娛樂八掛大放送★

見好多年輕人想買車，好煩咁左度右諗，要外形討好又想價錢化算，更希望操控容易。借來 Benz B180作長測，發覺實用小車有力滿足新手要求，輔助泊車系統又可應付泊 S位，還減至廿多萬元新低價，當人人大鬧年貨樣樣貴， Benz就出招反通脹！記者：許維雅攝影：譚盈傑Model： CC

其他副刊影片 反通脹減價促銷

蠢蠢欲動踏出買車第一步，好多人都會顯得份外三心兩意，一般人首要考慮的，通常都係車價。平治於往年推出的全新型號 B180，以更細容積引擎、更低門檻車價來打動人心，當時以$255,000就可擁有一部配備豪華、車廂實用的 Benz車仔，經已覺得好抵玩。個個憂慮新年樣樣加，平治卻反潮流抗通脹，宣佈 B-Class減價促銷， B180就減$17,000以$238,000的車價發售。

放大圖片

■水滴形頭燈連主動照明系統可提升駕駛安全。

放大圖片

■ B180原裝跟 15吋輪圈，想型要補錢改 16吋。

尾廂大得驚人 放大圖片

■ 2,245公升超大尾廂夠晒實用。

懶理甚麼 B仔將會改款的傳聞，買得呢類型車仔都係貪佢夠實用，借來測試了三日兩夜摸清底蘊，優點缺點逐一數給大家知。先論外形，頭尖尖尾圓圓的可愛造型，相信無乜年輕人會抗拒！正因為呢個可愛造型，帶來細車仔的錯覺，但其實車身都幾高，好處當然係駕駛時視野更加清晰，內櫳空間感闊落之餘，尾廂亦夠晒大。想放多幾件行李、特長物件、帶大狗出街都得，更可以摺合後座，變出 2,245公升儲物容量、 2.95米深的大尾廂平台，不過高身車的弱點當然係無咁慳油啦！

放大圖片

■真皮混帆布座椅比起其他平治房車更軟熟。

放大圖片

■摺合後座要先拉起座墊再拍低椅背。

操控輕鬆舒服 放大圖片

■ B仔有幾足料？金屬腳踏都配備埋呢！

揸住 B180三日周圍去，途經高速公路，亦有走進市區，長途的平均油耗一般為 8L/100km，以油費每公升$15計算，每公里都要$1.2。操控方面，用輕鬆舒服來形容，超輕軚感帶來駕駛享受。難求 116匹有澎湃馬力，慶幸 AUTOTRONIC無段變速波箱的暢順，唔會令你感覺力不從心，若然軚環可以有埋加減波撥片轉波就更貼心。

自動泊快夾準

對好多揸車新手或女士們，泊街邊 S位就是死穴， B180有 PARKTRONIC泊車距離顯示器連主動式泊車輔助系統幫手，只要車速於約 30km/h以下，感應器就會自動偵測旁邊汽車，再入 R波，錶板顯示屏就會問你是否泊車，按一按上箭嘴答 Yes，你只需用腳踩住逼力控制車速，就可鬆手交畀電腦幫你一手軚扭入。試完一次，發覺準確度好高，而且速度 OK，會按捺不住玩完又玩，見到個位窄又試闊又試，連街邊有兩個錶位都試！最令我欣賞的，係佢唔會泊喺兩架車中間，係會幫你泊番喺一個錶位裏面，單係呢個配備就已經幫 B仔搶了唔少分啦！

主動式輔助泊車系統 放大圖片

① 電腦偵測到有位泊時，屏幕的 P字旁會出現箭嘴。

放大圖片

② 入後波，屏幕立刻出現問你是否想輔助泊車。

放大圖片

③ 按軚環的上箭嘴，代表答 Yes。

放大圖片

④ 軚環便會自動旋轉幫你一手扭入，記住控制迫力。

B200都減$16,000

細佬減價益街坊，又點會少得大佬 B200一份，想力水好啲，不妨考慮 2,034cc引擎的 B200，馬力輸出大 20匹去到 136匹，扭力有 185Nm，原價$315,000，家減至$299,000，慳番$16,000。雖然兩兄弟外形一樣，但內涵配備及規格都有些少分別，其中比較明顯的，是 B200就會跟 16吋輪胎，兩對鞋仔大少少都靚仔啲啦！

B180規格

引擎： 1,699cc直四馬力： 116ps/5,500rpm扭力： 155Nm/3,500-4,000rpm傳動： AUTOTRONIC無段變速　前驅售價：$238,000（原價$255,000）查詢： 2895 7339（仁孚行）


■ B180無論操控同外形都平易近人，今次連車價都咁親民，更易向年輕人招手。