好男好女
Rick Chin 踩過界
與 Rick Chin走入商台，幾乎每個人都認識這位第一代星級化妝師，熟絡地與他打招呼，畢竟在化妝行業打滾了廿年，經常拎住化妝箱陪着歌星、明星開工，算是電台、電視台的熟客。
當日做完電台訪問的許志安、楊崢也問他為哪個藝人化妝而來，「好多 artists見到我，以為我仲做緊化妝師，即刻想 book我幫佢哋化妝。」沒有人估到， Rick已經封筆唔化，由幕後走到幕前做藝人，「我唔係想做明星，只不過係喺娛樂圈工作嘅人，希望可以娛樂大家。」
送上門
當 May姐講雞汁可以做足半年，好明顯，這個娛樂圈已經唔使跟規矩，更何況是陳志雲主動找 Rick主持電台節目，「之前森美放假，我試過頂佢同小儀拍檔做節目，陳生話反應好好，覺得我講靚、講愛情幾好笑，就搵我開咪接王喜做節目，佢話佢都唔驚，我驚乜喎。」今個月開始，他會與吳千語主持商台節目《起來，大龍鳳！》談性說愛，「主題圍繞 beauty、 eat、 play、 love，將扮靚 apply落食同 dating，其中一日仲會 phone in，聽眾可以打嚟講感情問題，我就好似做南宮夫人。」
除了聲演，何麗全又睇好 Rick做幕前演出，將會在 now開一個類似「盛女愛作戰」的節目由他主持，「呢個係 lifestyle形式的愛情節目，我教人點樣溝仔、溝女，我最叻係幫人扮靚， dating都要扮靚、食嘢嘛。」 Rick當化妝師期間，結識了無數歌星、藝人，一向抵得諗，做嘢冇托手踭的他，別人問他哪些化妝品、護膚品好用？他總會話：「得啦，我幫你買！」而他儲落的人情卡，現在正是碌卡的時候，「好多明星、歌星知道我做主持，都應承上我節目做嘉賓。」
做幕前，對 Rick可以說是雙贏，既為他開拓新事業，又能提升他的知名度，幫助宣傳他自家的美容生意。去年他在海港城開「美學肌研」（ esthetique LABO），主要做醫學美容，開業不足三個月，就發生 DR醫學美容毒血針事件，認真唔好彩，「我哋一向只賣四樣 laser，打五樣針，所以 DR事件對我哋冇乜影響。」為免殃及池魚，即使新鋪開張，他也未有大事宣傳，「嗰陣你做任何廣告宣傳，都係掟錢落海，我哋決定暫時只做熟客，靠口碑。」當時，他反而沒有搵一班有錢又貪靚的名人阿太幫襯，「 Yvette（榮智健姪女榮文蔚）都問使唔使幫手，但我唔想借助啲名人個名，因為依家打針、醫學美容咁敏感，我唔想影響到朋友；但我唔介意第一個企出嚟講，打針同 laser唔係整容，最緊要係有管制。」
繼今年初與吳千語在 now合作做主持，二人又經陳志雲安排在商台做拍檔，週一至週五晚凌晨十二點半開咪一粒鐘。 
（《蘋果日報》圖片） 
Rick曾是很多明星、名模御用化妝師，當中張國榮在《號外》封面的 smoky eye妖妝，亦是他手筆。
搵到大水喉
有傳 Rick的自家護膚品和美容中心，是他的好友張栢芝出過百萬投資， Rick聞言即耍手擰頭，「呢樣真係要澄清，百幾萬點夠搞一個品牌？我哋要喺瑞士研製美容產品，成本過千萬，出錢同我合作嘅係明輝國際（ 3828），唔係栢芝，不過佢同兩個囝囝真係成日幫我試 product做白老鼠，出小朋友護膚品，係因為栢芝扯住話冇嘢啱佢個仔用。」
「美學肌研」美容中心開業至今年多已經 break-even，但 Rick坦言曾衰到貼地。他自○八年起已沒有靠揸（眉）筆賺取生活費，喜歡旅遊的他，為旅行社做帶團做星級旅遊，又出旅遊書，「嗰個 moment想做旅遊，帶人去買靚嘢，食好嘢，點知因為長期彎腰化妝，腰骨出咗問題。」碰巧當時在國內生產美容產品的明輝國際，找他合作生產自家品牌的美容產品，他又要攞苦嚟辛，「我唔想淨係掛個名，我驚有記者問我點解可以出護膚品，所以想去讀書，有學歷支持自己。」○九年，他去了英國、美國修讀有關天然草本護膚療法，及醫學美容課程。
美容中心有醫生駐場， Rick就為客人做顧問，美容、化妝、形象一條龍服務。 
當日 Rick在銅鑼灣開鋪賣洗頭水、沐浴露，陳小春和林心如亦有到場恭賀。
唔識做生意
當時 Rick一心想轉行做生意人，踏足商界首個項目是生產洗頭水、護髮素和沐浴露，此舉差點令他永不超生。「當時我最錯係喺銅鑼灣、旺角開地鋪，單是租金每個月要四十萬，一支洗頭水賣七十蚊，要賣幾多先夠交租？」試過公司流動資金只剩五位數字，多次想過放棄，但又給他找到一線生機，「大陸有個酒店集團，竟然同我買咗大批洗頭水，救咗我一命。」
當時 Rick經常飛來飛去讀書、做研究，生意又點會好？但因與業主簽了兩年死約，只有硬着頭皮繼續做，「業主唔肯放過我，唯一出路就係破產，當時我真係諗過㗎！」想不到，十蚊一塊的 super moist paper mask令他逃過一劫，「由設計到推出只用了兩個月，三個月就已回本。」
至此，他才明白自己是個有審美眼光，但不懂做生意的人，「以前我好幼稚，成日覺得要變 business man，但其實 Rick Chin始終係一個只識扮靚嘅人。」於是他撬了連卡佛的銷售團隊做營運，他就負責 R&D，為客人做美容顧問，「我同研究員一齊去南極研究冰川水，智利睇蝸牛，南美搵火山泥。」他甚至在亞馬遜與當地土著同住個多月，「我成個森林野人泰山咁，住喺佢村入面的草屋，研究佢哋嘅草藥 dragon blood秘方。」
冰川講到冰川， Rick興奮地說:「我真係瞓喺嗰度，研究冰川水。」 
亞馬遜為了研究亞馬遜土著的草藥 dragon blood（小圖），他去了當地三次。 
智利Rick參觀智利的蝸牛養殖場，「嗰度啲蝸牛真係好大隻。」
同栢芝神交
這段期間，他就似人間蒸發，只偶然以張栢芝好友身份出席活動，代她回應緋聞是非，「我同佢同一間經理人公司都幫咗我，呢幾年如果唔係有張栢芝，佢一有新聞就有人請我出活動，好似 speaker講吓嘢，人哋以為我死咗，仲帶咗啲收入俾我。」
Rick與張栢芝識於微時，夠膽什麼也代她回應，以為二人乜都傾、成日見，點知 Rick話：「我哋感情好好，但就一啲都唔恨見，亦冇乜傾心事，我哋可以喺屋企騎樓，一人一支煙坐喺度無嘢講，好似神交咁，呢啲友情係甩唔到。」所以，縱使全世界都話張栢芝不是好母親， Rick依然義無反顧地撑話：「佢係一個 super稱職的媽媽。」
完美句號
留言列表
{{ article.title }}
