Linda Chung
黃色闊身上衣$4,995
白色 A字形裙褲$5,695
both Anteprima
白色鏤空蛇皮腰帶$12,990 Bally
cover face
鍾嘉欣“點解得我冇獎？”
我總以為，鍾嘉欣是 TVB一個異數，讀番書選美出身，論條件，不比任何一位花旦差，入行八年，每逢台慶前哨，卻少聞她跟高層飯局送禮密斟，好一副與世無爭的模樣；但，斷估仙姑都想有人讚吓啩！
去年，四劇在手，氣勢應如虹，最後，視后輸俾楊怡，人氣輸俾徐子珊；另邊廂，勁歌只分得一首金曲豬肉獎，話晒親生女，如此成績，情何以堪？「好失望！
「點解得我冇獎？
「我真係咁渣？」一輪反問，嘉欣頓變洩氣汽球。
我勸她，何妨學吓前緋聞男友林峯，擺吓姿態，輸人唔輸陣嘛！
「扭計對我冇意義。」強權之下，唔屈服唔做應聲蟲，呢個姿態，唔止高登宅男，連我都為之傾倒。
Profile
Linda Chung
出生日期： 1984年 4月 9日（白羊座）
出生地：加拿大溫哥華
身高： 5呎 8吋
體重： 115磅
語言：廣東話、普通話、法語及英語。
學歷：加拿大英屬哥倫比亞大學教育學院二年級
簡歷： 03年，奪得溫哥華華裔小姐冠軍及最上鏡小姐。 04年，贏得國際華裔小姐冠軍，並成為電視藝員。 06年，奪得《萬千星輝頒獎典禮》的「飛躍進步女藝員」獎。 08年，推出首張個人唱片。
主要作品：（電影）《十分愛》（ 07），《花花型警》（ 08）。電視劇《皆大歡喜》（ 04），《溏心風暴》（ 07），《點解阿 Sir係阿 Sir》（ 11），《護花危情》（ 12）。唱片《 1人晚餐 2人世界》（ 08），《 Love Love Love》（ 12）。
微博： http://weibo.com/chungchungchung
88年
唔止宅男，就連鍾家上下都叫嘉欣做 BB，仲有細細，兩個乳名 cute到暈，孻女果然集萬千寵愛！《 FACE》圖片
06年
拎完這個「飛躍」獎，事業脈膊彷彿靜止了，連她自己也感無奈。《蘋果日報》圖片
07年
拍攝《十分愛》最大得益，應該係搵到 Mr. Right，嘉欣早前已證二人關係依舊，情未變咁話囉！《 FACE》圖片
我真係咁渣？
Linda Chung
白色鏤空領邊上衣$5,990
杏併白色蛇皮 wedges$8,390
both Bally
彩藍色束腰吊帶裙$5,150 Carven from Lane Crawford
粉藍色外套$28,000 Giorgio Armani
純銀綴皮繩粗手鈪 $5,500 Georg Jensen
親生女鍾嘉欣，在娘家只得過一次獎，便是「飛躍進步女藝員」。「同期出道嘅女仔，連『我最喜愛女角色』獎都拎過，只得我未有，唔知點解？！」這幾年，任勞任怨，聽話密密做，冇功都有勞，我戥佢唔抵呀！
「同期女仔」她直指楊怡、陳法拉、徐子珊、胡杏兒和佘詩曼，阿佘早被捧上一線，餘下五位，鬥得難分難解。
「自己性格被動，好怕被淘汰，成日問自己『係咪唔夠進取？』、『會唔會好低能？』驚自己做得唔夠。」
點會唔夠呢？山大斬埋有柴，她早在加國置上千五萬大屋，有了利，名氣自想更上一層樓； 11年，本來有個大好機會，「《點解阿 Sir係阿 Sir》好大回響，記者、導演都話視后係我啦！點知到頒獎禮當日，主持連提
都冇提吓我！心諗乜咁奇怪？」果然，名落孫山了。
「好失望！猛問自己究竟做錯乜呢？我真係咁渣（演技）？！」幽幽地說出心底話了。
傳聞嘉欣被公司「呃咗」簽長約，賣身契在手，工照開，獎免問。「唔係好長， 33歲就完。」失望還失望，她仍力撐公司待自己不薄。
「公司培訓一個演員，唔係幾年間嘅事。阿怡（楊怡）做咗 14年至拎視后；杏兒 12年；我入行不過第 8年，呻乜啫？太順境會縱壞人。
「我條命係咁啦！初選華姐，冇乜人留意，最終，唔知點解爆咗出嚟。」我真心戥樂小姐慶幸，畢竟，懂得開解自己的演員，真的不多。
終於學識放開
粉黃併粉紅色喱士連身裙$48,000 Valentino
名利最實際，但，隨着人愈大，思想愈成熟，價值觀有變，近年，嘉欣漸漸學懂放低。
四年前，試過連續三個月晚晚失眠，壓力爆煲。「入行前，人好簡單，溫哥華個個朋友都教我嚟到香港生活，唔好再咁小朋友，否則，實俾人蝦；「娛樂圈係大染缸，我想保護自己，成日專登扮大人。」
當初，出席活動面對傳媒，一派官方口吻作擋箭牌，為怕洩露真性情被笑「低能」；入到劇組，唔識睇劇本，又驚被人笑，每晚開住 webcam打電話問功課，遠在天邊的阿爸逐個中文字由發音教起。
「《搜神傳》首次擔正，唔衰得，不停逼自己說話撇除懶音，訓練自己，要喊就喊，要笑就笑……拍到中段，失控喪喊，最後停廠。」自此一役，明白刻意逞強，太辛苦了。
另一件觸動她的起心肝去改變的事，便是驚聞舊同學被繼父斬到一碌碌掉落海的消息，「呢個女仔讀書好叻，點知背後原來咁複雜，件事令到我成個人醒晒！
「入行後，自己一直忙於搵錢，只着緊靚唔靚，其實，生命好脆弱。
「我終於學識放開懷抱開心做人，唔再將每件事情都放到咁大。」
現在，辛苦賺來自在使，每年四月，她例必請大假返家鄉休息充電，順便探望家人，好好相處，珍惜當下，情緒自然跟住好起來了。
Linda's tips
Q：成日通宵拍劇，護膚之道為何？
A：食緊中藥，花旗參、冬蟲草藥粉沖水飲，幾 work。
Q：最鍾意去邊度買衫？
A：上網，最常上去 zipia.net及 asos.com，唔怕撞衫，最驚險一次，買吓買吓，買咗三萬幾銀！
我好易𠱁
Linda Chung
杏色束腰帶上衣$7,270 Chloé from Lane Crawford
米色針織裙褲（未定價） Anteprima
純銀鏤空粗手鈪 $8,600 Georg Jensen
金色珠併小珍珠手鏈$480 TAKAccessory
入行至今，又壓力又冇獎，營營役役多年，點會冇諗過放棄？點會冇試過意氣用事？
尤其是，嘉欣自稱……「我係一個會用情緒解決問題嘅人。」即係 EQ低，又唔似噃！咁點算？「遇到任何事，淨係識驚或唔開心，我好需要一個人，識得幫我分析事情，教我理智地用智慧去解決問題。
「呢幾年，遇到呢個人，佢的確係一個好好嘅聆聽者。」
講到咁白，唔係要逼我呢個旁人講到出口，大聲疾呼「伍允龍」三個字吧？一聽對方名字，她即刻甜晒！「我好易𠱁，得閒煮吓嘢俾我食就得。
「最浪漫係對方曾經親自炮製過一餐飯，由頭盤至主菜、飲品、飯後生果及甜品等，一手一腳去煮，仲要係我最鍾意嘅茄汁意粉。」
二人因合作《十分愛》認識，拍拖五年，關係浮面，甚至乎，已到非君不嫁的地步了。
「呢一行犧牲好大，藝人好少時間好好經營一段感情；「我只需要一段平凡關係，好似陳慧琳，事業攀上高峰，仍然可以兼顧得到一段健康愛情。錢，賺唔完，等我都達到事業高峰之後，自然會花多啲時間放喺組織家庭上面。」事業高峰，大抵指奪獎吧！若照 33歲約滿為期去推論，愈近期滿，爭獎能力愈高，照咁睇，伍先生還需多等兩年。
後記
Linda Chung
粉色併布背心裙$11,300
頸巾$2,300
both Emporio Armani
純銀鑲紫水晶及海藍寶石手鈪 各$2,650 Georg Jensen
前陣子，「嘉欣 BB」一名無故不逕而走，我又以為，這是來自高登宅男的厚愛。
今日，當事人認真清晰地解釋起來，「此名出自《蘋果日報》報導。
「當初，一聽個名就想嘔！」但見肉麻暱稱為自己帶來不少粉絲，增加知名度，條氣至順番。
唔怕更被定型為乖乖女？
「做藝人就要有親切感，有朝一日，當我做反派或智障，別人依然受落兼繼續叫我 BB的話，即係代表我已 ready拎最佳女主角獎囉！」
我冇諗過，獎項對鍾嘉欣來說，原來係咁大一個心結。
Shop List
Anteprima銅鑼灣利園 I期 214號鋪 2167 7386
Bally銅鑼灣時代廣場 211-212號鋪 2506 3312
Emporio Armani金鐘太古廣場 227號鋪 2918 0699
Georg Jensen中環國際金融中心 2082號鋪 2868 3800
Giorgio Armani中環遮打道遮打大廈 11號地下 2532 7700
Lane Crawford中環國際金融中心 3樓 2118 7683
TAKAccessory中環歌賦街 3-5號 2樓 B室 2338 1776
Valentino銅鑼灣利園 I期 111號鋪 2907 2332 
撰文：黃鑑江
形象： Karen Ling
攝影： Parry Fung
化妝： Jessica Chan
髮型： Green Cheung@Chin.G
留言列表
{{ article.title }}
