，謝天華喺《女人唔易做》做第二男主角，演吳美珩嘅偷食賤老公，一啲都唔 chok，仲搶鏡過第一男主角林峯。

不過，星期一（ 5日）睇完頒獎禮，覺得「九姑娘」鄧萃雯真係心水清，一語道破謝天華落敗原因：佢話謝天華因為當年喺《女人唔易做》扮「賤 man」攞唔到獎，大受打擊，所以由實力派變做偶像派，仲攞咗林峯個 chok樣㖭！係喎，媽咪姐差啲都唔記得咗，那些年開始留意到謝天華，就係睇佢喺《法網伊人》扮哨牙漏口律師，仲搶戲過男主角李克勤！然後，追《女人唔易做》，學阿 G.E.M.話齋，直情想打爆個電視機，懲戒吓「賤 man」呢啲傷盡女人心嘅衰老公。
正如「九姑娘」讚鄭嘉穎豁出去做《怒火街頭》，其實做人做戲嘅道理，咪又係一樣！當年由影圈轉戰電視圈嘅謝天華，又係豁咗出去，唔介意形象，先愈做愈好。只不過，《學警狙擊》嘅成功，令 Laughing哥開始專注咗喺 chok嘅事業，而忘記咗演戲嘅真諦啫！
唔緊要嘅，世事無絕對。 06年，鄭嘉穎咪憑 chok住個樣嘅《天幕下的戀人》攞視帝囉！結果，俾人噓爆，仲灰咗幾年。有啲嘢，係你嘅，終歸都係你！從特別渠道換番嚟嘅，未必好囉。媽咪姐見謝天華喺賽後回應話：「今年唔得，出年再嚟，要學 Laughing哥有不死精神。」有鬥心係好事呀。不過， chok呢家嘢，都係減啲啦！或者，留番俾林峯。

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄