沒想到，官恩娜會跟我談人生哲學。

十來歲時，她評價自己是個憂鬱少女；廿來歲時，有記者抨擊她是隻說話不懂停下來的吱喳鳥；三十來歲，她變了沉實的小女人，縱使說話速度仍然很快。

「年代唔同，好多嘢都唔同咗，我覺得依家嘅三十歲即係以前嘅二十歲。

「人生個畫面，有好多唔同嘅嘢，仲有家庭同好多唔同嘅嘢，我覺得會有好事發生，人生係the best is yet to come，到死先知邊樣係最好。」

不用跳開心舞，也能時常保持開心狀態，當陷入情緒低落時，她又有一套獨門秘方拯救自己。

「其實我好容易唔記得唔開心嘅嘢，只要對得住自己同天地良心，唔使太多壓力o架！我覺得人生好簡單啫，唔需要諗太多，無論點樣，日子都要過，你自己揀點活啫！」

有得揀，你至係老闆。

不可思議的血清素

官恩娜在這個圈子七年，如她自己所說，未必每樣工作也有高曝光率，但由出道至今沒有得閒過。忙碌依舊，轉變的，是心境。

「忙嘅時候你需要少少時間靜靜哋諗吓嘢，唔係好似細路女成日喺度嘈。有少少思想空間去諗吓自己嚟緊嘅工作，對成件事更加認真，以前唔會諗太多嘢嘅，做嘢之前冇咁準備好要講啲乜、要點樣走位，依家就認真啲諗，總之盡力！

「我個人經常睇吓可以點樣改善到自己，Be a better person係我嘅永遠哲學。到底點樣人生健康啲？有意義啲？例如做吓運動。

「將自己打扮得最整齊最漂亮係對人哋嘅尊重，化妝時會注重化眼妝，同人傾偈你望人哋對眼o架嘛，對眼靚啲，人哋望你都會覺得pleasant（舒服）啲。」

不少藝人，視讓人開心為基本義務。身為藝人的，卻容易被聲色犬馬世界迷惑，情緒低落甚至患上抑鬱症的，時有聽聞。

「我睇過身邊好多個案，當你係第三者身份，用唔同角度去睇一件事會特別清晰。好多人都有情緒問題、都市病、急促生活令佢哋喘不過氣。我覺得佢哋煩惱嘅事唔係咁值得煩惱，只係佢哋睇嘢觀點問題。當我發現原來你用唔同角度睇一件事係完全可以唔同感覺，有時當自己有啲唔開心，有啲疲累，我就試吓抽身出嚟用第三身去諗，提醒番自己呢件事唔係你想像得咁誇或者咁嚴重，只不過因為你係第一身，你就覺得係衝住你而嚟。

「你有時睇番啲人，佢憂鬱，其實佢冇嘢憂鬱o架嘛！如果你諗得科學啲，係血清素輸送問題！令到大腦感受唔到開心！一切都係你腦裏面化學物質作怪，你補充番啲血清素就得。如果我好唔開心，我就諗又係我腦裏面啲血清素作怪。點解要畀啲咁嘅化學嘢、一啲外在嘢影響到自己？」

理性程度媲美不少男孩子，而且，她說那些科學理論時的速度分外快，證明那已是滾瓜爛熟、早已牢牢植根在她腦海裏的道理。

洋妞性格

與時下港父港母不同，官恩娜父母愛冒險，十幾年前，純因官恩娜個人主觀意願，媽媽一句：「哦，你咪去囉！」官恩娜順利地渡洋過海到英國伯明翰讀書，她形容那時自己甚為憂鬱。

「嗰陣個人好黑暗，天氣又唔好，嗰段時間培養咗嘅自己係好憂鬱，又未有能力照顧自己，太細喇！嗰陣時又唔知點解覺得應該去，都唔知自己諗乜嘅！」

數年獨立生活，塑造了她與別不同的鬼妹仔性格。

「有一次我去茶餐廳，食咗兩個餐應該有兩杯嘢飲，我冇叫到，話飲杯茶得喇，因為我諗我飲唔到杯嘢，費事嘥啦。我朋友話佢未聽過一個中國人會咁講嘢，外國人就會咁做。係中國人嘅話，我嗌咗一個餐，我飲唔飲你唔好理吖，我都要嚟一杯嘢飲先！香港人係冇可能會為唔想嘥杯嘢而唔要自己杯餐飲嘅！我話：『吓！係咩？我係咁外國人咩？』我都幾開心喺香港，中西文化都啱我，但我最鍾意香港，最鍾意廣東話！」

讓人重新記起她歌星身份的，卻是英文歌〈Endless Love〉。

「好慶幸有《超級巨聲》，機會唔係必然。多咗好多朋友留意我唱歌、工作，多咗好多正面報道，成個形象好咗好多，哈哈。幾感動，感動到喊。

「天時地利人和，人人際遇都唔同，有啲人好恨要一啲嘢然後會精神上折磨同虐待自己。我好多嘢都好滿足，一入行冇幾耐有許冠傑搵我做佢嘉賓，無綫搵我拍劇，老闆一路對我好好，咁多年幫我出碟，身邊同事相處好融洽，好難o架！搵到一啲合作得好嘅夥伴都係福氣嚟。」

浪漫冀盼

極端理性背後，也有虛無飄渺一面。

「我好想拍啲好浪漫嘅電影，一部電影拍咗之後好似capture咗個moment永遠都存在喺度。好鍾意睇戲，投入咗之後所有嘢都變咗真咁，嗰兩三個鐘真係活喺嗰個世界，所以我好鍾意嗰啲浪漫、好似《Titanic》咁浪漫！嘩，次次睇佢都好似曾經擁有過一個咁浪漫嘅愛情故事，似參與一個流芳百世嘅愛情故事成為經典！喺真實世界，好似我哋咁多奇怪嘅事發生，咩都會遇到o架嘛，始終咁特別嘅情節唔會成日有，尤其是驚天地泣鬼神嘅愛情故事。

「我期待將來，有個感覺會係永遠有啲好嘅事，會係……好好呀、好開心，生活會愈嚟愈好，就係有種咁嘅感覺。有啲人乜嘢都驚，會有壞事降臨喺自己身上嗰啲。點樣鋪條路行到去嗰個又幸福又快樂嗰度，我又唔可以具體話到畀你聽喎，總之諗到將來我就充滿希望。」