抵到爛意大利菜　AL MOLO 蘇施黃 @ 娛樂八掛大放送★

So Comment 蘇施黃

邊有咁大隻蛤乸隨街跳?!
就係有。新開兩個月，食意大利餐叫「AL MOLO」。由尖沙咀碼頭行去海運，唔好上石級，靠左邊路仔入，或駛車入太子酒店轉出海皮，直駛到篤篤，可在那個多層停車場停車。好食夾大碟又平到死！超值！超值！超值!!!

裝潢
整齊，全木，頗年青。我最欣賞那些燈。餐廳分幾部分，大部分是普通四方枱，近open kitchen有幾張卡位。
另一邊，要上一級，近pizza爐係高枱、bar櫈，年青一點，去到尾，係另一出口，出海皮，面對維港景，好靚，露天位又有三幾張小枱，Nice！

老闆
聽聞係位印度人，出身於Grand Hyatt，係位打工仔，起初在SOHO開餐廳曾慘敗，又從頭嚟過，現在有二十多間餐廳在港、九各處，叻仔！

Michael White Returns!
大廚叫Michael White，來自紐約，我企在他身邊好開心，突然變得好瘦，更加要話我病重啦，死得㖭，by the way，我好好！老虎都食得落一隻，八卦週刊令大家掛心我，但唔係啲八卦週刊寫我病重，我又點知你哋咁關心我呢?! Hea, Hea！
9月19至22，Michael特地來港煮幾日，$568 tasting menu包一杯酒，真係抵到爛。

Tasting Menu
Astice︰波士頓龍蝦加burrata cheese salad，burrata cheese普通，龍蝦當然雪藏啦，但好食，而且唔係兩、三嚿，係叉極都係龍蝦，以為可以叉吓第二樣，又係叉到龍蝦，一客有半隻！

Tortellini En Brodo︰在餐廳入口處，有間小房，房內有女廚在搓麵粉，自製pasta，大家可從大玻璃看整個過程，豬肉餡的小意大利雲吞固然好吃，最正的是那清湯。朋友們吃不完雲吞，但一滴湯也不淨。

Bistecca︰Grilled Beef Tenderloin，生平最憎食牛柳，因為又冇牛肉味，又冇牛肉texture，冇𡁻頭，但這牛柳我都會給頗高分數。最正乃係旁邊的三幾粒用balsamic和紅酒燴的小洋葱。

Fusilli︰朋友不吃牛，Michael預備了一個vegetarian pasta，小螺絲粉in basil pesto，上碟已很美麗，非常彩色，有黃色zucchini flower又有紅色番茄，食落味道更一流，既清，又燦爛!! Portion好大，是「COVA」的size 3倍，但只售$168！又抵又好食！正！正！正！

AL MOLO
地址︰尖沙咀廣東道17號海港城海運大廈G63
電話︰2730 7900

蘇施黃
資深電台人，天生異「口」，除了講嘢叻，食嘢同樣嘴刁，近年開咪、上電視做主持都不離教人食得精，吸引大批粉絲跟佢搵食。 ####