韋家雄得5呎4吋高，與葉翠翠5呎9吋幾乎差成個頭，不過韋家雄有間LED燈公司，收入都唔錯，論搵錢能力應該好過翠翠緋聞男友高鈞賢啩。
《4 in Love》上映一週，反應冇神劇《天與地》咁爆，不過溫馨小品，平均收視28點，算掂。
除陳豪、佘詩曼跑出，網友最like飾演控煙辦「包皮男」韋家雄。雖然39歲韋家雄樣子戇直，圈中打滾20年至今日才稍為彈起，但勝在默默耕耘，完全唔靠金牌編劇監製大佬韋家輝關係走捷徑。連韋家輝都大讚細佬：「家雄好有骨氣，一直冇求過我！」
39歲韋家雄，92年入行，第一套作品係亞視《伯虎為卿狂》，95年過檔無綫，拍攝《真情》大力仔一角令他算係多咗人識，更同苑瓊丹傳出緋聞，不過唔係無綫親生仔嘅佢，近年無綫演出機會較少，直到最近《4 in Love》憑控煙辦督察鍾炳良一角，常被劇中阿媽催「割包皮」，而令一眾網友關注。
唔使大佬關照
娛樂圈借刀上位最易，韋家雄亦有個猛料胞兄韋家輝，第一代無綫神劇《大時代》編審兼監製。韋家輝近年轉戰電影亦夠實力，不過翻查資料，原來兩兄弟在娛圈活躍多年都冇合作過，韋家輝監製的電影中，連一個小角色都冇預過韋家雄，以為兄弟關係麻麻，原來情同手足。上週四（2日）韋家輝出席其監製的《高海拔之戀Ⅱ》首映時表示：「好多人靠關係上位，但家雄係一個好用心嘅演員，就連劉青雲都話佢做戲好，佢呢幾年搞LED燈生意，我知佢搞得唔錯，佢應該要獲得更多嘅肯定。（佢有冇要求你幫佢？喺你電影中撈番嗰角色？）家雄好有骨氣，一直冇求過我！」
LED發圍
韋家雄近年多拍港台節目，但原來近幾年跟友人夾份搞LED燈飾生意，亦有聲有色，他說：「一直都有搞開設計燈飾，近幾年搞LED燈生意，08年除夕ifc嘅倒數，我公司都有份設計同製作。家公司仲發展到去日本，搬咗去福岡。其實我大佬（韋家輝）拍《一個字頭的誕生》時有搵過我，但我推咗，我驚做得唔好累咗佢。」娛圈人人靠關係，好似韋家雄呢啲咁有骨氣的演員，真係買少見少。
LED大茶飯
韋家雄07年開始同拍檔呂柏納搞LED燈飾生意，之前公司地址喺明報工業大廈，但最近已結束香港業務，並搬咗去日本福岡，韋家雄表示:「TVB份糧未夠我食兩餐，但搞LED生意都托賴，幾好啦，除咗ifc倒數，10年上海世博法國館嘅LV騷，入面用嘅LED都係我公司作品。公司喺日本福岡，好多時去大陸同日本兩邊走，嗰邊多生意，嚟緊打算再擴充日本生意，始終玩設計LED暫時都係日本人叻啲。日文？我識少少。」
日本吸金
《4 in Love》唔師奶
《4 in Love》係由《天與地》班底周旭明、戚其義炮製，雖然今次監製講明回歸師奶劇，不過兩位鬼才又點會由頭師奶到尾？喺一啲細節位都會寸吓無綫，又寸現時娛樂圈及傳媒！有啲似諷刺娛圈嘅《娛樂插班生》喎！
玩藝人
阿佘飾演嘅國際大明星Chloe，喺第一集舉行記者會宣布同男友分手，無論造型，同台型都同阿Sa前年搞嘅離婚記者會相似。
寸師奶劇
第4集講葉翠翠喺醫院，想睇劇冇得睇，話想睇《父母心事有誰知》，擺明寸《誰家灶頭無煙火》，之後被護士寸佢睇師奶劇。編審周旭明借劇情暗寸無綫師奶劇後生仔唔會睇。
寸傳媒
第5集阿佘向陳豪交代底褲事件，全部都係傳媒喺微博攞相炒作。
玩惡搞
第5集陳豪被當街燒褲露底，更被人起底，之後更被網民惡搞首歌暗寸，相當緊貼現時網民反應。 ####
韋家輝自離開無綫後，多與杜琪峯合作，一直都係票房保證，新作《高海拔之戀Ⅱ》本週四（9日）上映。
罕有合照韋家輝、韋家雄兩兄弟情同手足，不過二人甚少一同出席場合，合照都要在韋家雄微博先搵到。當年四人夾份喺沙田開唱片鋪，左起韋家輝、韋家雄、《長江七號》編劇曾謹昌（右二）和《壹號皇庭》系列監製鄧特希。
韋家雄、葉翠翠喺劇中飾演情侶，拍攝期間韋家雄仲不時寫情歌歌詞喺微博向翠翠示愛，可惜追唔到。
ifc倒數 08年除夕ifc倒數外牆嘅燈飾就係韋家雄公司設計兼製作。
世博LV騷 10年上海世博法國館LV騷入面嘅LED，就係韋家雄公司設計兼製作，認真巴閉！
韋家雄嘅LED燈生意搞得唔錯，前年佢更去咗福岡參加環保展覽。
有2間LED燈飾公司，其中一間韋家雄跟拍檔呂柏納（小圖）夾份經營。
郭少芸飾阿佘經理人，十足十英皇經理人霍汶希。
留言列表
{{ article.title }}
