九年炒八個領隊，阿巴莫域治凌晨四點 call迪馬堤奧接大信封，認真代表作。但係依然照出六萬鎊週薪，咁迪馬堤奧當然收嗲啦。

外太空

車路士自焚

2012年11月29日 ~~ 第1186期香港《壹周刊》

如果阿巴莫域治（ Roman Abramovich）做特首，九成官員相信已經被炒。迪馬堤奧（ Roberto Di Matteo）去季臨危受命，奇跡地帶領球隊捧走歐聯，如此功績，依然火速被炒。香港嗰班高官，死得啦。
還是只要擦得掂老闆鞋，無料到先至有運行？油王一手引入的射手費蘭度托利斯（ Fernando Torres），季初 fit過，又頹番。迪馬堤奧情願排無鋒陣，棄用費托，球隊輸俾祖雲達斯三蛋，歐聯出線機會渺茫。輸波唔緊要，唔可以落老闆面吖嘛，立即請來費托恩師賓尼迪斯（ Rafael Benitez）接手。你仲唔明白？要生存，最緊要知道邊個得寵！

衰抗命

歷史不斷循環，摩連奴（ Jose Mourinho）當年不肯重用狀態低沉的老闆老死舒夫真高（ Andriy Shevchenko），被炒。迪馬堤奧又犯同一錯誤，上季有杜奧巴（ Didier Drogba）在陣，費托長做後備，今季杜奧巴過上海申花，盧卡古（ Romelu Lukaku）情願借去西布朗，全隊得番費托一個前鋒。中場要乜人，老闆都肯買，係死唔肯買前鋒法卡奧（ Ronan Falcao），你就知油王幾想證明自己用五千萬鎊買費托無入錯貨。
費托係復甦咗，可惜自從十月初對諾域治攻入一粒，之後喺英超再無入球。其實狀態唔算太差，不過，費托又開始出口術，繼去季話車路士中場太老唔識輸送，今季就話世界上得以前喺利物浦合作過嘅賓尼迪斯最識用佢。大哥，油王今年重手引入夏薩特（ Eden Hazard）、奧斯卡（ Oscar），加埋原本嘅桑馬達（ Juan Mata），條中場線創造力堪稱英超最強。你咁都嫌？
慘得過老闆錫晒？

泰利、施治等老鬼，對賓尼迪斯接手，冇聲出。西班牙兵桑馬達（圖）立即出聲支持同鄉領隊，更衣室必然大亂。

明年一月，即使法卡奧唔加盟，杜奧巴都可以短暫回歸。不過賓尼迪斯揸旗，費托可以放心得多。

哀黑哨

卡頓保吹到車仔球員起晒火，不單衝入球證更衣室出氣，又屈佢種族歧視。你話其他英超球證會否針對車仔？

係人都知油王嫌迪馬堤奧不是名牌，一早諗住短用，點知上季帶到隊波識飛，至被迫俾張兩年約佢。
如果今季一樣有成績，照計可以死拖落去。季初喺英超創下七勝一和佳績，排榜首，似模似樣，作客連贏阿仙奴與熱刺兩場打吡，簡直有冠軍相。可惜自從喺主場輸俾曼聯，連續三場英超不勝，兩場歐聯輸晒，一落千丈。
慘在對曼聯嗰場根本唔應該輸，球證卡頓保（ Mark Clattenburg）先屈費托插水，趕佢出場，再判曼聯越位入球有效，明搶車仔三分。
英超由第一跌落第三，歐聯九成九出局，油王仲唔大條道理手起刀落？

賓尼迪斯 VS車仔老臣

油王第一心水人選哥迪奧拿（ Josep Guardiola）遲遲未肯出山，失業大軍賓尼迪斯竟然連一張半季合約都吼。捱得到季尾都算贏。
我覺得賓尼迪斯有料到㗎，唔計 N年前帶華倫西亞可以打破皇馬、巴塞壟斷，即使帶利物浦，第一季已經贏歐聯，之後跟曼聯鬥到入直路，英超僅敗，已經係天大成就。如果賓尼迪斯帶第二隊，我一定撐。
不過，睇佢帶國米期間的徹底失敗，可以斷言賓帥帶車仔一定困難到極。摩連奴帶過的球隊，最大特點係隊中必有主力球員跟摩連奴情如父子，賓尼迪斯強人作風，如果接摩連奴班子，死硬。像執教國米時，決心建立自己的班底，要一眾球員跟摩連奴劃清界線，結果眾叛親離。當年國米剛成三冠王，球員興高采烈，賓帥簡直找死；今日車仔好啲，摩連奴的親兵走的走，老的老，艾殊利高爾（ Ashley Cole）即將離隊，林柏特（ Frank Lampard）不受重用，餘下泰利（ John Terry）與施治（ Petr Cech），影響力大不如前。說話係咁講，不要忘記賓尼迪斯帶利物浦期間，喺歐聯對足車仔幾年，仇口唔少，尤其車仔球迷直頭當佢殺父仇人一樣，你要賓尼迪斯得到車仔上下歡心？等於叫雲加（ Arsene Wenger）執教曼聯一樣戇居。

剛加盟利物浦，跟賓尼迪斯訪港，費托仍然似個怕醜仔。家陣，經常批評隊友不濟，領隊唔識用自己，犯眾憎。

傳過摩連奴會返英超，傳到佢位千金真係去倫敦讀書。加盟曼城？加盟曼聯？當年帶車仔喺歐聯經常不敵賓尼迪斯帶嘅利物浦，自此二人被視為宿敵。車仔球迷點接受死對頭帶愛隊？

哥迪奧拿家陣喺紐約養生。名牌係名牌，不過巴塞勁在青訓體系，球員默契，呢啲，車仔有咩？