劉德華單拖到賀，笑晒口擺出招牌手勢同一對新人合照。天王駕到喎！李師傅即刻擺出同樣手勢， chok住歡迎啦。
媽咪姐
李丞責豪婚邊度都有……劉華！
上周六（ 2日）晚， 43歲玄學家李丞責豪花千萬，喺 The Ritz Carlton酒店擺 50圍，迎娶 27歲前港姐冠軍劉倩婷。媽咪姐咁得人鍾意，梗係有份去飲！嘩，嗰晚真係星光熠熠，曾志偉、鍾鎮濤、洪金寶等都親身到賀。不過，講到最勁，梗係請到劉天王劉華嚟飲啦！
當晚佢由進場開始，就被賓客包圍。入到場，仲失驚無神做咗「人肉布景板」，要諗計先可以食碗「安樂翅」呀。咁「辛勞」都嚟飲，唔通係李師傅幫劉華擺陣得女嘅？
場外俾星圍
前港姐冠軍曹敏莉（左二）都有去飲，但一見劉華，就連自己姓乜都差啲唔記得，一手捉住華仔合照，驚唔驚老公張家傑呷醋呀？
場內要走鬼
李丞責哥哥、港台前高層李再唐都請咗唔少 friend去飲喜酒，仲帶埋佢哋過枱去搵劉華握手影合照。華仔初時都笑住應酬！
不過，隨住身後聚集嘅賓客愈嚟愈多，影完一張又一張，劉華嘅笑容亦開始硬軚。最後，佢決定起身行開，匿埋一陣。
人情就俾咗，無理由唔食埋碗翅先走！所以，劉華等人潮散咗，就靜靜雞返枱同洪金寶齊齊隊翅，爽呀。
全站熱搜
留言列表
{{ article.title }}
