娛樂八掛大放送★

世界盃開鑼前夕，李克勤一度成為眾台搶手貨。由於四大唱片與無綫因版稅問題關係破裂，身為無綫契仔的他夾在無綫及環球之間，左右做人難。為免列入黑名單，連有線以千萬利誘都哽唔落，反而在商台與林狗講波。唔使做夾心人，克勤鬆口氣︰「朝早講波時間好，唔使捱夜，仲有係冇煩惱。」
以為抽到好籤、攞正牌講波的克勤，撞正寸爆的林狗一齊做節目，句句窒住晒。有傳林狗之所以針對克勤，是因為環球高層黃劍濤（ Duncan），借商台高層老婆甘菁菁關係，幫克勤揮到 150萬酬勞，令商台至高薪 DJ林海峰眼紅。
每每林狗寸爆無綫時，總愛擺克勤上枱，搞到身為無綫契仔的克勤，被問到尷尬口啞啞，認真攞命！而林狗早前亦事先張揚：「嗌交都好，有火花。」擺明衝住克勤而來。

擺克勤上枱寸無綫

6月 14日，無綫播的世界盃模擬片段遭全城插爆，林狗在節目中順勢踩多兩腳，而被擺上枱的克勤，只好局住搭嘴。
林︰克勤，你有冇睇呢個秘密武器（無綫的動畫模擬片）？
李︰（停咗兩秒，扮冇嘢）各適其適吖……。
林︰（再撩）你都好客氣吓喎，真係！
李︰（再兜）有啲人鍾意睇真人，有啲人鍾意睇唔係真人，無乜所謂嘅……
講到無綫模擬片段質素差，林狗踩完再拋個波俾克勤。
林：真係鴨寮街賣俾你都唔要
喎！呢個秘密武器唔怪得咁秘密啦，如果揚開去嘅話一定冇人
幫襯。當初點兜售俾個電視台嘅呢，你識唔識電視台高層呢克勤？
李：（笑住歎氣）當初係兜售我嘅，其實！……（無奈幫口）咁佢哋（無綫）又冇辦法嘅，佢哋又唔播得！

寸英格蘭辣㷫克勤

克勤係標準英格蘭迷，林狗講第一場英格蘭龍門格連救波失球時，踩到英國隊好盡，克勤忍唔住窒番佢。
林：關唔關謝拉特（英格蘭球員）轉咗兩個身嘅關係（失球）？
李：（反寸）嗰個轉，轉得好慢 o架喎！
林：（搶住講）就係慢得滯，慢到個龍門都唔知做乜。
李：哦…！（嬲到收聲）
6月 18日，講到荷蘭兩名女子因穿上啤酒裙為某品牌非法宣傳一事，林狗乘機借克勤寸無綫。
林：舉例有歌迷着咗印咗你嘜頭嘅 T恤上咗《勁歌金曲》，會點？
李：（尷尬乾笑）上咗《勁歌金曲》……哈哈
林：或者着咗謝安琪吖，咁樣會唔會有問題？克勤我問吓你？（克勤想答之際，林狗再插嘴）嗱……你唔好答我話冇留意呀！
李：大家都係假設啫！
林：假設，梗係啦，即係假設。
李：（搶住答，想轉移目標）先講謝安琪吖！
林：唔好唔好，講講你先啦！
李︰（沒好氣局答）如果《勁歌金曲》冇另外唱片公司贊助，咁咪冇事囉！
林狗句句咬到實，難怪克勤佛都有火。記者找兩人回應，但於截稿前仍未有回覆！

林狗周圍寸

林海峰把口了得，最鍾意發表寸爆言論，朝朝開咪四圍辣，去到邊寸到邊，連岳少都冇面俾。
叫阮子健咪撈
有指林狗狂窒《晴朗》另一主持阮子健（圖），除幫他改花名「數據王」外，見阮唔多出聲便窒他︰「乜原來你有返工 o架？」更試過叫他唔好做︰「我冇你諗得咁世界性，咁證明你真係唔應該喺度做。」
迫安仔公開女友
3月，擔任 Big Four演唱會嘉賓的林狗，除了大爆四子情史，講到許志安時，更迫他公開女友名字︰「做安仔女朋友是不是一件好偉大的事。你們這些人，一見到安仔永遠就是叫 Sammi，咁偉大！我謹代表安仔向他的另一半……我不知她叫甚麼名字，他從不公開。」安仔一臉尷尬。
改金句寸陳總
3月，他開咪喪玩陳志雲的世紀金句，自問自答，將陳總的說話改成︰「究竟大師面上嘅疤痕，到底嚟自邊度呢？」「我面上嘅傷痕，係嚟自傳媒界嘅朋友。」「真的真不了，假的假不了，請你唔好驚、唔好亂。」
鹹 Gag玩岳少
2月，他於澳門舉行 1場棟篤騷，唱小鳳姐名曲《順流逆流》時，唱到「每一串汗水，伴每一個成就（剩周）……」，即場向林建岳說：「林生，你真係好大『剩周』呀！」