何韻詩秘溝台灣女星　容祖兒試愛金融鱷少 FACE 週刊 246期 @ 娛樂八掛大放送★

02年被拍得當街煙韌揼骨，容祖兒和何韻詩被傳斷背戀傳足10年，兩人亦被公認圈中一對。不過本刊收到可靠消息，原來2人已經「分手」個多月，花心何詩最近因演出舞台劇《賈寶玉》，而喪溝「12金釵」之一的台灣女星路嘉欣。而曾經同男仔拍過拖嘅祖兒，雖跟何詩密友關係長達10年，但對異性仍然有市場。坐擁2.2億身家嘅天后，當然要門當戶對，據知經容媽媽介紹下，認識36歲金融鱷少劉鎮鴻（Jeffrey），為溝掂祖兒呢位樂壇一姐，Jeffrey先後替容媽媽投資物業有所斬獲。上年10月，2人首次約會，快將32歲嘅祖兒更跟身邊好友透露︰「原來女人都係信唔過。」

何詩上年演出林奕華的舞台劇《賈寶玉》，與劇中12位女演員組成的「12金釵」超friend，其中曾與張震拍拖6年嘅台灣女演員路嘉欣，同何詩行得最埋。一向有女就撩嘅何詩又經常借故到台灣搵路嘉欣。知情人士說︰「搞完套舞台劇，阿詩同12條女玩得好埋，尤其係Jozie（路嘉欣），成日匿埋喺房玩WhatsApp，阿詩又成日飛去台灣，以錄音為名，6月喺台北搞音樂會，Jozie仲帶埋好友青峰（蘇打綠主音）一齊去捧場。」

上女同志刊物爆性向
32歲路嘉欣，02年以歌手身份出道，但出咗一張專輯《你不懂》就冇下文。近年主要演出偶像劇、電影，其姊路嘉怡亦係台灣知名藝人。事業未有代表作，路嘉欣最為人知就係同張震嘅6年情，不過於07年已分手。今年1月，路嘉欣接受台灣女同志雜誌訪問，大談《賈寶玉》跟何詩愛得纏綿，又話現實中12位金釵感情好到不得了，仲話唔排除未來愛上同性，佢話︰「當我愛上同性，毋須大驚小怪。」提到以前嘅感情，路嘉欣仲喊到收唔到聲。

未來「老爺」來頭勁
祖兒的新歡Jeffrey除了是美國哈佛大學商學院畢業的高材生，父親亦來頭甚勁。劉父劉壬泉曾為恒基集團執行董事，當時亦係美麗華酒店、香港小輪及36間私人公司嘅董事，雖然上年已經榮休，但多年來眼光獨到，83年曾以個人名義300萬購入山頂白加道41號柏架別墅一單位，早年賣出時已升值為2000多萬，勁賺7倍。

10年情轉淡
雖然何詩口口聲聲話「身冇屎」，但《賈寶玉》本週六在港再重演，3月將到國內巡迴演出，她與路嘉欣起碼再對足半年。有見於此，祖兒最終決定斬纜。知情人續說︰「1月左右，2個人終於和平分手，再見亦是朋友，其實咁多年都淡咗好多，加上2個嘅事業分別愈來愈大。最近有個飯局，祖兒仲同身邊好朋友講話，女人咪又係一樣花心，一樣信唔過！」其實，上年新城頒獎禮慶功宴上，祖兒被問到聖誕是否去何詩家，祖兒亦露玄機︰「你唔係問我㗎咩？係咁問佢，一係你問番阿詩啦。」原來當時二人已醞釀分手，唔怪得祖兒不願多提何詩。

教路變樓后
樂壇一姐祖兒年賺起碼2000萬，呢幾年密密買磚頭，加上自前年其母認識Jeffrey後，祖兒更大手入貨，包括維壹單位、松柏新邨單位、深灣軒及東港城等。合共持有市值約2億2千萬物業，絕對是名副其實「樓后」。

金融才俊力溝
有傳祖兒坐擁2.2億物業，原來有幕後功臣，而且更係容媽媽為女兒穿針引線嘅好姻緣。據知早於2年前，容媽媽認識了石庫門資本管理公司創辦人劉鎮鴻（Jeffrey），2年內，幫容媽媽手上嘅投資搞得有聲有色，現年36歲嘅Jeffrey生得高大英俊，哈佛商學院畢業，是管理對沖基金專才，前年被創業版上市公司高誠資本併購後成高誠第二大股東，持有股份市值超過1.4億，名副其實金融才俊，而且經常同圈中人打交道，更曾分別跟葉璇及鍾麗淇傳緋聞。雖然Jeffrey跟容媽媽認識咗一段時間，但Jeffrey最近先向容媽表心意，容媽媽終於在上年安排2人見面。知情人續說︰「祖兒搵咁多錢，又係天后，平時根本冇男人敢埋佢身，個個都驚自卑，反而Jeffrey好積極，最初祖兒諗住只係date吓，都有同阿詩講，但阿詩反應好冷淡，仲好寸咁話『你靚女咪多人追囉！』加上祖兒好孝順，最信嘅人就係阿媽，容媽媽覺得Jeffrey信得過，起碼唔似何詩咁周圍去撩女啦！本刊週一致電劉鎮鴻公司，其公司職員稱他不在香港「出咗trip」。而祖兒經理人Mani，問到何詩是否喪溝路嘉欣而被祖兒狠撇，她則說：「首先祖兒一向都唔評論其他人嘅事，佢同阿詩一直都係朋友。如果朋友真係搵到真愛嘅，我會替佢高興！（咁係咪有個金融才俊Jeffrey Lau追緊祖兒？）嘩，係咪真係有咁筍呀？我唔知道喎！如果係，我就安樂晒啦！」「容詩戀」10年情玩完，眼見其他天后都排住隊結婚生仔，筍盤在前，祖兒去馬啦！

不停撩女
何詩性向已係公開嘅秘密，02年被影到同祖兒當街煙韌，祖兒仲同佢揼骨添（左圖）！其實早於祖兒，何詩曾與Bobo（陳文媛）同Theresa（傅穎）行埋，但同祖兒呢10年間，何詩亦不時放電，身邊朋友都知佢最冧係Sammi，可惜神女無心；上年又搵咗舒淇做佢MV女主角，不過舒淇又係唔過電囉。 ####

撇何詩1個月何詩頻頻去台灣，祖兒身邊又有追求者，近呢幾次出席活動都貌合神離，「容詩戀」正式玩完。