柯有倫同小鬼黃鴻升兩個陣頭家族最後化敵為友，一齊jam鼓呢一幕，成為電影重頭戲。
由《海角7號》到《那些年》，證明台灣電影終於徹底復活。冇大卡士冇大製作冇3D冇AV，講父子情講友情嘅《陣頭》，埋單收3.15億台幣（約8,200萬港元），情與義、值億金。鐵定6月21日登陸香港，上畫前電影公司到大學中學路演，請學生免費睇《陣頭》，影響票房事小，教育年輕人堅守信念事大。
膽搏膽
勵志片，講親情友情，故事穿插台灣傳統祭祀儀式陣頭，男主角只係柯受良個仔柯有倫唔係周杰倫，邊個諗到會收3億幾票房。導演馮凱，電視台出身，停工兩年籌備《陣頭》，冇收入冇飯開仲要搵朋友投資再加埋自己銀行成副積蓄，嚇到阿媽日日問個仔：「你會不會輸到脫褲？」大步𨂾過，卒之全台大收，但馮凱依然記得電影第一日上畫，諗住去戲院謝票，點知由開場到散場，成間戲院得一個觀眾：「我追着那位觀眾，送上禮物和緊緊握着他的手說謝謝！」
打真軍
由兩袖清風，突然成為億萬導演，加埋香港星馬賣埠進賬、DVD周邊商品收入，冇人會嫌錢腥，但馮凱唔想俾勝利衝昏頭腦：「我很想趕快忘掉這件事，怕原本的馮凱會不見。」導演有heart，演員亦唔例外，片酬收得平，仲要額外花半年時間學打鼓，所以無論係戲入面，抑或响公開場合表演，全部演員都可以「打真軍」，唔使接shot搵替身播帶扮打，嚟緊嘅香港首映禮，聽講柯有倫成個月前已經練定鼓，準備同大家表演，台灣演員就係咁認真，香港，睬你都傻！
《陣頭》講乜？
取材自九天民俗技藝團真人真事改編，男主角柯有倫只愛音樂，不愛陣頭，自小與父親關係惡劣，後來代父出任陣頭團長，統領一班來自不同背景嘅問題青年，更要面對另一邦陣頭死敵，但最後兩隊人化敵為友，合力到世界各地宣揚陣頭文化。
房祖名搵命搏
繼續台灣電影系列，今次輪到由房祖名孭飛嘅《寶島雙雄》。
老豆成龍係「地上最好打」，做佢個仔更加唔可以失禮，戲中所有危險鏡頭，房祖名全部親身上陣，現場stand by嘅成家班兄弟，想話幫吓少爺仔都唔得。
邊個係雙雄？
在北京做保安員嘅夏雨，參加抽獎贏得台灣6天豪華遊大獎，當佢跟旅行團嚟到故宮參觀，突然出現兩個女賊偷去國寶，於是夏雨聯同另一位職業保安員房祖名一齊捉賊，最後更無意中發現一個國際盜寶集團大本營。電影於6月14日開畫。 ####
咪睇小個鼓，足足有17公斤重，孭住佢四圍行，體力少啲都唔掂。
任何電影點都會有男女感情線，柯有倫會同林雨宣有一段情，不過着墨唔太多。
電影入面，重點刻畫柯有倫同資深演員陳博正嘅父子情，老豆思想傳統，個仔做乜都唔順眼，其實大家屋企都有個咁嘅老豆！
導演馮凱（箭咀）孤注一擲拍《陣頭》，冒住一鋪清袋風險，純粹為理想，冇票房壓力可以俾心機拍出好戲。
從地盤鋼架頂部跳落地下之後仲要跑，房祖名前前後後跳咗八次導演先肯收貨。
飾演女賊嘅Jessica C.，拍攝期間發生櫃員機失竊事件，不過佢心情冇影響，個胸一樣咁低。
陳漢典都有份拍，戲中飾演導遊，顧住逼旅客買紀念品，唔見咗團友夏雨都唔知，男版導遊阿珍。
留言列表
{{ article.title }}
