倪震同老婆周慧敏為酒吧做生招牌，無本生利。
無本生利 分別在灣仔及尖沙咀開設Joe's Billiard & Bar的倪震，發大嚟搞開第三間，新店地點在旺角西洋菜街，食埋MK仔市場。倪震無本生利，投資有入無出，三間酒吧都有幕後老細科水，倪震掟個名同出面，便有免費股份。唔使出本有錢收，倪震亦冇慳力，搬出老婆周慧敏同老豆倪匡，為本週四（七日）開幕禮，總動員造勢！
收股份
有慳妹周慧敏做老婆，倪震安枕無憂，投資方面，亦同樣精算。已先後在○六及○九年，分別在灣仔王子酒店及尖沙咀諾士佛台投資開酒吧，作為兩店老闆之一，他一個崩都冇出過。「阿Joe都係老闆之一，但幕後其實另有老細俾錢，佢唔使攞錢出嚟投資，只係用自己個名幫手吸客，就有百分之三十股份，好好賺。」倪震身邊好友說。
老細加碼
○六年王子酒店的波樓開幕，倪震搵嚟當時仍是女友身份的周慧敏，一齊落場篤波宣傳；之後再開尖沙咀分店，已升任倪太的周慧敏，更拉埋好友古巨基落場，幫手宣傳。事隔幾年，幕後老細再加碼，在旺角西洋菜街開第三間分店，新店上月底已開始試業，當晚倪震滿場飛，又邀請了八位日本鏢手示範表演。
做埋按摩
「Joe’s Billiard & Bar」專攻美式桌球，天王黎明同樂基兒亦曾幫襯拍拖篤波，郭富城、側田更是常客。09年4月，再於尖沙咀開分店，更加入腳底按摩，多元化吸客。不過10年5月，卻被拍得新店內有賭局及無上裝表演，引起不少是非。本月於旺角開第三間新店。據了解，倪震、周慧敏得幕後老闆送股30%，相當和味！
想買車
早兩個星期六（五月二十六日）晚七時，倪震駕着與老婆聯名持有的黑色Benz外出，會合朋友到跑馬地的Car City睇車。睇完林寶堅尼再睇勞斯萊斯，並對一架三百多萬的Benz跑車尤其有興趣，在車行磨了近半小時，倪震無自己揸車，坐上友人的法拉利過海。
請埋老豆
去到旺角新鋪，倪震第一時間篤波止癢，見到有朋友前來捧場，他即上前招呼，陪飲陪傾偈。「每次有鋪開，倪震一定搬老婆周慧敏同埋老豆倪匡嚟聲援，雖然話唔使出錢，但阿Joe差唔多每日都落去新鋪實，仲要開會請嘉賓，好落力！」
賺過大錢
曾被稱「才子」的倪震，91年與邵國華合資創辦《Yes!》潮流雜誌，寫埋專欄，深受當時年輕人歡迎，雜誌銷量最高達15萬，倪震曾表示當時每月收入數百萬計。95年，倪震將股份賣給其他股東，套現近千萬，並在樓市高峰期，將手上物業售出賺過千萬；97年，他與周慧敏移居溫哥華，開始退休生活，直至03年回流香港，復出主持電台節目及寫專欄，06年開始沾手酒吧生意，自己做生招牌，印印腳有錢收。 ####
26/5 唔出錢要出力，倪震經常在新竇出現，落場飲酒social。
王子酒店的波樓，由於地點隱蔽，黎明、樂基兒、側田也曾在此拍拖篤波。
當日倪震駕駛一○年以六十多萬購入的Benz外出，倪太並冇同行。
留言列表
{{ article.title }}
