先擺酒後註冊呂慧儀與 Dickson下周二先擺酒，註冊儀式會稍後在歐洲補辦。

「長腳蟹」呂慧儀將於下周二（ 13日），與拍拖 10年的前港男黃文迪（ Dickson）拉埋天窗，在會展新翼筵開 30席，夠晒排場。
結婚消息公開後，呂慧儀被指下嫁窮港男，但據知呢次搞結婚，由旅行影結婚相、女家禮金、專人設計婚紗，以及酒席等逾百萬花費，全程都係由 Dickson拍心口搞掂。長腳蟹一個仙都唔使出，難怪她忍唔住晒命：「到時我帶個人帶個手袋就嫁得， 着咩婚紗都唔使我煩。」

呂慧儀近年與曾志偉、黃秋生先後傳緋聞，不過真命天子始終是拍拖 10年的落選港男黃文迪（ Dickson）。



我老公唔係窮港男!（真實對白）向來走性感路線的呂慧儀，做人老婆後唔知會唔會從良收胸呢？

Dickson是 08年落選港男，當年他爆肌成為大熱，不過最後名落孫山。

泰國小島婚照

 



早前呂慧儀突然在微博自爆婚訊，呢張靚相喜帖雖然設計簡單，但好有 feel。

呂慧儀與 Dickson都係模特兒出身，影婚紗相擺 chok樣當然毫無難度。

雖然在毫不知情之下影婚紗照，但呂慧儀都非常投入，靚人靚景，效果令她非常滿意。

心形鵝肝求婚

三個月前黃文迪帶呂慧儀去泰國小島旅行，以「留念」作藉口，軟硬兼施女友即場拍婚紗照。回港後 Dickson再出動鮮花、鑽戒及單膝跪地，同場自製心形鵝肝及牛扒，向長腳蟹求婚。
求婚後 Dickson即 着手籌備婚禮，他只問了呂慧儀「需要甚麼形式的婚禮？」，呂只簡短地答了「自然」兩個字，便再沒有參與籌備的工作。近日呂慧儀一劇接一劇， Dickson除了落手落腳搞結婚外，還負責所有開支。男方知女友怕煩，婚禮將不會鋪張，只安排在會展新翼展覽廳筵開 30席大宴親朋，註冊儀式將會稍後在歐洲補做，之後再去馬爾代夫度蜜月。
據知， Dickson找了一間婚禮統籌公司協助辦婚禮的瑣碎事，但禮金一事他就非常緊張。知情人士透露：「 Dickson知蟹仔（呂的暱稱）好錫屋企人， Dickson愛屋及烏，每個禮拜都陪佢媽咪飲茶，過時過節就送禮，行外母政策，所以蟹仔媽咪好早已經接受呢個女婿。 Dickson思想傳統，佢知蟹仔呢排忙，竟然自己殺上準岳母屋企傾禮金，仲話擺酒時女家人情全歸女家，誠意十足。」

呂慧儀下周二(13日)出嫁，多年好友徐淑敏及沈卓盈因工作未能做陪嫁姊妹，仍不忘送上祝福。



唔知幾時輪到我呢？真實對白

人情一定唔會少。真實對白


Dickson表示最近忙於籌備婚禮，花百萬結婚事小，最緊要給女友留下難忘回憶。

粗略估計，拍婚照、酒席、搵婚宴統籌公司、禮金及度蜜月等，已動用 Dickson逾百萬儲備金，呂慧儀則一毫子也不用花。
「蟹黃戀」拍拖 10年，呂慧儀的事業發展一直比男友理想，故外界一致認為女尊男卑。但其實 Dickson甚有上進心，參選港男只是玩票性質，早年他已經考獲健身教練牌。現在是全職私人教練，每小時收 2千，加上他當了 model多年，目前是 Elite模特兒的他，不時接拍廣告和商場騷，多年來搵落唔少。而兩人現時同居的屯門海翠花園，更是 Dickson的物業。

呂慧儀：老公唔係窮港男

對於男友的誠意，呂慧儀在電話中甜到漏回應：「我連件婚紗係點都未知，真係 Dickson安排晒，我冇出過錢同力，嘻嘻……我老公並唔係窮港男，佢叫我帶個手袋就行得。」而 Dickson本周二亦肉麻表示：「我愛佢就乜都值得，幾錢都值，唔好下下講錢，我只想俾個驚喜佢，令佢開心。」

百萬婚禮

泰國小島拍婚照約$50,000
求婚+結婚戒指約$80,000
婚禮統籌公司費用
（包婚紗及印帖等）約$80,000
禮金約$280,000
酒席約$12,888 x 30（席）
歐洲、馬爾代夫
度蜜月約$160,000
總花費：約 104萬

Dickson搵錢有方

Dickson08年參選港男大熱倒灶後簽無綫，兩年後離巢，轉任全職私人健身教練及營養師。此外他更是 Elite旗下模特兒，拍廣告收約五至八萬，商業活動收兩萬、雜誌拍攝每小時收$1,000至$1,500，收入絕不比女友呂慧儀少。



Belle脫毛廣告約$60,000

Spy Henry Lau服裝廣告約$40,000

《高達模型展》情侶檔活動約$20,000

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄