滾熱辣
無綫霸道封殺捉蟲 斷旗下藝人米路
上周四（ 21日），無綫突然宣布封殺壹傳媒，除了禁止壹傳媒一報三刊的記者進入電視城外，更向所有旗下藝人發短訊，禁止他們接受壹傳媒記者訪問。即使立法會議員劉慧卿出席無綫新聞部節目《講清講楚》，她也要踏出電視城門外，才能接受記者訪問。封殺事件已引起社會各方面關注，指無綫扼殺新聞自由，霸權再度升級。
封殺事件至今只有一星期，無綫旗下藝人先嚐苦果。據知不少廣告商及公關公司近日向無綫投訴，指限制傳媒訪問，會直接影響廣告及推廣活動的見報率。有不少公關公司為保曝光率，不排除放棄採用無綫藝人。
早前無綫將《東張西望》變成維穩節目，惹來網友發起台慶熄機活動。台慶當日，網友更聚集電視城外撒溪錢，萬料不到無綫竟然將責任歸咎於傳媒。
網民自發圍城
免費電視發牌事件及《東張西望》的維穩環節，已令外界覺得無綫霸權日趨嚴重。加上阿叻陳百祥的「跪拜」論，激怒網民自發響應在上周二（ 19日）台慶當日「熄電視」，令最高收視只有 31點，比去年跌了五點。不過無綫竟然將收視下跌原因，歸咎壹傳媒的報道，最終向壹傳媒落封殺令。
影響見報率
劉慧卿並非無綫藝人，而且她在《講清講楚》的訪問，隨時涉及公眾知情權，但無綫繼續一意孤行，阻止壹傳媒記者入電視城採訪。
臨近聖誕及新年，是藝人賺錢的黃金檔期，亦是公關公司搞活動的高峰期。封殺令實行至今不足一星期，已有公關公司致電無綫了解情況。為免得失客戶，無綫亦暗中酌情處理，「公關打嚟問封殺嘅事，仲講明活動喺公眾場所舉行，一定會叫齊傳媒嚟。我哋都明白嘅，所以記者訪問時都冇得阻。不過，見到壹傳媒咪牌就要循例擋。除低咪牌當唔知邊間囉，大家心照。」知情者說。
雖然不少無綫藝人為免得失任何一間傳媒，情願冒被公司照肺之險走「法律罅」，但封殺令已逐漸影響藝人收入。近年不少廣告商愛採用無綫藝人出席活動宣傳自己品牌，貪無綫藝人形象入屋，見報率亦高，也是「回頭客」的關鍵因素。
「其實無綫同活動搞手簽合約時，冇寫明要接受各大傳媒訪問，但藝人收得啲客錢，梗係想多啲見報，希望個客滿意再有下一次。所以，有時女藝人收錢出席活動，都會着得性感啲，希望第二日見報時張相大啲！今次封殺令一出，唔少搞活動嘅公關公司，費事廣告客戶投訴見報率少，喺呢段敏感時期，咪盡量少用無綫藝人囉！」知情者說。
小生花旦反封殺
本刊就此事曾找過幾間香港大型公關公司查詢，他們亦口徑一致，希望事件快點平息。而 Frement公關公司老闆周美鳳更揚言暫時唔用無綫藝人，她說：「少咗幾間報道梗有影響，除非佢哋（無綫藝人）減價啦！」而 IPS老闆 Peter Wong亦說：「客人揀 artists都想多啲 coverage啦！」
據知無綫大部份藝人都不贊同封殺行動，不過，二、三線以下的藝人卻唔敢出聲，反而不少一線小生、花旦連日來都忍唔住出言力諫。與無綫有部頭合約的佘詩曼說：「作為藝人，唔需要得失任何人，多個朋友總好過多個敵人。」至於無綫的「親生女」胡杏兒就說：「傳媒同公司各有立場，最好係友好關係，大家都唔想有咁嘅事，希望快啲平息干戈。冇永遠敵人，係打者愛也。」而楊怡亦坦言希望與傳媒保持友好的關係。
至於今年視帝熱門人選的馬國明，也懶理隨時失獎說：「的確會少咗平台宣傳，我控制唔到，都是跟公司指引去做，希望只係暫時性。娛樂圈同記者係唇齒相依，希望好快無事。」馬國明愈講愈㷫，更揚言公司禁止壹傳媒記者在公眾地方採訪旗下藝人，實屬「唔合理」。
星夢幫大鑊
最慘還是一班剛冒起的「星夢幫」，據知他們非常擔心今次事件影響星途，「佢哋依家騷價仲係好平，但單靠無綫一個宣傳平台始終唔夠。佢哋擔心冇咗一定見報率，只會愈嚟愈少人記得佢哋。但又唔想得罪公司，驚接受壹傳媒訪問會俾公司雪藏。」知情者說。
記者連日來亦曾就此事搵過一班星夢幫了解，鄭俊弘婉轉說：「公司已經發咗聲明，我唔方便回應。」處境非常兩難。
學馬國明話齋，藝人與記者是唇齒相依，既然無綫掩耳盜鈴搞封殺，不如多花心神度橋提高節目質素，令 700萬香港人心悅誠服地開機。
連累星夢幫無綫月中才成立星夢娛樂集團有限公司，銳意將一班藝員打造成樂壇新星，可惜封殺事件隨時令他們曝光率大減，鄭俊弘、王君馨等隨時明星夢碎。《蘋果日報》圖片 
網民嘲蠢
公關巨頭唔撐無綫
周美鳳要求減價
對於封殺事件，周美鳳說：「品牌搵明星去活動，都係想宣傳，當然希望多啲 coverage。若果因封殺事件，搵 TVB藝人會少幾間報道，梗有影響，除非（無綫藝人）減價囉！件事又唔係公關公司同客人嘅錯，最慘都係（無綫）二、三線藝人啫！」
Frement PR老闆為港姐出身的周美鳳，其公關公司開業多年，與多個頂級護膚品牌合作，統籌大型活動、名太茶敍等。 
今年 9月，無綫藝人曾華倩出席由周美鳳舉辦的護膚產品活動。
鄭紹康曾打俾無綫
天機行政總裁鄭紹康（ Francis）說：「我都有打去 TVB問，佢哋話圍訪就阻唔到，但 DV同有咪牌就會擋。其實依家揀藝人都要睇藝人喺內地嘅知名度，因為香港經濟都係依賴自由行，所以我一向都唔係用晒 TVB嘅藝人。」
Occasions天機公關由賭王千金何超瓊創辦，成立 25年，屬資歷最深的公關公司，曾統籌無數大型活動、時裝騷等，與不少國際級品牌合作，有賭王各房千金做皇牌。 
11月中，鄭嘉穎與阿佘就獲邀出席其聖誕亮燈儀式活動。《蘋果日報》圖片
丁子高照搵壹傳媒
他說：「其實早前已收到 TVB聲明，啱啱都有個活動同徐子珊一齊出席，係我公司搞，我係嘉賓之一。（無綫有無同你講唔答壹傳媒？）冇特別 focus，可能 TVB覺得我知道啦！」
Collaboration Group今年 1月開業，由丁子高與恒美業務總監 Conrad Ng合資成立，已統籌過不少跨國大型活動。公司除了有老婆楊千嬅作為皇牌，亦儲下不少藝人好友。 
周三（ 27日），丁子高與徐子珊出席自己公司統籌的環保活動。當日他亦有邀請壹傳媒記者採訪。
Peter搵藝人睇曝光率
對於封殺事件， Peter說︰「希望以和為貴，客人揀 artists主要睇 image同 coverage，我都會講俾個客知有呢件事（封殺）。其實我見阿佘、杏兒同馬國明都有答壹傳媒記者嘅提問。藝人收得個客錢，都想多啲 coverage啦！」
IPS傳藝公關老闆 Peter Wong與圈中人熟絡，包括關之琳、鍾楚紅及郭富城等紅星。而 Peter與合作多年的李嘉欣份屬老友，包辦其所有活動。 
今年 8月，他邀請陳豪出席珠寶活動。
資深藝人批評無綫
無綫封殺壹傳媒變成社會熱話，不少曾效力過無綫的資深藝人如艾威和郭峰，也批評無綫做法不當。而在無綫的朱咪咪及鄭丹瑞，亦坦言對此政策感到無奈。
艾威：真係好霸道
「無綫話壹傳媒針對佢哋，其實係用錯咗字眼，咁市民要投訴電視節目質素唔好，咁梗係鬧 TVB啦！連用家嘅感受都唔俾人講，真係好霸道囉！」
郭峰：無綫太小器
「無論底下有乜嘢原因都好啦！市民見到無綫咁做，一定會覺得無綫太小器。」
朱咪咪：同傳媒關係重要
「電視台同傳媒嘅關係好重要，希望事件好快解決！我就唔想見到不愉快事件啦！」
鄭丹瑞： TVB咁做冇計
「我係 TVB藝人，梗係要跟住 TVB講嘅做啦， TVB咁樣做，我都冇計㗎！不過我外面嘅工作就唔受影響嘅！」
無綫慣用封殺
封殺 BMA
04年，當時關心妍所屬的唱片公司 BMA將其演唱會花絮及日本受訓片段交俾有線電視播放，因而觸怒無綫。無綫於是封殺 BMA旗下所有歌手足足三個月。
封殺四大唱片
無綫 10年 1月與四大唱片公司的版稅問題起爭拗，於是禁止四大唱片旗下歌手亮相無綫之餘，亦取消他們參加頒獎禮的資格。
封殺過檔舊將
王維基創辦香港電視初期，曾重金挖走不少無綫的台前幕後包括一班小生花旦及甘草演員，有指無綫當時將轉投王維基的藝人列入黑名單，決定永不錄用。
留言列表
{{ article.title }}
