月尾 MAMA現身
身高 5呎 11吋嘅 John Park，出生美國芝加哥、曾於芝加哥西北大學主修經濟系。高大斯文又有學歷，最煞食係把聲夠深情，被韓國傳媒封為「新一代情歌王子」。
韓國最大規模音樂頒獎典禮 MAMA（ Mnet Asian Music Awards），今月尾將大軍降臨香港舉行，到時除咗一班 K-pop巨星好似 PSY、 Super Junior等一定要捧場外，有份角逐「最佳男新人獎」的新星 John Park一樣值得追。
近年韓國紅得起都係大堆頭、跳勁舞男團，但今年 24歲的 John Park，玩 solo一樣紅得起，全靠把聲清脆得嚟夠深情，一首情歌〈 Falling〉冧爆韓妹，今屆 MAMA除同 SJ師弟 EXO爭奪「最佳男新人獎」外，仲角逐「全年最佳歌曲」等 4個獎，今年男新人中， John Park最大關注啦！
於美國芝加哥出世的 John Park（朴成奎），唔只英文 talk得，仲非常唱得。拜 Stevie Wonder做偶像的 John Park，自細已學偶像唱 R&B，幾年前終於膽粗粗走去參加美國專捧新星的歌唱比賽《 American Idol》。雖然 20強止步，但 John Park一啲都冇氣餒， 2010年回流返韓國，參加 Mnet有線電視舉辦的《 Superstar K2》，最後勇奪亞軍繼而加入樂壇。
John Park唔算好靚仔，但勝在把聲勁靚，尤其唱高音夠清脆，唱假音又冇甩轆，啱晒唱情歌。
角逐 4大獎
細膽易手震
唔好睇 John Park次次上台唱歌都好老定，其實佢仲細膽過老鼠。 John Park話佢每次出場唱歌前都會膽怯，如出席大場面仲會驚到標冷汗，試過有次出席簽名會，見到大班粉絲， John Park更緊張到手震，連佢都自嘲：「好尷尬，真係冇鬼用。」
睇嚟月尾喺 MAMA要同 EXO同 B.A.P爭男新人獎，點都要死頂扮鎮定，起碼贏咗個勢先啦！
留言列表
{{ article.title }}
