對於蔡楓華歌迷過檔支持自己，胡渭康表示歡迎，更強調歌迷可與他一齊做公益，慳荷包又有意義。
舊年三月在九展舉行一連三場復出演唱會後，蔡楓華正式回歸樂壇，收起昔日瘋言癲行，瘦身keep fit做正常人，無論開騷抑或出席公開活動，幾十歌迷總是前呼後擁，瞓身支持。但近日有指蔡楓華歌迷會出現內訌，矛頭直指會長掠水兼獨霸偶像，部分人因為睇唔過眼，在歌迷會開設的社交網站群組內留言互相「開火」，甚至有人對偶像心灰意冷，紛紛改投當年同蔡楓華前後腳出道的胡渭康。歌迷變節，蔡楓華留言嚴重指責「叛將」，至於成為「收容所」的胡渭康，則擺出一副勝利姿態表示會「門常開」，歡迎任何人加入：「歌迷同偶像又唔係一夫一妻制！」
零回報
蔡楓華回歸樂壇，無大財團無唱片公司背後泵水，初期到電台電視台做訪問宣傳，甚至落廣告谷個唱，原來全靠身邊中堅粉絲集腋成裘，出錢出力撐偶像。「其實阿Ken出番嚟唱歌，大家都好開心，所以會長每次叫夾錢，冇人會say no，演唱會更加場場真金白銀俾錢買飛。呢年幾以來，我自己都使咗萬幾銀，聽講有部分經濟環境比較好嘅fans，都使咗幾萬蚊幫阿Ken。」一名蔡楓華歌迷說。個個出錢出力，蔡楓華不負眾望，於今年四月初踏上紅館舞台舉行個唱。當日歌迷會在場外擺賣「偶像福袋」，內附T恤、記憶卡、滑鼠墊等禮物，雖然叫價三百多元，但為撐偶像，歌迷心甘命抵「慷慨解囊」。到四月尾，蔡楓華在觀塘一間酒樓筵開十席搞歌迷聚會，過千人報名參加，無非想近距離見到偶像，就算每人要俾三百多元入場費，「楓迷」也在所不惜，但去到現場，才發現墮入「掠水騙局」。「我哋去到想同阿Ken合照簽名，會長Carman即刻阻止，話要俾錢買福袋先可以埋身，其實個福袋同演唱會嗰個一樣，但價錢要四百幾蚊，足足貴咗成嚿水，入面啲嘢根本唔值呢個價，都唔知啲錢最後去咗邊。」一名蔡楓華的歌迷說。
隔空罵戰
自此，便有人在歌迷會開設的社交網站群組內留言，狂插會長Carman，甚至有部分人拉隊過檔胡渭康歌迷會。龍顏大怒的蔡楓華，於是發出內部聲明，下聖旨要同叛徒割席：「任何群組組員遊（游）說、慫恿及煽動任何本人之歌迷或支持者到其他歌迷會，等同分裂一個國家，本人將視此人為公敵。」蔡楓華口中的公敵除了變節歌迷，還有胡渭康。對於歌迷過檔一事，胡渭康表示不知情：「其實我冇一個正式歌迷會，亦唔知有件咁嘅事，不過近排啲活動，好似多咗歌迷參加。」至於蔡楓華發聲明指責，胡渭康有另一番見解：「歌迷同偶像冇法律管束，唔係行一夫一妻制，可以同時愛好多個人，希望阿Ken唔好唔開心啦。」之後胡渭康以勝利口吻硬sell做他歌迷的好處，除會定期安排做義工回饋社會，亦不收歌迷會費，更不用買福袋撐偶像，暗寸蔡楓華歌迷會掠水當歌迷老襯。
曾在演唱會門外發售，定價三百八十元的福袋，內附CD、T恤、卡片形USB、滑鼠墊及毛巾，之後在另一次歌迷聚會上重售，但足足貴了一百元。
瘋楓語雨
自從兩年前應《勁歌金曲》邀請，以經典主持人身份亮相熒光幕，蔡楓華便開始部署復出，昔日《勁歌》拍檔盧敏儀更出錢出力助他開演唱會，點知有人打完齋唔要和尚，兩人最終反面收場。
2010年10月
《勁歌金曲》踏入30周年，蔡楓華以經典主持人身份亮相做嘉賓，獻唱經典作品《倩影》時忽然高舉手指指上天：「希望肥姐在天之靈保佑我。」九唔搭八，但台下的盧敏儀居然睇到流晒眼淚。
2011年3月
在盧敏儀幫助下，蔡楓華在九展舉行了一連三場《全心支持蔡楓華All 4 Ken演唱會》，場場爆滿，重踏舞台的蔡楓華又有金句：「我企得喺度係神蹟！」乜唔係肥姐保佑咩？
2011年4月
九展開三場騷袋走30萬歌酬的蔡楓華，因多番暗示開騷冇錢收，最終觸怒盧敏儀夫婦，雙方反面收場，之後蔡楓華自己做埋經理人嗰份，擺明過橋抽板，但他反駁：「我份人有情有義。」
2012年2月
終於氹掂張耀榮幫手搞紅館演唱會，可惜門票滯銷，開一場都賣唔晒，但蔡楓華依然好有信心：「我好多朋友都未買飛，同埋賣飛唔關我事，我只會俾心機唱歌！」
2012年4月
戴住假髮在紅館舉行《蔡楓華情陷紅館演唱會2012》，等足31年，蔡楓華台上又有金句：「好多人問我點解係都要响紅館開騷？我係為尊嚴、名譽同地位。過去十幾年，我嘅生活慘絕人寰、痛不欲生！」更自爆當年講完「一剎那光輝不是永恒」後，係佢選擇自動請辭，並非遭無綫炒魷。 ####
被歌迷指獨霸偶像的Carman（紅衣），有傳她強逼歌迷會會員購買貴價福袋，才獲批准接近蔡楓華。（《蘋果日報》圖片）
蔡楓華歌迷經常出錢出力，除集資落廣告、搞大型聚會等，連偶像甩鞋帶，都肯跪低代綁，任勞任怨。
不少昔日「楓迷」過檔撐胡渭康，還定期與「新偶像」做義工，唔使再俾人掠水。
留言列表
{{ article.title }}
