THE ICON事件引起軒然大波，發展商榮豐（0063）最終願意回收單位，主要係怕改動廚房會被屋宇署追究。一言聽講，榮豐之前點解要業主先收樓，然後至整個開放式廚房，係因為原先圖則個固定廚房好細，為咗促銷，於是跟買家講，可以幫佢哋拆咗個廚房，令成個客廳大咗；再而喺大廳另一邊整個開放式廚房，咁間屋個空間即時闊落晒。

但要知道，將廚房由一邊搬到另一邊，涉及更改水、電、煤管道，屋宇署未必會批。於是乎發展商起好座樓後，要業主先收樓，再而幫佢哋裝修同整個開放式廚房，就係一旦屋宇署發覺有關改動，責任在於業主而再唔係發展商；此亦可以理解，點解業主收樓時間屋內櫳咁簡陋，事關預咗進行改動工程，交樓時冇必要整到靚靚。至於啲買家買樓前知唔知呢個安排，一言就唔清楚。

THE ICON事件一出，唔少整咗開放式廚房嘅業主好擔憂，怕以後有手尾跟。

講真，好多時有業主偷偷改動廚房，一般屋宇署好少查。類似呢啲方法過去都有發生，一言知道灣仔呢幾年有啲落成嘅單幢式大廈，都係用呢個方法吸引買家，THE ICON並唔係首創，今次只係有買家走出嚟嘈，先將件事搞大。

不過，呢件事後，一言聽聞唔少改動開放式廚房嘅業主都好擔心，怕會被屋宇署查。雖然屋宇署主動查樓機會唔大，但若然他日賣樓，肯定會影響轉賣能力，事關新買家會好注意改動後嘅廚房係咪得到屋宇署批核。

THE ICON業主要先收樓，發展商先幫佢整廚房，所以收樓時內櫳擺滿雜物。（相片由有線電視提供）

車位買家 被發展商玩死

講開啲唔負責任發展商，一言老友通天話，舊年樓市旺，連帶車位都被追捧，有發展商趁機將持有好幾年嘅車位推售，藉機散貨。舊年有發展商推售九龍塘某豪宅盤部分車位，發展商賣車位時，仲好大方咁提供所有車位嘅租金收入情況。

通天個老友見嗰度車位租金唔差，發展商又有回贈，於是一口氣買入三個連約位，每個平均二十二萬，月租每個約一千四百元。雖然租約係一個月通知嘅生約，但基於有關租客已租用咗四、五年，老友心諗唔會退租啩。

好喇，買咗個零月，三個車位租客竟不約而同退租。老友好奇怪，四處打聽，原來啲租客收到發展商嘅信，將推出一批車位出租，月租竟然只係千二，啲租客梗係即刻轉租；可憐老友迫於無奈要減租，最後只能以月租一千銀租出，回報由原先嘅七厘幾跌到得番五厘。

有發展商賣連約車位竟然出術，投資者碰得一臉灰。

女主播請食檸檬 金融才俊空歡喜

近期電視台有唔少女主播都先後離開，無綫新聞之花郭詠琴都走埋，依家得番個周嘉儀獨挑大樑，周嘉儀除咗粉絲多，裙下之臣絡繹不絕。早幾個月前，周小花畀雜誌影到跟個男仔一齊，雜誌話係金融才俊，但就冇講背景係乜水。

一言就知道，位男士係BIG FOUR會計師行高級員工，家住跑馬地，屋企都有啲錢，喺雜誌未報道前，金融才俊因為約到周小姐行街食飯，返到公司興奮莫名，仲成日拎住周小姐嘅玉照，問同事「呢個女仔靚唔靚呀？」，同事都係支吾以對，敷衍幾句。

但到雜誌登咗兩人幅相出嚟，仲話兩人係男女朋友，同事以為佢終於追到美人，點知金融才俊反而面黑黑唔回應，後尾啲同事先知道周小花唔受媾。

周嘉儀樣子甜美，裙下之臣自然多不勝數。

梁振英去飲 畀人話拉票

被視為特首候選人黑馬嘅行政會議召集人梁振英，最近無論做乜，都會被人視為入「禮賓府」鋪路，舊年佢有個舊朋友嫁女，CY（梁振英洋名）畀面去飲，點知就惹來唔少猜測，搞到餐飲宴好似變咗政治飯。

話說喺理工學院（今日嘅理大）讀測量嘅CY，有位同系嘅師弟嫁女，雖然兩人十幾年無聯絡，但所謂識於微時，老朋友發帖請到，咪抽空去飲囉，有猛人到賀，主人家不知幾開心。

咁啱飲宴上有唔少測量界朋友，而且當中仲有成班測量師學會會員，有人就話CY係咪順便嚟拉票，唔係以佢今時今日嘅地位，又點會出席呢個婚宴。一言覺得都好慘，喺啲敏感時刻，隨時都會畀人指指點點。

CY諗住去恭喜老同學，點知就畀人話拉票，真係好冇癮。