房祖名與薛凱琪這對拍足五年拖的「情侶」，曾屢傳分手、復合、第三者介入，更有指祖名拍新歌MV時與台模雪芙一吻傾情，但絲毫無損他與薛凱琪關係。拍照當日，兩人好自然地情侶feel上身，輕易擺出親密甫士，所以他們口中所謂的「冇拍過拖」，似乎有點兒hea答！
被祖名攬住，薛凱琪笑得又甜又冧，兩人十足熱戀情侶。
自電影《早熟》後，房祖名與薛凱琪（Fiona）的名字便緊緊扣在一起，雖然期間經過一段冷靜期，但最近又隨住電影《分手說愛你》，兩人的感情世界再度受關注。曾先睹為快欣賞該片的觀眾，無不認為兩人戲假情真，無奈兩位主角堅決否認，不過紙本來就包不住火，僅從他們相處態度，便能感受那份內在的情感。
祖名被薛凱琪深情睥住，即刻硬晒軚。
主動挑逗搣面珠
畢竟相處了幾年，兩人戲裏戲外甚有默契，Fiona說：「有一場戲講我同祖名嗌交，但佢啲Grammer錯晒，佢仲要覺得自己好有道理，無喇喇彈句『男女平等』出嚟，不過我Get到佢想表達啲咩！」那現實生活中又有否想過當情侶？祖名說：「都未開拍《早熟2》，咪繼續傳住先囉！」Fiona亦大表贊同。
雖然死口唔認拍拖，但當要求擺甜蜜甫士時，兩人沒有忸怩，只是祖名初時有點尷尬，輕攬Fiona纖腰時動作騎呢，被Fiona取笑似排隊，及後更要Fiona指導他從後擁抱，認真搞笑。之後Fiona還主動以手指挑逗祖名下巴，祖名即以呆滯眼神來迎合她。一輪熱身後，兩人更為投入，當Fiona瞓於祖名大腿上時，祖名還肉緊地搣Fiona面珠，甜蜜非常。
傳緋聞意見不一
一對情侶爭拗一定有，他倆亦不例外，Fiona承認兩人經常意見不合，還投訴祖名永不認輸：「佢一定要拗贏，就算知自己唔啱都要贏，你要我舉例就難，因為成日都發生。」祖名則反駁：「辯論都係一門藝術，有時我都讓佢o架！」Fiona聞言即呱呱叫：「邊有呀！係佢一定要贏咋！」
雖然戀情早已被外間受落，但這數年間兩人仍分別與其他男、女星傳緋聞，Fiona有方大同、周柏豪、外籍黑人高層、同性好友等，而祖名則有戴佩妮、蕭亞軒、李毓芬及雪芙等。問到當中哪些緋聞是真，祖名則大賣關子，Fiona就斬釘截鐵謂：「都唔係真，人哋以為我真係男、女仔都啱、咩人都鍾意，下次就會話我同動物嘞！」對於同是緋聞纏身，兩人卻有不同睇法，Fiona說：「我唔鍾意，雖然有緋聞係會快啲畀人識，但唔代表有幫助，例如我好辛苦出咗隻碟，點知咁啱我畀人影到同女仔去街，記者會就變咗回應呢啲嘢。」相反祖名卻認為緋聞沒有令他感困擾：「好過畀人屈醉駕、強姦、打架，呢啲嘢分分鐘要坐監。」
祖名肉緊地搣薛凱琪面珠。
祖名與薛凱琪咁啱擺出個長頸鹿look。
房祖名直言身為名人之後深感壓力。
拍拖各自有憧憬
Fiona更指現階段要拍拖甚艱難，因每次出外均成狗仔隊追訪目標，故會選擇與男友於家中看DVD，笑言想闖情關，但不心急：「我要搵個好男仔，唔係玩玩吓，拍親拖我都希望係一世，結婚我一定想公開，不過我prefer對象唔係圈中人，咁會簡單啲。」
鍾情台灣妹的祖名，大讚她們溫柔得很，有別於港女的強勢，不諱言以往拍拖有憧憬將來，結果戀情未有開花結果，所以現時拍拖不會想長線，更謂：「可能我依家未遇到一個值得我去觀察嘅對象啦！我又鍾意女仔聰明，以前都會喜歡大過我嘅對象，因為教到我，依家如果細我小小都可以接受。」
薛凱琪曾拍拖四次，笑言每次都很認真。
Fiona家教嚴打到16歲
獨生女Fiona則從小受萬千寵愛，被安排入讀國際學校，不過家教「超嚴」，她說：「中學時期唔畀出夜街，同學放學去『麥記』當娛樂，我就要返屋企，直至大學先間中去吓夜街，我都畀媽咪打到16歲，仲試過沒收手機，又唔畀我聽電話同睇電視。」
祖名揀女友阿媽做辦
祖名於傳統家庭成長，有個國際巨星父親成龍及已息影的母親林鳳嬌，由於父親長年累月出埠工作，故他全由母親照顧，難怪祖名表示若有人傷害母親，他會不惜一切保護對方。
回憶兒時百厭點滴，祖名直言從小被打大：「阿媽用藤條打我手掌，16、17歲仲打緊，打到佢自己喊，我好心痛，之後就要乖唔想佢再喊，依家佢淨係睇我嘅戲先喊，因為感動個仔終於大個囉!」身為名人之後，祖名不諱言壓力大，自言不能行差踏錯，就連成就及女友也很重要，他說：「阿媽話唔可以醜過佢，但我阿媽咁靚，所以都幾難。」
薛凱琪得閒就做孝順女陪媽咪行街。 （資料圖片）
祖名表示畀阿媽打到大。 （資料圖片）
留言列表
{{ article.title }}
