娛樂八掛大放送★

上周一（ 14日）港姐出發去印度進行一連 9日拍攝外景之旅。當日中午，羅仲謙在電視城舉行拜神儀式時，和佳麗相處仍然生疏。當時羅仲謙表示：「我早過馬國明同志偉見啲女仔，因為我哋之前要排定舞。」問他睇好邊個，他只說因為認識莊思明家姐莊思敏，所以對莊思明較有印象。
去到印度，擁有 42吋巨胸的羅仲謙話咁快就同班佳麗混熟，拍攝期間經常同各佳麗有講有笑。相反身為師兄的馬國明，同佳麗不但零交流，就連企埋一齊都表現得好生硬，同《談情說案》裏面的花弗警察「 Lo Sir」判若兩人，因此班佳麗更加主動跟生鬼又活潑的羅仲謙玩埋。

私下交換電話

外景拍攝第 4日，即爆出羅仲謙和 2號張莉莎「失蹤兩小時事件」，羅仲謙堅決否認事件，此後對 2號張莉莎表現避忌，亦唔敢再同佳麗行得咁埋。不過失蹤事件擺明煲水居多，拍攝後期羅仲謙亦放下防線，重拾港姐湯丸本色。本刊發現，羅仲謙與擁有 34D上圍、被封為「港姐咪神」的 8號彭慧中特別好傾，兩人更不避嫌當眾講笑。有同行幕後爆料話：「羅仲謙真係好受班佳麗歡迎，不過講到最有交流都係 8號彭慧中，謙仔成日都同佢講笑， 8號亦好冧佢，私底下仲交換咗電話㖭！」
港姐湯丸又點會只係冧一個呢？羅仲謙對被指內定冠軍的大熱「的骰湯唯」 11號李文煊亦相當照顧，埋位拍攝時李文煊飲完水，羅仲謙即幫佢丟掉水樽，非常細心。對於成為港姐湯丸，令彭慧中和李文煊冧爆，羅仲謙笑說：「幫啲女仔都係舉手之勞，我諗我都係衰太 gentleman！」謙仔出發外景前先被本刊踢爆與傅穎拍拖兩個月，唔知女方睇完會否打翻醋。

志偉奉旨女

出任過無數次港姐司儀兼外景嘉賓的曾志偉，今年只參與最後兩日的拍攝工作。由於今年港姐質素明顯上升，閱女無數的他表現得份外興奮。在現場他不單身兼導師教佳麗擺甫士，還可以奉旨女，難怪他每年都很樂意做嘉賓啦！

露股罅搶灘

「脹爆王祖賢」 15號張秀文拍攝期間無乜新聞，惟有靠最後一日探訪兒童院時搏盡。她明知所有記者在她後面，依然踎低同小朋友傾偈，露出股罅，標番個尾會。